சீர்காழியில் நேற்று 12 கடை, இன்று ஒரு கடை....தொடரும் திருட்டு - பொதுமக்கள் பீதி

சீர்காழியில் பட்டப் பகலில் டிரேடர்ஸ் கடையில் கல்லாப்பெட்டியில் வைத்திருந்த பணத்தை திருடி சென்ற  டிப். டாப் இளைஞர் காவல்துறையினர் தேடிவருகின்றனர்.

திருட்டு நடந்த பகுதி

மயிலாடுதுறை மாவட்டம் சீர்காழி காவல் சரகத்திற்கு உட்பட்ட பகுதிகளில் கடந்த சில நாட்களாகவே வீட்டு வாசலில் நிறுத்தி வைத்திருந்த காரின் டயர் திருட்டு, கொலை, கொலை முயற்சி, கொள்ளை சம்பவங்கள் தொடர்ந்து அரங்கேறி வருகிறது.  தினம் தோறும் ஏதேனும் ஒரு குற்ற செயல்கள் நடைபெறுவது  தொடர்ந்து அதிகரித்து வருகிறது. அதேபோல நேற்று சீர்காழியில் முக்கிய கடைவீதியில் 12 கடைகளை கதவை உடைத்து அடையாளம் தெரியாத நபர் திருடி சென்ற சம்பவம் அரங்கேறிய நிலையில் அந்த குற்றவாளிகளை பிடிக்க காவல்துறையினர் திணறி வருகின்ற சூழலில், இன்றும் பட்டப் பகலில் கடை ஒன்றில் இளைஞர் ஒருவர் 20000 ரூபாய் பணத்தை திருடி சென்றுள்ள சம்பவம் மேலும் பொது மக்களை பீதியடைய செய்துள்ளது. இதனால் சீர்காழி பகுதி பொதுமக்கள் தங்கள்  தூக்கத்தை துளைத்தல் மிகுந்த அச்சத்திற்கு ஆளாகியுள்ளனர்.

மயிலாடுதுறை மாவட்டம் சீர்காழி விளந்திடசமுத்திரம் பகுதியை சேர்ந்தவர் 61 வயதான சேகர். இவர் சிதம்பரம் - சீர்காழி பிரதான சாலையில் இரும்பு கம்பி, சிமெண்ட் விற்பனை செய்யும் டிரேடர்ஸ் கடை வைத்து நடத்தி வருகிறார். இந்நிலையில் இன்று இவர் கடைக்கு பிளாஸ்டிக் பைப் வாங்குவது போல் ஒரு டிப்டாப் இளைஞர் வந்துள்ளார். தொடர்ந்து அங்குள்ள பொருட்களின் விலையை கேட்டு கடையில் அமர்ந்து உள்ளார். அப்போது சேகர் மற்றொரு நபருக்கு வியாபாரம் செய்துள்ளார். மேலும் விற்பனை செய்த 20 ஆயிரம்  ரூபாயை கல்லா பெட்டியில்  வைத்துவிட்டு, சிமெண்டு மூட்டைகளை  வாகனத்தில் ஏற்றி விட  சென்றுள்ளார்.  

அப்போது பொருள் வாங்குவது போல் கடையில் அமர்ந்திருந்த டிப்டாப் இளைஞர் கல்லாப்பெட்டியில் வைத்திருந்த ரூபாய் 20 ஆயிரத்தை திருடிக் கொண்டு, தான் வந்த விலை உயர்ந்த இருசக்கர வாகனத்தில் தப்பிச் சென்றுள்ளார்.  தொடர்ந்து சேகர் சிமெண்ட் மூட்டைகளை எடுத்துக் கொடுத்துவிட்டு கடைக்கு வந்தபோது அந்த டிப் டாப் இளைஞரை காணவில்லை. உள்ளே சென்று பார்த்தபோது கல்லாப்பெட்டி திறந்து கிடந்துள்ளது.  அதிலிருந்து பணம் இல்லாததை  கண்டு அதிர்ச்சி அடைந்துள்ளார். தொடர்ந்து இது குறித்து சீர்காழி காவல்நிலையத்திற்கு தகவல் அளிக்க அங்கு  விரைந்து வந்த சீர்காழி காவல்துறையினர் கடையில் சிசிடிவி பதிவுகளை கொண்டு திருடிச்சென்ற இளைஞர் குறித்து விசாரணை நடத்தி வருகின்றனர்.