Highest Mileage Cars: விக்டோரிஸ், ஹைரைடர் 28KM, செலெரியோ 26KM உண்மையா? மைலேஜ், விலை விவரங்கள்
Highest ARAI Mileage Cars: இந்திய ஆட்டோமொபைல் சந்தையில் ARAI சான்றிதழ் அடிப்படையில் அதிக மைலேஜை கோரும் கார் மாடல்களின், நிஜ உலக திறன் குறித்து இந்த தொகுப்பில் அறியலாம்.
Highest ARAI Mileage Cars: ARAI சான்றிதழ் அடிப்படையில் அதிக மைலேஜை கோரும் கார் மாடல்களின், நிஜ உலக செயல்திறன் கீழே பட்டியலிடப்பட்டுள்ளது.
அதிக மைலேஜ் தரும் கார்கள்:
இந்திய ஆட்டோமொபைல் சந்தையில் கார் வாங்குபவர்களிடையே, எரிபொருள் செயல்திறன் என்பது முக்கியமான அம்சமாக பரிசீலிக்கப்படுகிறது. இந்திய தானியங்கி ஆராய்ச்சி சங்கம் எனப்படும் ARAI தரப்பில் வழங்கப்படும் சான்றிதழ் அடிப்படையில், காரின் மைலேஜ் மதிப்பிடப்படுகிறது. இதில் கிடைக்கும் எண்ணிக்கையானது நிஜ உலக பயன்பாட்டில் ஒத்துப்போவதில்லை என்றாலும், காரின் செயல்திறனை கணிக்கவும் மற்றும் மற்ற மாடல்களுடன் ஒப்பிடுவதற்கு பயனுள்ளதாக அமைகிறது. அந்த வகையில் ARAI சான்றிதழ் அடிப்படையில் இந்திய சந்தையில் அதிக மைலேஜ் தரும் டாப் 5 கார்கள் கீழே பட்டியலிடப்பட்டுள்ளன. இந்த சான்றிதழ்க்கான சோதனைகள் ஒரு லிட்டருக்கு எத்தனை கிலோ மீட்டர் என கணக்கிடப்படுவதால், பெட்ரோல், டீசல் மற்றும் ஹைப்ரிட் ஆப்ஷன்கள் மட்டுமே கீழே பட்டியலிடப்பட்டுள்ளன.
ARAI மைலேஜ் - டாப் 5 கார்கள்:
5. மாருதி ஸ்விஃப்ட்
மாருதி ஸ்விஃப்ட் கார் மாடலானது 1.2 லிட்டர் 3 சிலிண்டர் Z சீரிஸ் பெட்ரோல் இன்ஜினை பயன்படுத்துகிறது. இதே இன்ஜினை பயன்படுத்தும் காம்பேக்ட் செடான் ஆன டிசையரை காட்டிலும் 35 கிலோ குறைந்த எடையை கொண்டுள்ளது. இதன் காரணமாக ARAI சான்றிதழ் அடிப்படையில் ஆட்டோமேடிக் வேரியண்டில் லிட்டருக்கு 25.75 கிலோ மீட்டரும், மேனுவல் வேரியண்டிற்கு 24.8 கிலோ மீட்டரும் மைலேஜ் வழங்குகிறது. இதே பாணியில் டிசையர் ஆனது முறையே 25.71 மற்றும் 24.79 கிலோ மீட்டர் மைலேஜ் வழங்குகிறது. அதேநேரம், நிஜ உலக பயன்பாட்டில் ஸ்விஃப்டானது மேனுவல் வேரியண்டில் 14 முதல் 17 கிலோ மீட்டரும், ஆட்டோமேடிக் வேரியண்டில் 12.7 முதல் 15 கிலோ மீட்டரும் மட்டுமே மைலேஜ் வழங்குவதாக பயனர்கள் தெரிவிக்கின்றனர்.
விலை வரம்பு: ரூ.5.79 - ரூ.8.65 லட்சம்
4. மாருதி செலேரியோ
அதிக மைலேஜ் தரும் பெட்ரோல் கார் மாடல்களில் ஸ்விஃப்டை பின்னுக்குதள்ளி செலேரியோ நான்காவது இடத்தை பிடித்துள்ளது. 1.0 லிட்டர் 3 சிலிண்டர் பெட்ரோல் இன்ஜின் ஆனது, மேனுவல் மற்றும் ஆட்டோமேடட் மேனுவல் கியர்பாக்ஸ் ஆப்ஷன்களில் கிடைக்கிறது. ARAI சான்றிதழ் அடிப்படையில் மேனுவல் வேரியண்டில் லிட்டருக்கு 25.24 கிலோ மீட்டரும், ஆட்டோமேடட் மேனுவல் வேரியண்டிற்கு 26 கிலோ மீட்டரும் மைலேஜ் வழங்கும் என கூறப்படுகிறது. அதேநேரம் நிஜ உலக பயன்பாட்டில் முறையே 14.5-26 கிலோ மீட்டர் மற்றும் 18 முதல் 25 கிலோ மீட்டர் மைலேஜ் வழங்குவதாக பயனர்கள் தெரிவிக்கின்றனர்.
விலை வரம்பு: ரூ.4.70 - ரூ.6.73 லட்சம்
3. ஹோண்டா சிட்டி e:HEV
இந்திய ஆட்டோமொபைல் சந்தையில் அதிக மைலேஜ் தரும் செடான் மாடலாக ஹோண்டா சிட்டியின் ஹைப்ரிட் எடிஷன் உள்ளது. இது 27.26 கிலோ மீட்டர் மைலேஜ் வழங்கும் என கூறப்படுகிறது. இதற்காக 1.5 லிட்டர் அட்கின்சன் சைக்கிள் பெட்ரோல் இன்ஜின் ஆனது, நிலையான மேக்னெட் சிங்க்ரோனஸ் மோட்டார் உடன் இணைக்கப்பட்டுள்ளது. ஆனால், நிஜ உலக பயன்பாட்டில் 20 முதல் 24 கிலோ மீட்டர் மைலேஜ் வழங்குவதாக பயனர்கள் தரப்பில் தெரிவிக்கப்பட்டுள்ளது.
விலை வரம்பு: ரூ.20 லட்சம்
2. டொயோட்டா ஹைரைடர்/ மாருதி க்ராண்ட் விட்டாரா
டொயோட்டா ஹைரைடர் மற்றும் மாருதி க்ராண்ட் விட்டாரா ஆகிய இரண்டு மாடல்களுமே, ARAI சான்றிதழ் அடிப்படையில் அதிக மைலேஜ் தரும் கார் மாடல்களின் பட்டியலில் இரண்டாவது இடத்தில் உள்ளன. அதன்படி, இதில் இடம்பெற்றுள்ள 1.5 லிட்டர் அட்கின்சன் சைக்கிள் பெட்ரோல் இன்ஜின் ஆனது, லிட்டருக்கு 27.97 கிலோ மீட்டர் மைலேஜ் வழங்குவதாக தெரிவிக்கப்பட்டுள்ளது. ஆனால், நிஜ உலக பயன்பாட்டில் 18 முதல் 24 கிலோ மீட்டர் மைலேஜ் மட்டுமே வழங்குவதாக பயனர்களின் கருத்துகள் தெரிவிக்கின்றன.
ஹைரைடர் விலை வரம்பு: ரூ.16.72 - ரூ.20.19 லட்சம்
க்ராண்ட் விட்டாரா விலை வரம்பு: ரூ.16.63 - ரூ.19.57 லட்சம்
1. மாருதி விக்டோரிஸ்
மாருதியின் இரண்டாவது மிட்-சைஸ் எஸ்யுவி ஆன விக்டோரிஸ், க்ராண்ட் விட்டாரா மற்றும் ஹைரைடரில் இடம்பெற்றுள்ள அதே பெட்ரோல் ஹைப்ரிட் இன்ஜினை பயன்படுத்துகிறது. மேற்குறிப்பிடப்பட்ட மாடல்களுக்கு நிகரான மொத்த எடையை கொண்டிருந்தாலும், விக்டோரிஸ் கூடுதல் எரிபொருள் செயல்திறனை கொண்டுள்ளது. இதன் மூலம் அதிக மைலேஜ் தரும் கார் மற்றும் அதிக மைலேஜ் தரும் எஸ்யுவி என பாராட்டப்படுகிறது. ARAI தரவுகளின்படி, லிட்டருக்கு 28.65 கிலோ மீட்டர் மைலேஜ் வழங்குவதாக கூறப்படுகிறது. ஆனால், நிஜ உலக பயன்பாட்டில் 28 கிலோ மீட்டர் மைலேஜ் வரை வழங்கப்படுகிறது.
விலை வரம்பு: ரூ.16.38 - ரூ.19.99 லட்சம்
தலைப்பு செய்திகள்
ட்ரெண்டிங் செய்திகள்
