பட்டப்பகலில் கார் கண்ணாடியை உடைத்து ரூ.3 லட்சம் கொள்ளை

சுங்குவார்சத்திரத்தில் பட்டப்பகலில் கார் கண்ணாடியை உடைத்து மர்மநபர்கள் ரூபாய் 3 லட்சத்தை கொள்ளையடித்து சென்றனர். இந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.

கொள்ளையடிக்கப்பட்ட_கார்

காஞ்சிபுரம் மாவட்டம் சுங்குவார்சத்திரம் அடுத்த கோவளவேடு பகுதியை சேர்ந்தவர் தினேஷ். இவர் தனியார் நிறுவனங்களுக்கு ஒப்பந்த அடிப்படையில் தொழிலாளர்களை பணிக்கு அனுப்பும் தொழில் செய்து வருகிறார். இந்த நிலையில், தினேஷ் ஜி.எஸ்.டி. வரி செலுத்துவதற்காக சுங்குவார்சத்திரம் பகுதியில் இயங்கி வரும் இந்தியன் வங்கிக் கிளையில் இருந்து ரூபாய் 3 லட்சம் எடுத்துக்கொண்டு ஸ்ரீபெரும்புதூர் - சென்னை நெடுஞ்சாலையில் உள்ள சுமதி திரையரங்கம் அருகே உள்ள தனது ஆடிட்டர் அலுவலகத்துக்கு செல்வதற்காக காரில் சென்றுள்ளார்.

அப்போது, காரை சாலையோரம் நிறுத்திவிட்டு அருகில் உள்ள டீக்கடைக்கு சென்றுள்ளார். பின்னர், திரும்பி வந்து பார்க்கும்போது காரின் பக்கவாட்டு கண்ணாடி உடைக்கப்பட்டதை கண்டு அதிர்ச்சியடைந்தார். பதறிய தினேஷ் காரின் உள்ளே பார்த்தபோது, காரின் உள்ளே வைத்திருந்த ரூபாய் 3 லட்சம் கொள்ளை அடிக்கப்பட்டதை கண்டு அதிர்ச்சியடைந்தார். 

இதையடுத்து, இந்த கொள்ளை சம்பவம் தொடர்பாக ஸ்ரீபெரும்புதூர் காவல் நிலையத்தில் தினேஷ் புகார் அளித்தார். அவர் அளித்த புகாரின் பேரில், போலீசார் அப்பகுதியில் உள்ள சி.சி.டி.வி. காட்சிகளை ஆய்வு செய்து விசாரணை மேற்கொண்டு வருகின்றனர். அதிக மக்கள் நடமாட்டம் உள்ள பகுதியில் பட்டப்பகலில் நடைபெற்ற இந்த கொள்ளைச் சம்பவம் பொதுமக்கள் மத்தியில் மிகுந்த அதிர்ச்சியை ஏற்படுத்தியுள்ளது.