Gukesh Dommaraju Profile : குருவை மிஞ்சிய சிஷ்யன்?சொல்லி அடித்த 7 வயது சிறுவன்!யார் இந்த குகேஷ்?

‘’நான் world chess champion ஆவேன்’’ என அன்று அந்த 7 வயது சிறுவன் கூறியபோது வெறும் கனவு என நினைத்த அத்தனை பேரும் வாயில் விரல் வைக்கும் அளவிற்கு ‘’அது வெறும் கனவு இல்லை வெற்றி கனவு’’ என நிரூபித்துவிட்டார் world champion குகேஷ்.

உலக செஸ் சாம்பியன்ஷிப் இறுதிப்போட்டி தொடரில் வெற்றிபெற்று தமிழ்நாட்டிற்கு பெருமை சேர்த்துள்ளார் 18 வயது இளம்வீரர் குகேஷ் தொம்மராஜு. உலகின் இளம் செஸ் சாம்பியன் என்ற சாதனையையும் சேர்த்தே தட்டிச்சென்றுள்ளார் குகேஷ். யார் இந்த இளம் வீரர்..7 வயது சிறுவனின் ஆசை 18 வயது இளைஞனின் சாதனையாக உருமாறியது எப்படி என்பதை காணலாம்..

கடந்த 2006 ஆம் ஆண்டு மே 29 ஆம் தேதி சென்னையில் பிறந்தார் குகேஷ் தொம்மராஜு..அப்பா ரஜினிகாந்த் டாக்டர் அம்மா பத்மா மைக்ரோபயாலஜிஸ்ட். 7 வயதிலேயே செஸ் மீது ஆர்வம் கொண்ட மகனை கோச்சிங் க்ளாஸ் அனுப்பி ஊக்குவித்துள்ளனர் இந்த ப்ரௌட் பேரண்ட்ஸ். வீக்கெண்டில் செஸ் போட்டிகளில் கலந்து கொண்டு தன்னை மேலும் மெருகேற்றினார். ஆரம்பம் முதலே வெற்றியை மட்டுமே சுவைக்க பழகினார் குகேஷ்.. உலகின் இளம் வயதில் செஸ் சாம்பியன்ஷிப் பட்டத்தை பெற  வேண்டும் என்பதே அவரது கனவாக இருந்தது..

2015-இல் நடந்த பள்ளிகளுக்கான ஆசிய செஸ் சாம்பியன்ஷிப் தொடரில் 9 வயதுக்குட்பட்டோர் பிரிவில் வெற்றி பெற்றார் குகேஷ். அந்த வெற்றி அவரது கனவை நோக்கி பயணிக்க பெரும் உத்வேகத்தை அளித்தது. அடுத்ததாக 2018-ல் நடந்த 12 வயதுக்குப்பட்டோருக்கான பிரிவில் உலக இளைஞர் செஸ் சாம்பியன்ஷிப் பட்டத்தை தட்டித்தூக்கினார் குகேஷ்

2018-இல் நடந்த ஆசிய யூத் செஸ் சாம்பியன்ஷிப் தொடரில் தனிநபர் மற்றும் குழு என மொத்தம் 5 தங்கப் பதக்கங்களை குவித்தார்.
2017-ல் நடந்த 34வது Cappelle-la-Grande Open செஸ் தொடரில், இளம் வயதில் சர்வதேச மாஸ்டர் பட்டத்தை வென்ற மூன்றாவது நபர் என்ற சாதனையையும் படைத்தார் குகேஷ். 

இப்படி வெற்றி மீது வெற்றிகளை குவித்து வந்த குகேஷ்.. 17 வயதில் செஸ் ரேங்கிங்கில் 2750 புள்ளிகளை பெற்றார். சில நாட்களிலேயே 37 ஆண்டுகளாக சாம்பியனாக இருந்த விஸ்வநாதன் ஆனந்தை ஓவர்டேக் செய்து அசுர சாதனை படைத்தார்.

இந்நிலையில் கடந்த செப்டம்பர் மாதம் செஸ் ஒலிம்பியாட்டில் இந்தியா முதன்முதலாக தங்கம் வென்று சாதனை படைத்தது.
அதிலும் குகேஷின் பங்கு இருந்தது குறிப்பிடத்தக்கது. பிரக்ஞானந்தா, விதித் குஜராத்தி, அர்ஜுன் எரிகைசி, பென்டலா ஹரிகிருஷ்ணா ஆகியோருடன் இணைந்து இந்தியாவுக்கு பெருமை சேர்த்தார் தங்க மகன்குகேஷ். 
இப்படி வெற்றி பயணத்தை மேற்கொண்ட குகேஷ்-க்கு இந்த ஆண்டு உலக சாம்பியன்ஷிப் தொடரில் டிங் லிரனுக்கு எதிராகப் பங்கேற்கும் வாய்ப்பு கிடைத்தது.

அதில் இன்று நடந்த 14வது போட்டியில் குகேஷ் வெற்றி பெற்று 
உலக செஸ் சாம்பியன் பட்டத்தை வென்றுள்ளார்.   விஸ்வநாதன் ஆனந்த்துக்குப் பிறகு உலக செஸ் சாம்பியன் ஆன இரண்டாவது நபர் என்ற சாதனையை படைத்துள்ளார்
 குகேஷ். மேலும் அவர் ஆசைப்பட்டதை போலவே மிகவும் இளம் வயதில் உலக செஸ் சாம்பியன் பட்டம் வென்ற நபர் என்ற சாதனையையும் பெற்றுவிட்டார் குகேஷ்..

7 வயது குகேஷின் கனவு 18 வயதில் நனவாக மாறியதை கொண்டாடும் நொடியில் கண்ணீர் வடித்து மகிழ்ச்சியை வெளிப்படுத்தினார் வேர்ல்டு யங்கஸ்ட் செஸ் சாம்பியன் குகேஷ் தொம்மராஜு