Sani Peyarchi 2023 : சனிப்பெயர்ச்சி 2023 : மேஷம், ரிஷப ராசி நேயர்களுக்கு பலன்கள் எப்படி இருக்கும்?

Sani Peyarchi 2023 to 2026 Mesham, Rishabam: 2023ஆம் ஆண்டு பங்குனி 15ஆம் நாளான மார்ச் மாதம் 29ஆம் தேதி வாக்கிய பஞ்சாங்கப்படியும் சனிபகவான் மகர ராசியிலிருந்து கும்ப ராசிக்கு பெயர்ச்சி அடையப் போகிறார்.

மேஷ, ரிஷப ராசிக்கான பலன்கள்

வரும் சுபகிருது ஆண்டு திருக்கணித பஞ்சாங்கத்தின்படி தை 3ஆம் தேதி அதாவது 2023ஆம் ஆண்டு ஜனவரி 17ஆம் தேதி மாலை 6.04 மணிக்கு சனி பகவான் மகர ராசியிலிருந்து கும்ப ராசிக்கு இடம் பெயர்கிறார். அதே போல் 2023ஆம் ஆண்டு பங்குனி மாதம் 15ஆம் நாளான மார்ச் மாதம் 29ஆம் தேதி வாக்கிய பஞ்சாங்கப்படியும் சனிபகவான் மகர ராசியிலிருந்து கும்ப ராசிக்கு பெயர்ச்சி அடையப் போகிறார்.

சூரிய பகவானின் புத்திரரான சனி பகவான் நம் வாழ்வில் நாம் செய்யும் நற்செயல்கள், தீய செயல்களுக்கு ஏற்றார் போல் நன்மை தீமைகளை வழங்கக்கூடியவர். சனியானவர் கும்ப ராசியான தனது ஆட்சி வீட்டில் நின்று தான் நின்ற நிலைக்கு ஏற்ப பல சுபச்செயல்களை இனி வருகின்ற இரண்டரை ஆண்டுகள் அளிக்கவுள்ளார்.

சனி தான் நின்ற ராசியிலிருந்து, மூன்றாம் பார்வையாக மேஷ ராசியான ஜென்ம ராசியையும், ஏழாம் பார்வையாக சிம்ம ராசியான புத்திர ஸ்தானத்தையும், பத்தாம் பார்வையாக விருச்சிக ராசியான அஷ்டம ஸ்தானத்தையும் பார்வையிட இருக்கின்றார்.

அந்த வகையில் முதல் இரண்டு ராசிகளான மேஷம், ரிஷப ராசிகளுக்கான சனிப்பெயர்ச்சி பலன்களை கீழே விரிவாகக் காணலாம். 

மேஷம்

மேஷ ராசிக்கு பத்தாம் இடத்தில் இருந்துவந்த சனிபகவான் பதினொன்றாம் இடமான லாப ஸ்தானத்திற்கு பெயர்ச்சி அடைய இருக்கின்றார்.

சனி தன்னுடைய மூன்றாம் பார்வையாக ஜென்ம ராசியை பார்ப்பதினால் செயல்பாடுகளில் அனுபவ அறிவு வெளிப்படும். பலதரப்பட்ட சிந்தனைகளில் இருந்து விடுதலை பெறுவீர்கள். தற்பெருமை தொடர்பான சிந்தனைகளை குறைத்துக் கொள்வது நல்லது. சிகை அலங்காரத்தில் ஆர்வமின்மை உண்டாகும். பலதரப்பட்ட மக்களின் எண்ணங்களை புரிந்து செயல்படுவீர்கள்.

சனி தன்னுடைய ஏழாம் பார்வையாக சிம்ம ராசியான புத்திர ஸ்தானத்தை பார்ப்பதினால் மனதில் இனம் புரியாத புதுவிதமான சிந்தனைகளும் ஆசைகளும் உண்டாகும். கடன் தொடர்பான பிரச்சனைகள் கட்டுப்பாட்டுக்குள் வரும். எளிமையான சில பணிகளை கூட கடுமையாக செய்து முடிப்பதற்கான சூழ்நிலைகள் உண்டாகும். நீண்ட நாள் பிரச்சனைகளுக்கு தீர்வு கிடைக்கும். உடனிருப்பவர்கள் பற்றிய புரிதல்கள் மேம்படும். சுபகாரியம் தொடர்பான விஷயங்கள் கைகூடும்.

சனி தன்னுடைய பத்தாம் பார்வையாக விருச்சிக ராசியான அஷ்டம ஸ்தானத்தை பார்ப்பதினால் நண்பர்களிடம் அனுசரித்துச் செல்வதன் மூலம் சாதகமான வாய்ப்புகள் கிடைக்கும். மற்றவர்களின் பணத்தை கையாளுவதில் சிந்தித்து முடிவு எடுக்கவும். ஓய்வூதியம் தொடர்பான செயல்பாடுகளில் பொறுமையுடன் செயல்படவும். இன்சூரன்ஸ் தொடர்பான கோப்புகளில் கவனம் வேண்டும். பழைய வீடுகளை பழுது பார்ப்பது தொடர்பான முயற்சிகள் கைகூடும். 

சனி ராசிக்கு பதினொன்றாம் பாவகத்தில் அமர்ந்திருப்பதினால் அரசு தொடர்பான பணிகளில் பொருள் ஆதாயத்தை ஈட்டுவீர்கள். ஆன்மிக பணிகளில் இருப்பவர்களுக்கு மனதில் இருந்துவந்த குழப்பங்கள் நீங்கி தெளிவும், ஞானமும் பிறக்கும். செல்வ வளத்தை மேம்படுத்துவீர்கள்.

அரசியல்வாதிகளுக்கு மதிப்புகள் அதிகரிக்கும். கால்நடை வளமும் சுகபோகத்துடன் கூடிய வசதியான வாழ்க்கையை அமைத்து கொள்வதற்கான தருணங்களும் உண்டாகும். கணவன் மனைவியிடையே இருந்து வந்த கருத்துவேறுபாடுகள் குறைந்து ஒற்றுமை அதிகரிக்கும்.

பொருளாதாரம்

இந்த ஆண்டு சனிப்பெயர்ச்சியால் இதுவரை இருந்துவந்த பயனற்ற செலவுகளை குறைத்துக் கொள்வீர்கள். எதிலும் சிக்கனத்துடன் செயல்பட்டு சேமிப்பை மேம்படுத்துவீர்கள். விவசாயப் பணிகளில் இருந்துவந்த மந்தத்தன்மை நீங்கும். மற்றவர்களின் ஆலோசனைகளில் உள்ள உண்மை பொருளை அறிந்து முடிவுகளை எடுப்பது பொருளாதாரத்தில் மாற்றத்தை ஏற்படுத்தும்.

உடல் ஆரோக்கியம்

உடல் ஆரோக்கியத்தில் கவனம் செலுத்துங்கள். காலம் தவறி உணவு உண்பதை தவிர்த்து கொள்வது செரிமான பிரச்சனைகளை தவிர்க்கும்.

நன்மைகள்

நடைபெற இருக்கின்ற சனிப்பெயர்ச்சியில் தனவரவுகளில் இருந்துவந்த தடைகளும், உடல் ஆரோக்கியத்தில் மேன்மையும், கணவன்-மனைவி இடையே இருந்துவந்த கருத்து வேறுபாடுகளும் நீங்கும்.

கவனம்

நடைபெற இருக்கின்ற சனிப்பெயர்ச்சியில் மனதில் எதிர்மறை சிந்தனைகளும், திருமணமானவர்களுக்கு குழந்தை பாக்கியம் கிடைப்பதிலும், எதிர்காலம் தொடர்பான முதலீடுகளிலும் விவேகத்துடன் செயல்படவும். திருவண்ணாமலையில் வீற்றிருக்கும் அருணாச்சலேஸ்வரரை வணங்கி வர சிந்தனைகளில் இருந்துவந்த குழப்பங்கள் நீங்கி தெளிவு பிறக்கும். குலதெய்வத்தை அடிக்கடி வழிபாடு செய்து வர பூர்வீக சொத்துக்கள் கிடைப்பதில் இருந்துவந்த தடைகள் குறையும். 

ரிஷப ராசிக்கான சனிப்பெயர்ச்சி பலன்கள்

ரிஷப ராசிக்கு ஒன்பதாம் இடத்தில் இருந்துவந்த சனிபகவான் பத்தாம் இடமான கர்ம ஸ்தானத்திற்கு பெயர்ச்சி அடைய இருக்கின்றார்.

சனி தன்னுடைய மூன்றாம் பார்வையாக அயன சயன ஸ்தானத்தை பார்ப்பதினால் தூக்கமின்மை சார்ந்த இன்னல்கள் அவ்வப்போது ஏற்பட்டு நீங்கும். நெருக்கமானவர்களிடத்தில் அனுசரித்து செல்வதன் மூலம் சாதகமான வாய்ப்புகளையும், பயனற்ற கருத்து வேறுபாடுகளையும் குறைக்க இயலும். வெளியூர் மற்றும் வெளிநாடு தொடர்பான வேலைவாய்ப்புகள் சிலருக்கு சாதகமாக அமையும். கனவு சார்ந்த இன்னல்கள் குறையும்.

பயணங்களின் மூலம் அலைச்சல்கள் அதிகரிக்கும். உடனிருப்பவர்கள் பற்றிய புரிதல்கள் உண்டாகும். பலதரப்பட்ட சிந்தனைகளின் மூலம் மனதில் குழப்பமும், செயல்பாடுகளில் ஒருவிதமான சோர்வும் ஏற்பட்டு நீங்கும்.

சனி தன்னுடைய ஏழாம் பார்வையாக சிம்ம ராசியான சுக ஸ்தானத்தை பார்ப்பதினால் வாகனம் தொடர்பான பழுதுகள் ஏற்பட்டு நீங்கும். சுபகாரியம் தொடர்பான செயல்பாடுகளில் அலைச்சல்கள் அதிகரித்தாலும் அதற்குண்டான பலன்களை கிடைக்கப் பெறுவீர்கள். சுபகாரியம் தொடர்பான விரயங்கள் உண்டாகும்.

பழைய வீடு மற்றும் வாகனம் வாங்குவது தொடர்பான முயற்சிகளில் இருந்துவந்த தடைகள் நீங்கி எதிர்பார்ப்புகள் நிறைவேறும். உறவினர்களோடு மனம் விட்டு பேசுவதன் மூலம் சில பிரச்சனைகளுக்கு தெளிவான முடிவுகள் பிறக்கும்.

சனி தன்னுடைய பத்தாம் பார்வையாக விருச்சிக ராசியான களத்திர ஸ்தானத்தை பார்ப்பதினால் எண்ணிய பணிகளை நினைத்த விதத்தில் செய்து முடிப்பீர்கள். மனதளவில் எதையும் செய்ய முடியும் என்ற நேர்மறை சிந்தனைகள் அதிகரிக்கும். கனிவான பேச்சுக்கள் வாடிக்கையாளருடன் நல்ல உறவை உருவாக்கும்.

கணவன், மனைவியிடையே ஆரோக்கியமான விவாதங்கள் தோன்றி மறையும். நெருங்கிய உறவினர்கள் மற்றும் நண்பர்களிடம் ஏற்பட்ட கருத்து வேறுபாடுகள் மறையும். முயற்சிகளில் இருந்துவந்த மறைமுக எதிர்ப்புகள் மற்றும் தடைகளை அறிந்து வெற்றி கொள்வீர்கள். உங்களின் மீது ஏற்பட்ட அவப்பெயர்கள் நீங்கும்.

சனி ராசிக்கு பத்தாம் பாவகத்தில் அமர்ந்திருப்பதினால் நிதானமான செயல்பாடுகள் உங்கள் மீதான நம்பிக்கையை மேம்படுத்தும். நிலையான வருமானம் பற்றிய சிந்தனைகள் அதிகரிக்கும். சாதுர்யமான செயல்பாடுகளின் மூலம் ஆதாயத்தை மேம்படுத்துவீர்கள்.

பெரியோர்களின் சந்திப்பால் இழுபறியான சில செயல்களை செய்து முடிப்பீர்கள். நிலம் மற்றும் வீடு விற்பனையில் நல்ல லாபம் கிடைக்கும். விவசாய பணிகளில் சந்தை நிலவரங்களை அறிந்து அதற்கேற்ப பயிர்களைத் தேர்வு செய்வது நல்ல முன்னேற்றத்தை உருவாக்கும்.

பொருளாதாரம்

கிடைக்கும் சிறு வாய்ப்புகளிலும் குறைவில்லாமல் உங்கள் திறமையை வெளிப்படுத்துவது உங்களின் மீதான நம்பிக்கையையும், பொருளாதார மேன்மையையும் உருவாக்கும். தனம் சார்ந்த நெருக்கடிகள் குறையும். வீடு மாற்றம் தொடர்பான முயற்சிகள் கைகூடும். செய்கின்ற முயற்சிக்கேற்ப வருமானம் மேம்படும். சுப விரயங்கள் உண்டாகும். ஆலோசனைகளின் மூலம் அவ்வப்போது சிறு குழப்பங்கள் ஏற்பட்டு நீங்கும்.

உடல் ஆரோக்கியம்

உடல் ஆரோக்கியத்தில் மூட்டு சார்ந்த வலிகளும், காது தொடர்பான பிரச்சனைகளும் மற்றும் குடல் சார்ந்த இன்னல்களும் கட்டுப்பாட்டுக்குள் வரும். குளிர்ச்சியான உணவுகளை குறைத்து கொள்ளவது நல்லது. 

நன்மைகள்

நடைபெற இருக்கின்ற சனிப்பெயர்ச்சியில் முயற்சிகளில் இருந்துவந்த சோர்வும், பணி நிமிர்த்தமான பிரச்சனைகளும், சேமிப்பில் இருந்துவந்த தடைகளும் படிப்படியாக குறையும்.

கவனம்

நடைபெற இருக்கின்ற சனிப்பெயர்ச்சியில் பயணம் சார்ந்த செயல்களிலும், நண்பர்களிடமும், பிறமொழி பேசும் மக்களிடமும் கவனத்துடன் செயல்படவும்.

பிரதோஷ தினத்தில் சிவபெருமானை வழிபாடு செய்து வர நன்மை உண்டாகும். வெள்ளிக்கிழமைதோறும் ஆண்டாளை வழிபட மனதில் ஏற்படும் சஞ்சலங்கள் அகலும்.

பொதுப்பலன்களான இவற்றில் திசாபுத்திக்கு ஏற்ப மாற்றம் உண்டாகும் என்பதை நினைவில் கொள்ளுங்கள்.