அரசுக்கு ஆசிரியர் எச்சரிக்கை... ஜாக்டோ-ஜியோ போராட்டத்தில் இணையும் பகுதிநேர சிறப்பாசிரியர்கள்...
ஜாக்டோ-ஜியோ முன்னெடுக்கும் போராட்டத்தில் கைகோர்க்கப் போவதாகவும் தமிழ்நாடு பகுதிநேர ஆசிரியர்கள் கூட்டமைப்பு அதிரடி அறிவிப்பை வெளியிட்டுள்ளது.
தமிழகத்தில் 15 ஆண்டுகளாக அரசு பள்ளிகளில் பணியாற்றி வரும் 12,000 பகுதிநேர ஆசிரியர்களின் வாழ்வாதாரத்தைக் கருத்தில் கொண்டு, திமுக தனது தேர்தல் வாக்குறுதியின்படி பணி நிரந்தரம் செய்ய வேண்டும் என்றும், தவறும்பட்சத்தில் ஜாக்டோ-ஜியோ முன்னெடுக்கும் போராட்டத்தில் கைகோர்க்கப் போவதாகவும் தமிழ்நாடு பகுதிநேர ஆசிரியர்கள் கூட்டமைப்பு அதிரடி அறிவிப்பை வெளியிட்டுள்ளது.
இது குறித்து அந்த அமைப்பின் மாநில ஒருங்கிணைப்பாளர் சி. செந்தில்குமார் விடுத்துள்ள செய்தி அறிக்கையில் கூறியிருப்பதாவது:
தேர்தல் வாக்குறுதியும் ஏமாற்றமும்
கடந்த 2021-ம் ஆண்டு சட்டமன்றத் தேர்தலின் போது, திமுக தனது தேர்தல் அறிக்கையில் (வாக்குறுதி எண்: 181) பகுதிநேர ஆசிரியர்கள் அனைவரும் பணி நிரந்தரம் செய்யப்படுவார்கள் என்ற நம்பிக்கையூட்டும் அறிவிப்பை வெளியிட்டது. இதனை நம்பி வாக்களித்த 12,000 பகுதிநேர ஆசிரியர்கள், மு.க. ஸ்டாலின் முதலமைச்சராகப் பொறுப்பேற்றது முதல் தங்களுக்கு ஒரு 'விடியல்' பிறக்கும் என்று காத்திருந்தனர்.
ஆனால், ஆட்சிப் பொறுப்பேற்று நான்கரை ஆண்டுகளுக்கு மேலாகியும், ஆட்சி முடியும் தருவாயை நெருங்கியுள்ள நிலையிலும், இதுவரை அந்த வாக்குறுதி நிறைவேற்றப்படவில்லை. சமூக நீதி மற்றும் சமத்துவத்தைப் பேசும் இந்த 'திராவிட மாடல்' ஆட்சியில், பகுதிநேர ஆசிரியர்கள் மட்டும் இன்னும் கண்ணீரோடு போராடி வருவது வேதனையளிப்பதாக செந்தில்குமார் குறிப்பிட்டுள்ளார்.
அமைச்சர் மீது அதிருப்தி
ஜாக்டோ-ஜியோ அமைப்பினர் தங்களது கோரிக்கைகளை வலியுறுத்தி தொடர் போராட்டங்களை அறிவித்துள்ளனர். இந்நிலையில், பள்ளிக்கல்வித்துறை அமைச்சர் அன்பில் மகேஸ் பொய்யாமொழி, வரும் ஜனவரி 6-ம் தேதிக்குள் முதலமைச்சர் ஒரு நல்ல அறிவிப்பை வெளியிடுவார் என்று தெரிவித்திருந்தார். அமைச்சரின் இந்த வார்த்தைகள் வெறும் "பொய் மொழியாக" மாறிவிடக்கூடாது என்பதில் ஆசிரியர்கள் உறுதியாக உள்ளனர்.
பகுதிநேர ஆசிரியர்களின் வாழ்வாதாரச் சிக்கல்கள்
கடந்த 15 ஆண்டுகளுக்கும் மேலாக தற்காலிகப் பணியாளர்களாகவே காலத்தைக் கழித்து வரும் பகுதிநேர ஆசிரியர்கள் சந்திக்கும் சவால்கள் ஏராளம்:
* சொற்ப ஊதியம்: தற்போதைய விலைவாசி உயர்வுக்கு மத்தியில், மாதத்திற்கு வெறும் 12,500 ரூபாய் மட்டுமே ஊதியமாக வழங்கப்படுகிறது. இதை வைத்துக்கொண்டு ஒரு குடும்பத்தின் அடிப்படைத் தேவைகளைக் கூட பூர்த்தி செய்ய முடியாமல் ஆசிரியர்கள் தவித்து வருகின்றனர்.
*மறுக்கப்படும் சலுகைகள்: தற்காலிகப் பணி என்பதால் மே மாத ஊதியம் கிடையாது. பொங்கல் போனஸ், மருத்துவக் காப்பீடு, வருங்கால வைப்பு நிதி (EPF) போன்ற எந்தவொரு அடிப்படைப் பலன்களும் இவர்களுக்கு வழங்கப்படுவதில்லை.
*பாதுகாப்பற்ற எதிர்காலம்: பணிக்காலத்தில் உயிரிழக்கும் ஆசிரியர்களின் குடும்பங்களுக்கு அரசு சார்பில் எந்தவிதமான நிவாரண உதவியும் வழங்கப்படுவதில்லை. இதனால் இவர்களது குடும்பங்கள் நடுத்தெருவில் நிற்கும் அவலநிலை ஏற்பட்டுள்ளது.
முதலமைச்சருக்கு வைக்கும் கோரிக்கை
"எங்களுக்குத் தேவை காலமுறை ஊதியம் மட்டுமே. காலமுறை ஊதியம் வழங்கப்பட்டாலே அரசின் இதர சலுகைகள் அனைத்தும் தானாகவே கிடைத்துவிடும். எஞ்சிய காலத்தையாவது நாங்கள் கண்ணியமான முறையில் வாழ வழிவகை செய்ய வேண்டும்," என ஒருங்கிணைப்பாளர் உருக்கமாகக் கேட்டுக்கொண்டுள்ளார்.
பகுதிநேர ஆசிரியர்களின் பணி நிரந்தரம், பழைய ஓய்வூதியத் திட்டம் உள்ளிட்ட 10 அம்ச கோரிக்கைகளை முதலமைச்சர் ஸ்டாலின், வரும் ஜனவரி 6-ம் தேதிக்குள் அதிகாரப்பூர்வமாக அறிவிக்க வேண்டும். அவ்வாறு அறிவித்தால் அரசுக்கு எங்களது முழுமையான பாராட்டுகளைத் தெரிவிப்போம்.
போராட்ட எச்சரிக்கை
ஒருவேளை இந்த முறையும் வெறும் வாக்குறுதிகளால் எங்களை ஏமாற்ற நினைத்தால், ஜனவரி மாதம் ஜாக்டோ-ஜியோ அமைப்புடன் இணைந்து பகுதிநேர ஆசிரியர்களும் தீவிரப் போராட்டத்தில் இறங்குவோம். இது வாழ்வா சாவா போராட்டம் என்பதை அரசு உணர வேண்டும்.
வருகின்ற புத்தாண்டை 12,000 ஆசிரியர்களின் குடும்பங்களுக்கு ஒரு 'இனிப்புச் செய்தியாக' மாற்றுவது முதலமைச்சரின் கையில்தான் உள்ளது. தேர்தல் வாக்குறுதி 181-ஐ உடனடியாகச் செயல்படுத்தி, ஒரு நிஜமான விடியலை ஏற்படுத்த வேண்டும் என அந்த அறிக்கையில் வலியுறுத்தப்பட்டுள்ளது.
தலைப்பு செய்திகள்
ட்ரெண்டிங் செய்திகள்
