Seeman meets Nirmala Sitharaman: நிர்மலாவை சந்தித்தாரா சீமான்? பாஜக போடும் ஸ்கெட்ச்! நடந்தது என்ன?

நிர்மலா சீதாராமனை சீமான் நேரில் சந்தித்து சில முக்கிய விஷயங்களை பேசியதாக தகவல் வெளியாகி பரபரப்பை கிளப்பியுள்ளது. இந்த நேரத்தில் சந்திப்பு தொடர்பாக சீமானிடம் இருந்தே ரியாக்ஷன் வந்துள்ளது.

அதிமுக பொதுச்செயலாளர் இபிஎஸ் டெல்லி சென்று அமைச்சர் அமித்ஷாவை சந்தித்த பிறகு, அதிமுக பாஜக கூட்டணி பேச்சுவார்த்தை சூடுபிடித்து வருகிறது. தமிழக பாஜக மாநில தலைவர் மாற்றம் பற்றிய பேச்சு என அடுத்தடுத்து அதிரடி சம்பவங்கள் நடந்து வருகின்றன. அதிமுக மூத்த தலைவர் செங்கோட்டையனும் டெல்லி சென்று அமைச்சர் நிர்மலா சீதாராமனை சந்தித்தார்.

இந்தநிலையில் சென்னை வந்துள்ள நிர்மலா சீதாராமனை செங்கோட்டையனும், சீமானும் தனித்தனியாக சந்தித்து பேச்சுவார்த்தை நடத்தியதாக சொல்கின்றனர். தொடர்ந்து தனித்து களம் காணும் சீமானை கூட்டணி பக்கம் இழுக்க அதிமுக, தவெக போன்ற கட்சிகள் தூண்டில் போட்டு வந்தனர். தற்போது வலுவான கூட்டணி அமைக்க கணக்கு போட்டு வரும் பாஜகவும் சீமானை கூட்டணிக்கு கொண்டு வர பேச்சுவார்த்தை நடத்தி வருவதாக கூறப்பட்டது. 

ஏற்கனவே நடிகர் ரஜினிகாந்தை வைத்து சீமானுடன் பாஜக பேச்சுவார்த்தை நடத்தி வருவதாக அரசியல் வட்டாரத்தில் பேச்சு அடிபட்டது. இருவருக்கும் இடையில் திடீரென நடந்த சந்திப்பும் அந்த விமர்சனத்தை மேலும் பற்றி எரிய வைத்தது. இதனை தொடர்ந்து நிர்மலா சீதாரமனையும் சந்தித்து கூட்டணி பேச்சுவார்த்தையை சீமான் முடித்துவிட்டாரா என்ற கேள்வி வந்தது.

இந்தநிலையில் நிர்மலா சீதாராமனை சந்திக்கவே இல்லை என சீமான் மறுத்துள்ளார். அப்படி சந்தித்திருந்தால் அதனை வெளியே சொல்வதில் என்ன பயம் நானே சொல்லியிருப்பேன் என்றும் மறுப்பு தெரிவித்துள்ளார். இருப்பினும் சீமான் சொல்வது உண்மையா இல்லையா என்றும் சமூக வலைதளங்களில் விவாதிக்கப்படுகிறது. அமித்ஷாவுடன் கூட்டணி பற்றி பேசவில்லை என இபிஎஸ் என மறுத்த நேரத்தில், கூட்டணி பேச்சுவார்த்தை நடந்து வருவதை அமித்ஷாவே உறுதி செய்தார். அதேபோல் சீமானும் கூட்டணி உறுதியாகும் வரை வெளிப்படையாக சொல்லாமல் இருக்கிறாரா என நெட்டிசன்கள் கேள்வி எழுப்பி வருகின்றனர்.