சிபிஎஸ்இ புதிய மொழிக் கொள்கையால் புதுச்சேரியில் பிரெஞ்சு மொழிக்கு ஆபத்து; கொந்தளிக்கும் அரசியல் கட்சிகள்
சிபிஎஸ்இ-யின் புதிய கல்விக் கொள்கை காரணமாக, முன்னாள் பிரெஞ்சு காலனியான புதுச்சேரியில் பிரெஞ்சு மொழி கற்பித்தல் பாதிக்கப்படும் அபாயம் ஏற்பட்டுள்ளதாக கூறப்படுகிறது.
சிபிஎஸ்இ எனப்படும் மத்திய இடைநிலைக் கல்வி வாரியம் கொண்டு வந்துள்ள புதிய மும்மொழிக் கொள்கை, புதுச்சேரியின் கலாச்சார அடையாளமான பிரெஞ்சு மொழி கற்றலுக்குப் பெரும் அச்சுறுத்தலாக மாறியுள்ளதாக் கூறப்படுகிறது. இது மாணவர்கள், ஆசிரியர்கள் மற்றும் அரசியல் கட்சிகளிடையே பெரும் அதிருப்தியை ஏற்படுத்தியுள்ளது.[4]
புதிய விதிமுறை என்ன?
தேசியக் கல்விக் கொள்கை 2020-ன் கீழ், 2026-27 கல்வியாண்டு முதல் 6-ஆம் வகுப்பு முதல் மாணவர்கள் மூன்று மொழிகளைக் கற்க வேண்டும் என சிபிஎஸ்இ அறிவித்துள்ளது. இதில் இரண்டு மொழிகள் இந்திய மொழிகளாக இருக்க வேண்டும். மீதமுள்ள ஒரு மொழி வெளிநாட்டு மொழியாக இருக்கலாம். தற்போதைய கல்வி முறையில் ஆங்கிலம் ஒரு வெளிநாட்டு மொழியாகக் கருதப்படுவதால், ஆங்கிலத்தைத் தவிர்த்து மற்றொரு வெளிநாட்டு மொழியான பிரெஞ்சு மொழியைப் பாடமாகத் தேர்வு செய்ய முடியாத நிலை ஏற்பட்டுள்ளது. 2030ஆம் ஆண்டு முதல் பிரெஞ்சு மொழி முழுமையாக நீக்கப்படும் அபாயம் உருவாகி உள்ளது.
புதுச்சேரியின் வரலாற்றுப் பின்னணி
புதுச்சேரி ஒரு முன்னாள் பிரெஞ்சு காலனி என்பதால், அங்கு பிரெஞ்சு மொழி என்பது வெறும் பாடமாக மட்டுமல்லாமல், மக்களின் வாழ்வியலோடும் கலாச்சாரத்தோடும் பின்னிப் பிணைந்துள்ளது. 1956-ஆம் ஆண்டு இந்தியா மற்றும் பிரான்ஸ் இடையே கையெழுத்தான அதிகார மாற்ற ஒப்பந்தத்தின்படி புதுச்சேரியில் பிரெஞ்சு மொழியின் முக்கியத்துவத்தைப் பாதுகாக்க உறுதி அளிக்கப்பட்டிருந்தது. சிபிஎஸ்இ-ன் இந்த புதிய நடவடிக்கை அந்த ஒப்பந்தத்தை மீறுவதாகப் பலரும் குற்றம் சாட்டுகின்றனர்.
என்னென்ன பாதிப்புகள்?
மாணவர்களுக்கு: 1 முதல் 5ஆம் வகுப்பு வரை பிரெஞ்சு மொழியைப் படித்த மாணவர்கள், 6ஆம் வகுப்பில் திடீரென அந்த மொழியைத் தொடர முடியாத நிலை ஏற்பட்டுள்ளது. இதனால் அவர்களின் கல்வித் தொடர்ச்சி பாதிக்கப்படும்.
ஆசிரியர்களுக்கு: புதுச்சேரி முழுவதும் சுமார் 250 பிரெஞ்சு மொழி ஆசிரியர்கள் உள்ளனர். பிரெஞ்சு மொழி பாடத்திட்டத்திலிருந்து நீக்கப்பட்டால் இவர்களின் வாழ்வாதாரம் கேள்விக் குறியாகும்.
அரசியல் கட்சிகள் எதிர்ப்பு
இதற்கு திமுக, காங்கிரஸ் மற்றும் அதிமுக உள்ளிட்ட கட்சிகள் கடும் எதிர்ப்பு தெரிவித்துள்ளன. இது 'இந்தி திணிப்பு' என்றும், புதுச்சேரியின் தனித்துவமான அடையாளத்தை அழிக்கும் முயற்சி என்றும் திமுக தலைவர் மு.க.ஸ்டாலின் மற்றும் புதுச்சேரி எதிர்க்கட்சித் தலைவர் ஆர்.சிவா ஆகியோர் கண்டனம் தெரிவித்துள்ளனர். அதிமுக, காங்கிரஸ் கட்சிகளும் எதிர்ப்பு தெரிவித்து வருகின்றன.
இந்த விவகாரத்தில் மத்திய அரசு தலையிட்டு, புதுச்சேரியின் சிறப்புச் சூழலைக் கருத்தில் கொண்டு பிரெஞ்சு மொழியைத் தொடர்ந்து கற்பிக்க அனுமதி அளிக்க வேண்டும் என்ற கோரிக்கை வலுத்து வருகிறது.
தலைப்பு செய்திகள்
ட்ரெண்டிங் செய்திகள்
