ஒருபக்கம் ரஜினி, மறுபக்கம் அமிதாப் பச்சன்! பகத் ஃபாசில் பிறந்தநாளில் ரசிகர்களுக்கு வேட்டையன் தந்த ட்ரீட்!

பகத் ஃபாசில் பிறந்தநாளை முன்னிட்டு வேட்டையன் படக்குழு அமிதாப்பச்சன் மற்றும் ரஜினிகாந்துடன் அவர் இருக்கும் படத்தின் சிறப்பு புகைப்படங்களை வெளியிட்டுள்ளது.

ரஜினிகாந்த் - பகத் ஃபாசில் - அமிதாப்பச்சன்

Source : twitter

மலையாள திரையுலகின் முன்னணி நடிகர் பகத் ஃபாசில். இவர் மலையாளம் மட்டுமின்றி தமிழ், தெலுங்கு ஆகிய மொழிகளிலும் நடித்து வருகிறார். பன்முக நடிப்புத் திறமையை வெளிப்படுத்தும் நடிகரான பகத் ஃபாசிலுக்கு மலையாளம் மட்டுமின்றி மற்ற திரையுலகங்களிலும் ஏராளமான ரசிகர்கள் உள்ளனர்.

பகத் ஃபாசிலுக்கு வேட்டையன் படக்குழு வாழ்த்துகள்:

தமிழில் வேலைக்காரன், சூப்பர் டீலக்ஸ், விக்ரம், மாமன்னன் படத்திலும் நடித்துள்ளார். விக்ரம் படமும், மாமன்னன் படமும் இவரது புகழை பன்மடங்கு உயர்த்தியது. தற்போது, இவர் தமிழ் திரையுலகின் சூப்பர் ஸ்டார் ரஜினிகாந்த் மற்றும் இந்தி திரையுலகின் சூப்பர் ஸ்டார் அமிதாப்பச்சன் இருவரும் இணைந்து நடிக்கும் வேட்டையன் படத்தில் முக்கிய கதாபாத்திரத்தில் நடிக்கிறார்.

பகத் ஃபாசிலுக்கு இன்று 42வது பிறந்தநாள் ஆகும். அவரது பிறந்தநாளை முன்னிட்டு அவருக்கு சக திரை பிரபலங்களும், ரசிகர்களும் வாழ்த்து தெரிவித்துள்ளனர். அவரது பிறந்தநாளை முன்னிட்டு பகத் ஃபாசிலின் சிறப்பு புகைப்படங்களை வேட்டையன் படக்குழு வெளியிட்டுள்ளது. வேட்டையன் படத்தின் தயாரிப்பு நிறுவனமான லைகா ப்ரொடக்‌ஷன்ஸ் வெளியிட்டுள்ள புகைப்படத்தில் ரஜினிகாந்த் மற்றும் அமிதாப்பச்சன் இருவரும் ஒவ்வொரு புறமும் நிற்க நடுவில் பகத் ஃபாசில் நிற்கிறார். இந்த ஸ்டில் படத்திற்காக எடுக்கப்பட்டது என்று கருதப்படுகிறது. இந்த புகைப்படம் மட்டுமின்றி புகைப்படமும் வெளியிடப்பட்டுள்ளது. இந்த புகைப்படங்கள் மூலமாக பகத் ஃபாசிலுக்கு படக்குழு பிறந்தநாள் வாழ்த்து தெரிவித்துள்ளது.

ரசிகர்கள் மகிழ்ச்சி:

பகத் ஃபாசிலின் பிறந்தநாளை முன்னிட்டு வேட்டையன் போஸ்டரால் பகத் ஃபாசில் ரசிகர்கள் மட்டுமின்றி ரஜினிகாந்த் மற்றும் அமிதாப்பச்சன் ரசிகர்களும் உற்சாகம் அடைந்துள்ளனர். விக்ரம் மற்றும் மாமன்னில் ஆவேசமான கதாபாத்திரத்தில் நடித்துள்ள பகத் ஃபாசில் இந்த படத்தில் நகைச்சுவையான கதாபாத்திரத்தில் நடித்துள்ளதாக தகவல் வெளியாகியுள்ளது. படத்தின் போஸ்டரும் அதை உறுதிப்படுத்தும் விதமாகவே உள்ளது.

ரஜினிகாந்த் கதாநாயகனாக நடித்துள்ள இந்த படத்தில் அமிதாப் பச்சன் முக்கிய கதாபாத்திரத்தில் நடித்துள்ளார். அவர் நேரடியாக தமிழில் நடிக்கும் முதல் படம் இதுவாகும். இந்த படத்தில் மஞ்சுவாரியர் கதாநாயகியாக நடித்துள்ளார். இந்த படத்திற்கு அனிருத் இசையமைத்துள்ளார். தமிழில் பகத் ஃபாசில் மீண்டும் வடிவேலுவுடன் இணைந்து ஒரு படத்தில் நடித்து வருகிறார். புஷ்பா 2 படத்தில் இவர் வில்லனாக நடித்துள்ளார். இந்த படமும் விரைவில் வெளியாகும் என்று எதிர்பார்க்கப்படுகிறது.