மதுரை தெற்கில் பா.ஜ.கவின் முக்கிய முகம்? - யார் இந்த வேட்பாளர் இராம ஸ்ரீநிவாசன்.. முழு விவரம் !

மதுரை தெற்கு தொகுதியில் இராம ஸ்ரீநிவாசனுக்கு சீட், களம் எப்படி இருக்கும் - தெரிந்த முகமாக இவர் முழு விவரம்.

இராம ஸ்ரீநிவாசன்

Source : whatsapp

2026- தேர்தல் களம் சூடுபிடித்துள்ளது. ஏரத்தாள எல்லா கட்சிகளும் வேட்பாளர்களை அறிமுகம் செய்துவிட்டது. இந்நிலையில் மதுரை தெற்கு தொகுதியில் போட்டியிடும் வேட்பாளரை அறிமுகப்படுத்தியுள்ளது. கடந்த சில வருடங்களாக தெற்கு தொகுதியை குறிவைத்துவரும் இராம ஸ்ரீநிவாசனுக்கு சீட் வழங்கப்பட்டுள்ளது.

 

யார் இந்த ஸ்ரீநிவாசன்

 

இராம ஸ்ரீநிவாசன் இவர் மதுரை மாவட்டம் தே.கல்லுப்பட்டியைச் சேர்ந்தவர். இவரது தந்தை ராமசாமி ரெட்டியார் - தாயார்  ருக்மணி அம்மாள். இவரது மனைவி திலகாஸ்ரீ பொதுப்பணித்துறையில் தலைமை பொறியாளராக பணியாற்றி ஓய்வு பெற்றவர். இராம ஸ்ரீநிவாசன் அவர்கள் கல்லுப்பட்டியில் உள்ள காந்தி நிகேதன் ஆசிரமத்தில் பள்ளிப் படிப்பை முடித்துவிட்டு, திருச்செந்தூர் ஆதித்தனார் கல்லூரியில் பட்டப் படிப்பை தொடர்ந்தவர், BSNL என்ற மத்திய அரசின் பொதுத்துறை நிறுவனத்தில் ஒரு தொலைபேசி இயக்குனராக தனது பணியை தொடங்கி மதுரை காமராஜர் பல்கலைக்கழகத்தில் பகுதி நேர ஆய்வாளராக பதிவு செய்து 2007 ஆம் ஆண்டு காந்திய தத்துவத்தில் டாக்டர் பட்டம் பெற்றார்.

 

கிரானைட் குவாரிகளுக்கு எதிராக போராட்டம்

 

அதன் பின்பு தஞ்சாவூரில் உள்ள சாஸ்திரா பல்கலைக்கழகத்தில் மேலாண்மைத் துறையில் உதவி பேராசிரியராக பணி புரிந்தார். 1985 முதல் RSS இயக்கத்தில் தன்னை ஈடுபடுத்திக் கொண்டு அந்த இயக்கத்தின் பல்வேறு பொறுப்புகளில் பணியாற்றினார். 1995 முதல் சுதேசி விழிப்புணர்வு இயக்கத்தின் மாநில இணை அமைப்பாளராக செயல்பட்டார். 2016 முதல் பாரதிய ஜனதா கட்சியின் மாநில செயலாளராகவும் பொறுப்பு வகித்தார். 2020 முதல்(2026 இன்று வரை) மாநில பொதுச் செயலாளராகவும் பணியாற்றி வருகிறார். 2016 திருப்பரங்குன்றம் சட்டமன்ற இடைத் தேர்தலில் பாஜக வேட்பாளராக போட்டியிட்டவர். 2024 மதுரை நாடாளுமன்றத்தின் பாஜக வேட்பாளராக போட்டியிட்டு இரண்டு லட்சத்து இருபத்தொண்றாயிரம் (2,21,000) வாக்குகள் பெற்று இரண்டாம் இடத்தில் வந்தார். அதிமுகவை முந்தி அதிக வாக்குகள் பெற்றதால் தற்போது சட்ட மன்ற தேர்தலிலும் வாய்ப்பு கொடுக்கப்பட்டுள்ளது. தெற்கு தொகுதியில் செளராஷ்ட்ரா மக்கள் இருப்பதால் அவர்கள் வாக்கு கிடைக்கும் என நம்புகிறார். தேசிய சிந்தனையிலும் ஹிந்துத்துவ சித்தாந்தத்திலும் ஊறித் திளைத்த இராம ஸ்ரீநிவாசன் நட்சத்திர பேச்சாளராக இருக்கிறார். பாரதிய ஜனதா கட்சியின் சித்தாந்த முகமாக பார்க்கப்படும் தலைவர் இராம ஸ்ரீநிவாசன் இருக்கிறார். மீண்டும் கிரானைட் கல்குவாரி செயல்பட வேண்டும் என கிரானைட் முதலாளிகளுக்கு ஆதரவாக போராட்டம் நடத்தியது, இவருக்கு பின்னடைவாக அமைந்தது குறிப்பிடதக்கது.

இதையும் படிக்க

மதுரை காவல் ஆணையர் மாற்றம்: புதிய ஆணையர் அபிஷேக் தீக்சித் பதவியேற்பு.. பாதுகாப்பு பணிகள் தீவிரம்!

இஸ்திரி போட்ட IJK வேட்பாளர்..கவனம் பெற்ற பிரச்சாரம்..பல்லாவரத்தில் சுவாரஸ்யம்