Vinesh Phogat: வினேஷ் போகத்தை பார்த்து அஞ்சிய பயிற்சியாளர்! ஏன் தெரியுமா?

எடை குறைப்பில் தீவிர பயிற்சியில் ஈடுபட்ட வினேஷ் போகத் இறந்து விடுவார் என்று அஞ்சியதாக பயிற்சியாளர் வோலர் அகோஸ் கூறியுள்ளார்.

பயிற்சியாளர் வோலர் அகோஸ் - வினேஷ் போகத்

Source : x

ஏமாற்றம் அடைந்த வினேஷ் போகத்:

கடந்த ஜூலை 26 ஆம் தேதி தொடங்கிய பாரீஸ் ஒலிம்பிக் தொடர் ஆகஸ்ட் 11 ஆ தேதி முடிவடைந்தது. முன்னதாக இந்திய மல்யுத்த வீராங்கனை வினேஷ் போகத் 50 கிலோ எடைப்பிரிவில் இறுதிப்போட்டிக்கு முன்னேறியிருந்தார். அதன்படி இறுதிப் போட்டியில் அமெரிக்க வீராங்கனையை எதிர்கொள்ள தயாராக இருந்தார். இதனிடையே பல்வேறு தரப்பினரும் அவருக்கு வாழ்த்தி கூறி வந்த சூழலில் மிகப்பெரிய அதிர்ச்சி செய்தி ஒன்று வந்தது.

அதாவது வினேஷ் போகத் தகுதிநீக்கம் செய்யப்படுவதாக அறிவிக்கப்பட்டது. மல்யுத்த விதிகளின் படி 50 கிலோ எடைப் பிரிவில் பங்கேற்பவர்கள் அந்த எடையை விட கூடுதல் எடையில் இருக்கக் கூடாது. ஆனால் அவர் 100 கிராம் அதிக எடையுடன் இருக்கிறார். இதனால் தான் இந்த தகுதி நீக்கம் என்று ஒலிம்பிக் கமெட்டி அறிவித்தது. அதே நேரம் அமெரிக்கா வீராங்கனை சாராவுக்கு தங்கமும், கியூபா வீராங்கனை லோபஸ் வெள்ளிப் பதக்கமும், சுசாகி வெண்கலமும் வென்றதாக அறிவிக்கப்பட்டது. இந்த அதிர்ச்சியில் இருந்த வினேஷ் போகத் சர்வதேச மல்யுத்த போட்டியில் இருந்து ஓய்வு பெருவதாகவும் தன்னால் இன்னும் போராட முடியாது என்றும் கூறினார்.

இறந்து விடுவார் என்று அஞ்சினேன்:

இந்நிலையில் வினேஷ் போகத் விளையாட்டு தீர்ப்பாயத்தில் தனது தகுதிநீக்கத்தை எதிர்த்து வெள்ளிப் பதக்கம் வழங்கக் கோரி மேல்முறையீடு செய்தார். இந்த வழக்கை சர்வதேச விளையாட்டு தீர்ப்பாயம் ரத்து செய்தது. இச்சூழலில் எடை குறைப்பில் தீவிர பயிற்சியில் ஈடுபட்ட வினேஷ் போகத் இறந்து விடுவார் என்று அஞ்சியதாக பயிற்சியாளர் வோலர் அகோஸ் கூறியுள்ளார்.

இது தொடர்பாக அவர் பேசுகையில்,"ஒரு மணி நேரம் இருபது நிமிடங்கள் உடற்பயிற்சி செய்தோம், ஆனால் 1.5 கிலோ இன்னும் இருந்தது. நள்ளிரவு முதல் காலை 5:30 வரை வெவ்வேறு விதமான பயிற்சிகளை அவர் தொடர்ந்து செய்தார். இதைப் பார்த்த நான் வினேஷ் போகத் இறந்து விடுவார் என்று அஞ்சினேன்" என்று கூறியுள்ளார். இப்படி தன்னுடைய வெற்றிக்காக தொடர்ந்து போராடிய வினேஷ் போகத்திற்கு பதக்கம் கிடைக்காதது அனைவருக்கும் அதிர்ச்சியை ஏற்படுத்தி இருந்தாலும், எப்போதும் அவர் இந்தியவின் தங்கமங்கையாகவே ஜொலிப்பர் என்று ரசிகர்கள் கூறுகின்றனர்.