மாநில அளவிலான கிரிக்கெட் போட்டி - கரூர் அரசு கலைக் கல்லூரி மாணவர்கள் முதலிடம்
திருப்பூர் மாவட்டம் தாராபுரத்தில் அக்டோபர் 2ம் தேதி முதல் 5ம் தேதி வரை மாநில அளவிலான ஓபன் கிரிக்கெட் போட்டிகள் நடைபெற்றன.
திருப்பூரில் புதன்கிழமை நடைபெற்ற மாநில அளவிலான கிரிக்கெட் போட்டியில் கரூர் தான்தோன்றிமலை அரசு கலைக் கல்லூரி மாணவர்கள் முதலிடம் பிடித்து கோப்பையை கைப்பற்றினர். திருப்பூர் மாவட்டம் தாராபுரத்தில் அக்டோபர் 2ம் தேதி முதல் 5ம் தேதி வரை மாநில அளவிலான ஓபன் கிரிக்கெட் போட்டிகள் நடைபெற்றன. இதில் கோவை, சேலம், கரூர், நாமக்கல், திருப்பூர் உள்ளிட்ட பல்வேறு மாவட்டங்களை சேர்ந்த 48 அணிகளை சேர்ந்த வீரர்கள் பங்கேற்றனர்.
தொடர்ந்து புதன்கிழமை நடைபெற்ற இறுதிப்போட்டியில் கரூர் அரசு கலைக்கல்லூரி மாணவர்கள் அணியும், கோவை அணியும் மோதின. முதலில் பேட்டிங்கை தேர்வு செய்த கரூர் அரசு கலைக்கல்லூரி மாணவர்கள் நிர்ணயிக்கப்பட்ட 6 ஓவர்களில் 72 ரன்கள் எடுத்தனர். இதை அடுத்து 73 ரன்கள் எடுத்தால் வெற்றி என்ற இலக்குடன் களமிறங்கிய கோவை அணி 6 ஓவரில் 52 ரன்கள் மட்டுமே எடுத்து ஆல் அவுட் ஆனது. இதனால், 20 ரன்கள் வித்தியாசத்தில் கரூர் அரசு கலைக்கல்லூரி மாணவர்கள் அணி வெற்றி பெற்று கோப்பையை தட்டி சென்றனர்.
தொடர்ந்து இரண்டாம் இடத்தை கோவை அணியும், மூன்றாம் இடத்தை சேலம் அணியும், நான்காம் இடத்தை திருப்பூர் அணியும் பிடித்தனர். முதலிடம் பிடித்த கரூர் தான்தோன்றிமலை அரசு கலைக்கல்லூரி மாணவர்களுக்கு பாராட்டு விழா கல்லூரியில் வியாழக்கிழமை நடைபெற்றது. விழாவுக்கு கல்லூரியின் உடற்கல்வி இயக்குனர் ராஜேந்திரன் தலைமை வகித்தார். விழாவில் கல்லூரி முதல்வர் கௌசல்யா தேவி மாணவர்களை பாராட்டினார். இதில் கல்லூரி பேராசிரியர்கள் மாணவர்கள் உள்ளிட்டோர் பங்கேற்றனர்.
மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்
ABP நாடு செய்திகளை சமூக வலைத்தள பக்கங்களிலும் பின் தொடரலாம்
தலைப்பு செய்திகள்
ட்ரெண்டிங் செய்திகள்
