CBSE Syllabus: ”வரலாறுலாம் படிக்க வேண்டாம்” தூக்கி எறிந்த சிபிஎஸ்இ, பாடப்புத்தகங்களில் இணைந்த கும்பமேளா

CBSE Syllabus: முகலாய பேரரசு பற்றிய பிரிவுகளை சிபிஎஸ்இ 7ம் வகுப்பிற்கான பாடப்புத்தகங்களில் இருந்து, தேசிய கல்வி ஆராய்ச்சி மற்றும் பயிற்சி கவுன்சில் (NCERT) நீக்கியுள்ளது.

சிபிஎஸ்இ பாடப்புத்தகங்கள்

Source : social media

CBSE Syllabus: சிபிஎஸ்இ 7ம் வகுப்பிற்கான பாடப்புத்தகங்களில் இருந்து நீக்கப்பட்ட பாடப்பிரிவுகளுக்கு பதிலாக, கும்பமேளா உள்ளிட்டவை இணைக்கப்பட்டுள்ளன.

நீக்கப்பட்ட முகலாய பேரரசு:

முகலாயர்கள் மற்றும் டெல்லி சுல்தான்கள் பற்றிய அனைத்து பாடப்பிரிவுகளும் 7 ஆம் வகுப்பு NCERT பாடப்புத்தகங்களிலிருந்து நீக்கப்பட்டுள்ளன. அதே நேரத்தில் இந்திய வம்சங்கள், 'புனித புவியியல்', மகா கும்பமேளா பற்றிய குறிப்புகள், மேக் இன் இந்தியா மற்றும் பேட்டி பச்சாவ், பேட்டி பதாவோ போன்ற அரசாங்க நடவடிக்கைகள் பற்றிய அத்தியாயங்கள்புதியதாக பாடப்பிரிவில் இணைக்கப்பட்டுள்ளன. அண்மையில் வெளியான புதிய பாடப்புத்தகங்கள் புதிய தேசிய கல்விக் கொள்கை (NEP) மற்றும் பள்ளிக் கல்விக்கான தேசிய பாடத்திட்டக் கட்டமைப்பு (NCFSE) 2023 ஆகியவற்றின் அடிப்படையில் வடிவமைக்கப்பட்டுள்ளன. இது இந்திய மரபுகள், தத்துவங்கள், அறிவு அமைப்புகள் மற்றும் உள்ளூர் சூழலை பள்ளிக் கல்வியில் இணைப்பதை வலியுறுத்துகிறது.

”பார்ட் - 2 வரும்”

புதிய புத்தகங்கள் தொடர்பாக NCERT அதிகாரிகளைத் தொடர்பு கொண்டபோது, ​​இவை புத்தகத்தின் முதல் பகுதி மட்டுமே என்றும், இரண்டாம் பகுதி வரும் மாதங்களில் வெளியாகும் என்றும் தெரிவித்துள்ளனர். இருப்பினும், நீக்கப்பட்ட பாங்கள் புத்தகத்தின் இரண்டாம் பகுதியில் இடம்பெறுமா? என்பது குறித்து அவர்கள் எந்தக் கருத்தும் தெரிவிக்கவில்லை.

2022-23 ஆம் ஆண்டு கோவிட்-19 தொற்றுநோய்களின் போது பாடத்திட்ட பகுத்தறிவின் ஒரு பகுதியாக, துக்ளக்குகள், கல்ஜிகள், மம்லூக்குகள் மற்றும் லோடிகள் போன்ற வம்சங்களின் விரிவான கணக்கு மற்றும் முகலாய பேரரசர்களின் சாதனைகள் குறித்த இரண்டு பக்க அட்டவணை உள்ளிட்ட முகலாயர்கள் மற்றும் டெல்லி சுல்தான் ஆட்சி பற்றிய பிரிவுகளை NCERT குறைத்திருந்தது. இந்நிலையில் புதிய பாடப்புத்தகமானது அவர்களைப் பற்றிய அனைத்து குறிப்புகளையும் நீக்கியுள்ளது. இந்தப் புத்தகத்தில் இப்போது முகலாயர்கள் மற்றும் டெல்லி சுல்தான் பற்றி எந்தக் குறிப்பும் இல்லாமல் புதிய அத்தியாயங்கள் உள்ளன.

கும்பமேளா, ஜோதிர்லிங்கங்கள்

புதிய பாடத்திட்டத்தில்,

• "சமூகத்தை ஆராய்தல்: இந்தியா மற்றும் அதற்கு அப்பால்" என்ற சமூக அறிவியல் பாடப்புத்தகத்தில் மகதம், மௌரியர்கள், சுங்கர்கள் மற்றும் சாதவாகனர்கள் போன்ற பண்டைய இந்திய வம்சங்கள் பற்றிய புதிய அத்தியாயங்கள் "இந்திய நெறிமுறைகளை" மையமாகக் கொண்டுள்ளன.
• இந்தப் புத்தகத்தின் மற்றொரு புதிய பதிப்பான "நிலம் எவ்வாறு புனிதமாகிறது" என்ற அத்தியாயம், இஸ்லாம், கிறிஸ்தவம், யூத மதம் மற்றும் ஜோராஸ்ட்ரியனிசம், இந்து மதம், பௌத்தம் மற்றும் சீக்கியம் போன்ற மதங்களுக்கான புனிதமாகக் கருதப்படும் இடங்கள் மற்றும் இந்தியா முழுவதும் மற்றும் வெளியே உள்ள புனித யாத்திரைகளை மையமாகக் கொண்டுள்ளது.
• இந்த அத்தியாயம் "புனித புவியியல்" போன்ற கருத்துக்களை அறிமுகப்படுத்துகிறது, இது 12 ஜோதிர்லிங்கங்கள், சார் தம் யாத்திரை மற்றும் "சக்தி பீடங்கள்" போன்ற இடங்களின் வலைப்பின்னல்களை விவரிக்கிறது. இந்த அத்தியாயம் புனிதமான நதி சங்கமங்கள், மலைகள் மற்றும் காடுகள் போன்ற இடங்களையும் விவரிக்கிறது.
• இந்த உரையில், பத்ரிநாத் மற்றும் அமர்நாத் பனிக்கட்டி சிகரங்களிலிருந்து கன்னியாகுமரியின் தெற்கு முனை வரை இந்தியாவை யாத்திரை செய்யும் பூமியாக விவரித்த ஜவஹர்லால் நேருவின் மேற்கோள் அடங்கும். வர்ண-ஜாதி அமைப்பு ஆரம்பத்தில் சமூக ஸ்திரத்தன்மையை அளித்தாலும், பின்னர் அது குறிப்பாக பிரிட்டிஷ் ஆட்சியின் கீழ் கடுமையானதாக மாறியது, இதனால் சமத்துவமின்மைக்கு வழிவகுத்தது என்று பாடப்புத்தகம் கூறுகிறது.
• இந்த ஆண்டின் தொடக்கத்தில் பிரயாக்ராஜில் நடைபெற்ற மகா கும்பமேளா பற்றியும் இந்தப் புத்தகத்தில் குறிப்பிடப்பட்டுள்ளது, மேலும் அதில் சுமார் 660 மில்லியன் மக்கள் பங்கேற்றதாகவும் குறிப்பிடப்பட்டுள்ளது. அதேநேரம் 30 யாத்ரீகர்கள் இறந்த மற்றும் பலர் காயமடைந்த கூட்ட நெரிசல் பற்றி எதுவும் குறிப்பிடப்படவில்லை. இதுபோக பாஜக ஆட்சியில் கொண்டுவரப்பட்ட பல்வேறு திட்டங்களும், பாடக்குறிப்பில் இணைக்கப்பட்டுள்ளன.

எதிர்க்கட்சிகள் குற்றச்சாட்டு:

NCERT பாடப்புத்தகங்களின் மறுசீரமைப்பை எதிர்க்கட்சிகளின் கடுமையாக விமர்சித்து வருகின்றன. இந்த மறுசீரமைப்பு "காவிமயமாக்கல்" நோக்கில் மேற்கொள்ளப்பட்டுள்ளதாக குற்றம்சாட்டுகின்றன. NCERT இயக்குனர் தினேஷ் பிரசாத் சக்லானி கடந்த ஆண்டு PTI-க்கு அளித்த பேட்டியில், "கலவரங்களைப் பற்றி கற்பிப்பது இளம் குழந்தைகளை எதிர்மறை குடிமக்களாக மாற்றும்" என்று கூறியிருந்தார் என்பது குறிப்பிடத்தக்கது. அதேநேரம், வரலாற்றை படிக்காமல் வெறும் சமயங்கள் சார்ந்து படிப்பது என்ன பலன் அளிக்கும் என்பதே பலரின் கேள்வியாக உள்ளது.