Exclusive: “சி.ஏ. படித்து ஆடிட்டர் ஆவேன்” - சாதிய கொடுமைக்கு ஆளான மாணவர் சின்னதுரை பிரத்யேக பேட்டி

சாதி வன்கொடுமையால் பாதிக்கப்பட்ட என்னை மருத்துவமனையிலும் பள்ளியிலும் தனி கவனம் செலுத்தி பார்த்துக் கொண்டதோடு தனி கவனம் செலுத்தி படிக்க வைத்தனர்.

மாணவர் சின்னதுரை

நாங்குநேரியில் சாதி வன்கொடுமையால் சக மாணவர்களால் தாக்கப்பட்டு மருத்துவமனையில் சிகிச்சை பெற்று வந்த மாணவர் சின்னதுரையிடம் அமைச்சர் அன்பில் மகேஷ் மற்றும் அவரது உதவியாளர் பிரகாஷ் ஆகியோர் தொலைபேசி வாயிலாக தொடர்பு கொண்டு வாழ்த்துகள் தெரிவித்தனர். அமைச்சர் அன்பில் மகேஷ் கூறும் பொழுது, “உனது படிப்பு செலவை நான் பார்த்துக் கொள்கிறேன். நல்லபடி அது போதும் எனக்கு, வாழ்த்துகள்” என்றார். தொடர்ந்து அவரது உதவியாளர் பேசும்பொழுது, “என்ன படிக்க ஆசைப்படுகிறாய்” என கேட்டபோது, பிகாம் சிஏ படிக்க போவதாக சின்னதுரை தெரிவித்தார். மேல்படிப்பிற்கான செலவுகள் அனைத்தையும் அமைச்சரே பார்த்துக் கொள்வார், கவலைப்பட வேண்டாம் என்றார்.

தொடர்ந்து மாணவன் சின்னதுரை, சாதி வன்கொடுமையால் பாதிக்கப்பட்ட என்னை மருத்துவமனையிலும் பள்ளியிலும் தனி கவனம் செலுத்தி பார்த்துக் கொண்டதோடு தனி கவனம் செலுத்தி படிக்க வைத்தனர். அதனால் தான் இந்த மதிப்பெண் பெற முடிந்தது. இதே போல யாருக்கும் வரக்கூடாது எனவும், அடுத்ததாக பிகாம் சிஏ படித்து ஆடிட்டராக வேண்டும் என்றும் ஏபிபி நாடுவுக்கு அளித்த  பேட்டியில் தெரிவித்தார்.

நெல்லை மாவட்டம் நாங்குநேரியைச் சேர்ந்தவர்கள் முனியாண்டி - அம்பிகாபதி தம்பதி. இவர்களுக்கு சின்னதுரை என்ற 17 வயது மகனும்,  14 வயதில் ஒரு மகளும் உள்ளனர்.  இவர்கள் வள்ளியூரிலுள்ள பள்ளியில் படித்து வந்தனர். இவர்களது வீட்டில் கடந்த 2023-ஆம் ஆண்டு ஆகஸ்ட் மாதம் 10-ஆம் தேதி இரவு 10.30 மணியளவில்  சிலர் அத்துமீறி நுழைந்து சின்னத்துரை மற்றும் அவரது சகோதரியை அரிவாளால் வெட்டிவிட்டுத் தப்பியோடிவிட்டனர்.  இருவரும் படுகாயமடைந்த நிலையில் உறவினர்கள் மூலம் மீட்கப்பட்டு நாங்குநேரி அரசு மருத்துவமனையில் அனுமதிக்கப்பட்டு தொடர்ந்து திருநெல்வேலி அரசு மருத்துவக் கல்லூரி மருத்துவமனையில் மேல் சிகிச்சைக்காக அனுமதிக்கப்பட்டு அவருக்கு சிறப்பு சிகிச்சைகள் அளிக்கப்பட்டது. விசாரணையில் சின்னத்துரையுடன் படித்த சக மாணவர்கள் சாதிய வன்மத்தால் இந்த தாக்குதலை நடத்தியது அம்பலமானது. இந்த கொடூர நிகழ்வு தமிழ்நாட்டில் கடும் அதிர்வலையை கிளப்பியது. இதனிடையே கொடூரமான தாக்குதலுக்கு உள்ளான மாணவன் சின்னத்துரை நீண்ட நாள் சிகிச்சை பெற்ற நிலையில் 12-ஆம் வகுப்பு காலாண்டு தேர்வை மருத்துவமனையிலேயே எழுதினார்.  இந்நிலையில் தற்போது பொதுத்தேர்வை எழுதிய மாணவர் சின்னத்துரை 600 மதிப்பெண்ணுக்கு 469 மதிப்பெண்கள் பெற்று தேர்வாகி அசத்தியுள்ளது குறிப்பிடத்தக்கது.