Vanni Arasu Slams DMK :”எலும்பு எல்லாருக்கும் இருக்குஞாபகம் வச்சுக்கோங்க” இறங்கி அடித்த வன்னி அரசு

திமுக எம்.எல்.ஏ மார்க்கண்டேயன் சட்டமன்றத்தில் முதலமைச்சர் விஜய்யின் எலும்பை உடைப்பேன் என  மிரட்டல் விடுத்த சம்பவம் பேசுபொருளாகியிருக்கும் நிலையில், விசிக அமைச்சர் வன்னி அரசு "எலும்புகள் எல்லோருக்கும் உண்டு" என பதிலடி கொடுத்துள்ளார்.

கோவில்பட்டியில் நேற்று முன்தினம் இரவு வாக்காளர்களுக்கு நன்றி தெரிவிக்கும் திமுக பொதுக்கூட்டம் நடைபெற்றது.

இந்தக் கூட்டத்தில் பேசிய விளாத்திகுளம் திமுக MLA மார்க்கண்டேயன், முதலமைச்சர் விஜய்யை அவதூறாக விமர்சித்து, "சட்டமன்றத்தில் எலும்பை உடைப்பேன்" என மிரட்டல் விடுத்தும் பேசினார்.

இதனைத் தொடர்ந்து தவெக-வினர் மார்க்கண்டேயன் மீது அளித்த புகாரின் அடிப்படையில் FIR பதிவுசெய்த போலீஸார், இன்று காலை மார்க்கண்டேயனை அவரில் வீட்டில் வைத்தே கைதுசெய்தனர்.

இந்த நடவடிக்கைக்கு எதிராக திமுக தலைவர் ஸ்டாலின், எம்.பி கனிமொழி ஆகியோர் தவெக அரசுக்கு கடும் கண்டனம் தெரிவித்துள்ளனர்.

இந்த நிலையில், விசிக அமைச்சர் வன்னி அரசு, மார்க்கண்டேயன் பேச்சுக்கு கண்டனம் தெரிவித்து எக்ஸ் தளத்தில் பதிவிட்டுள்ளார்.

அந்தப் பதிவில், "சட்டமன்றத்துக்குள் வைத்து தமிழ்நாட்டின் முதலமைச்சர் ஜோசப் விஜய்யின் எலும்புகளை உடைப்பேன்” என்று வன்முறையை தூண்டும் வகையில் விளாத்திகுளம் திமுக சட்டமன்ற உறுப்பினர் மார்க்கண்டேயன் பேசியுள்ளார்.

ஏற்கனவே முன்னாள் அமைச்சரும் திருச்செந்தூர் திமுக சட்டமன்ற உறுப்பினருமான அனிதா ராதாகிருஷ்ணன் தொடர்ந்து தமிழ்நாட்டின் முதலமைச்சர் குறித்து அவதூறாகவும், ஆபாசமாகவும் பேசுவதை வாடிக்கையாக வைத்துள்ளார். இவர்கள் மட்டுமல்ல பலரும் மிக மோசமான தாக்குதலை தொடுத்து வருகின்றனர்.

மக்களுக்காக சேவையாற்றும் தளமாக அரசியல் களத்தை பார்க்காமல், ஆட்சி அதிகாரத்தை தனிநபர் வளர்ச்சிக்கான வாய்ப்பாக கருதி வந்ததால், தோல்வியின் விரக்தியில் இவ்வாறு அநாகரிகமாக செயல்பட்டு வருகின்றனர். இத்தகைய போக்கு கடும் கண்டனத்திற்குரியது.

சட்டமன்றத்துக்குள் முதலமைச்சருக்கு எதிராக வன்முறையில் ஈடுபடுவோம் என்று மார்க்கண்டேயன் பேசியுள்ள நிலையில், அவர் மீது சட்டப்பேரவை தலைவர் உரிய நடவடிக்கையை எடுக்க வேண்டும் என்று வலியுறுத்துகிறோம். எலும்புகள் எல்லோருக்கும் உண்டு என்பதை தான்  நினைவுபடுத்த விரும்புகிறோம்" என்று வன்னி குறிப்பிட்டுள்ளார்.