3 மாதங்களுக்கு முன்பு நடந்த சம்பவத்தால்... காதலன் வீட்டில் காதலி தூக்கிட்டு தற்கொலை!

கள்ளக்குறிச்சி: ரிஷிவந்தியம் அருகே காதலன் வீட்டில் காதலி தூக்குப்போட்டு தற்கொலை செய்து கொண்டார்.

ரிஷிவந்தியம் அருகே காதலன் வீட்டில் காதலி தூக்குப்போட்டு தற்கொலை

கள்ளக்குறிச்சி மாவட்டம் ரிஷிவந்தியம் அருகே உள்ள பழைய சிறுவங்கூர் கிராமத்தை சேர்ந்தவர் அய்யாதுரை மகள் சுதா (வயது 24). பட்டதாரியான இவரும், நூரோலை கிராமத்தை சேர்ந்த சீனிவாசன் மகன் ஆகாஷ் என்பவரும் பள்ளி பருவத்தில் இருந்தே பழகி, காதலித்து வந்தனர். இந்த நிலையில் கடந்த 3 மாதங்களுக்கு முன்பு ஆகாஷ் தனது வீட்டில் தூக்குப்போட்டு தற்கொலை செய்து கொண்டார். இதைக் கேட்டு அதிர்ச்சி அடைந்த சுதா, தனது காதலன் இறந்த துக்கம் தாங்காமல் வீட்டை விட்டு வெளியே எங்கும் செல்லாமல் மன வேதனையில் இருந்து வந்தார்.

இதற்கிடையே சுதாவின் எதிர்காலத்தை மனதில் வைத்துக் கொண்டு அவருக்கு திருமணம் செய்து வைக்க அவரது பெற்றோர் முடிவு செய்தனர். அதன் பேரில் அவருக்கு மாப்பிள்ளை பார்க்கும் படலத்தை தொடங்கியதாக தெரிகிறது. இதை அறிந்து கொண்ட சுதா, தனது காதலன் வீட்டிலேயே தங்கப் போவதாக பெற்றோரிடம் கூறிவிட்டு ஆகாஷ் வீட்டுக்கு சென்று அங்கேயே தங்கி இருந்தார். இந்த நிலையில் சம்பவத்தன்று காதலன் வீட்டில் இருந்த சுதா திடீரென தூக்குப்போட்டு தற்கொலைக்கு முயன்றார்.

இதைப்பார்த்த அக்கம் பக்கத்தினர் அவரை மீட்டு சிகிச்சைக்காக கள்ளக்குறிச்சி அரசு மருத்துவமனையில் சேர்த்தனர். பின்னர் அங்கிருந்து சுதாவை மேல் சிகிச்சைக்காக சேலம் அரசு ஆஸ்பத்திரியில் சேர்த்தனர். அங்கு சிகிச்சை பலன் இன்றி அவர் பரிதாபமாக இறந்தார். இது குறித்து ரிஷிவந்தியம் போலீசார் வழக்குப்பதிவு செய்து விசாரணை நடத்தி வருகிறார்கள். பெற்றோர் மாப்பிள்ளை பார்க்க தொடங்கியதால் விரக்தி அடைந்து இறந்த காதலன் வீட்டிலேயே இளம்பெண் தூக்குப்போட்டு தற்கொலை செய்து கொண்ட சம்பவம் பெரும் சோகத்தை ஏற்படுத்தி உள்ளது.

வாழ்க்கையில் கவலைகளும், துன்பங்களும் வந்துகொண்டுதான் இருக்கும். அவைகளை தற்காலிகமாக்குவதும், நிரந்தரமாக்குவதும் நாம் கையாளும் விதத்தில் தான் உள்ளது. தற்கொலை என்பது எதற்கும் தீர்வு ஆகாது. வாழ்க்கைக்கான நோக்கத்தைப் பற்றிய தெளிவும் அதை அடைவதற்கான வழிகளையும் கண்டறிய துவங்கினால் வாழ்க்கை சுவாரஸ்யமானதாக இருக்கும். அப்படி தங்களுக்கு மன அழுத்தம் ஏற்பட்டாலோ தற்கொலை எண்ணம் உண்டானாலும் அதனை மாற்ற கீழ்காணும் எங்களுக்கு அழைக்கவும். மாநில உதவி மையம் :104.

சினேகா தன்னார்வ தொண்டு நிறுவனம்,
எண்; 11, பார்க் வியூவ் சாலை, ஆர்.ஏ. புரம்,
சென்னை - 600 028.
தொலைபேசி எண் - (+91 44 2464 0050, +91 44 2464 0060).

 

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூட்யூபில் வீடியோக்களை காண