’’நானே பொறுப்பு; சிபிஎஸ்இ ஆன்ஸ்கிரீன் மதிப்பீட்டில் பிழைகள் சரிசெய்யப்படும்’’ உறுதியளித்த கல்வி அமைச்சர்
புதிய மதிப்பீட்டு முறையில் எழுந்துள்ள புகார்கள் அனைத்தும் எங்கள் நேரடி கவனத்திற்கு வந்துள்ளன. அவற்றுக்கு நான் பொறுப்பேற்கிறேன்- அமைச்சர் தர்மேந்திர பிரதான்.
சிபிஎஸ்இ-யின் ஆன்ஸ்கிரீன் மதிப்பீட்டு முறை மாணவர் நலன் சார்ந்தது, அதிலுள்ள பிழைகள் சரிசெய்யப்படும் என்று மத்தியக் கல்வி அமைச்சர் தர்மேந்திர பிரதான் உறுதி அளித்துள்ளார்.
சிபிஎஸ்இ எனப்படும் மத்திய இடைநிலைக் கல்வி வாரியம் சமீபத்தில் அறிமுகப்படுத்திய ஆன்ஸ்கிரீன் மதிப்பீட்டு முறையில் ஏதேனும் குறைபாடுகள் இருந்தால் அவை உடனடியாகச் சரிசெய்யப்படும் என்று மத்தியக் கல்வித்துறை அமைச்சர் தர்மேந்திர பிரதான் உறுதியளித்துள்ளார். இந்த நவீன மதிப்பீட்டு முறையானது முழுமையாக மாணவர்களின் நலனை மட்டுமே மையமாகக் கொண்டு மிகவும் கவனமாக உருவாக்கப்பட்டுள்ளதாகவும் அவர் தெரிவித்துள்ளார்.
சிபிஎஸ்இ பொதுத்தேர்வு விடைத்தாள்களைத் திருத்தும் பணிகளை விரைவுபடுத்தவும், அதில் வெளிப்படைத் தன்மையைக் கொண்டுவரவும் ஆன்ஸ்கிரீன் மதிப்பீட்டு முறை என்ற புதிய தொழில்நுட்பம் (OSM) நடைமுறைப்படுத்தப்பட்டது.
கணினி வழியாகவே மதிப்பீடு
இந்தத் திட்டத்தின்படி, மாணவர்களின் விடைத்தாள்கள் ஸ்கேன் செய்யப்பட்டு, கணினித் திரை வழியாகவே ஆசிரியர்களால் திருத்தப்படும். இதன் மூலம் விடைத்தாள்கள் தொலைந்து போவது அல்லது மதிப்பெண்களைக் கூட்டுவதில் ஏற்படும் மனிதத் தவறுகள் பெருமளவு குறைக்கப்படும் என அதிகாரிகளால் பெரிதும் எதிர்பார்க்கப்பட்டது.
இருப்பினும், இந்த புதிய மதிப்பீட்டு முறையில் சில பிழைகள் மற்றும் தொழில்நுட்பக் கோளாறுகள் இருப்பதாகத் தொடர்ந்து பல புகார்கள் எழுந்தன. குறிப்பாக, மதிப்பெண்கள் வழங்குவதில் குளறுபடிகள் நடந்துள்ளதாக மாணவர்கள் மற்றும் பெற்றோர்கள் தரப்பில் புகார் தெரிவிக்கப்பட்டது.
நான் பொறுப்பு
இது குறித்து இன்று செய்தியாளர்களிடம் பேசிய மத்தியக் கல்வி அமைச்சர் தர்மேந்திர பிரதான், "மாணவர்களின் எதிர்கால நலனைக் கருத்தில் கொண்டே இந்தத் திட்டம் அரசால் கொண்டுவரப்பட்டுள்ளது. இதில் எழுந்துள்ள நியாயமான புகார்கள் அனைத்தும் எங்கள் நேரடி கவனத்திற்கு வந்துள்ளன. அவற்றுக்கு நான் பொறுப்பேற்கிறேன்.
இந்தத் தொழில்நுட்ப முறையில் உள்ள சிறுசிறு பிழைகள் மற்றும் குறைபாடுகள் யாவும் கூடிய விரைவில் முழுமையாகக் கண்டறியப்பட்டு, அவை உடனடியாகச் சரிசெய்யப்படும். எந்தவொரு மாணவரின் கேள்வியும் சந்தேகமும் தீர்க்கப்படாமல் போகாது.
எவ்வித சமரசமும் கிடையாது
மதிப்பீட்டுச் செயல்பாடுகளில் எவ்வித சமரசமும் செய்து கொள்ளப்பட மாட்டாது. விடைத்தாள் திருத்தும் முக்கியமான பணிகளில் ஈடுபடும் ஆசிரியர்களுக்குத் தேவையான அனைத்து தொழில்நுட்ப உதவிகளும், உரிய பயிற்சிகளும் தொடர்ந்து வழங்கப்படும்.
மாணவர்கள், மற்றும் பெற்றோர்கள் இந்த விவகாரம் குறித்துச் சிறிதும் அச்சப்படத் தேவையில்லை’’ என்று மத்தியக் கல்வி அமைச்சர் தர்மேந்திர பிரதான் தெரிவித்துள்ளார்.
அரசின் இந்த நடவடிக்கையால் மதிப்பீட்டில் உள்ள குளறுபடிகள் நீங்குமா என்று எதிர்பார்ப்பு எழுந்துள்ளது.
தலைப்பு செய்திகள்
ட்ரெண்டிங் செய்திகள்
