TNPL Auction 2023: இன்றும், நாளையும் மகாபலிபுரத்தில் டிஎன்பிஎல் ஏலம்.. அதிக விலைக்கு எகிறப்போகும் வீரர்கள் யார்? யார்?
டிஎன்பிஎல் 2023 ம் ஆண்டிற்கான ஏலம் இன்று மற்றும் நாளை மகாபலிபுரத்தில் உள்ள ஐடிசி கென்சஸ் ஹோட்டலில் நடைபெறும் என தமிழ்நாடு கிரிக்கெட் சங்கம் அறிவித்துள்ளது.
இந்தியாவில் பிசிசிஐ நடத்தும் இந்தியன் பிரீமியர் லீக் தொடர் எவ்வளவு பிரபலமோ, அதே அளவிற்கு தமிழ்நாட்டில் மிகவும் பிரபலமானது தமிழ்நாடு பிரீமியர் லீக். 8 அணிகள் பங்கேற்கும் 7வது டிஎன்பிஎல் தொடரானது வருகின்ற ஜூன் மற்றும் ஜூலை மாதங்களில் நடத்த திட்டமிடப்பட்டுள்ளது. இதுவரை இந்த தொடரில் பங்கேற்கும் வீரர்கள் டிராப்ட் முறையில் தேர்வு செய்யப்பட்டு வந்தனர். இந்த சூழலில் இந்த ஆண்டு முதல் வீரர்கள் ஐபிஎல் போன்று ஏலத்தில் எடுக்கப்பட இருக்கின்றனர்.
ஏலம்:
டிஎன்பிஎல் 2023 ம் ஆண்டிற்கான ஏலம் இன்று மற்றும் நாளை மகாபலிபுரத்தில் உள்ள ஐடிசி கென்சஸ் ஹோட்டலில் நடைபெறும் என தமிழ்நாடு கிரிக்கெட் சங்கம் அறிவித்துள்ளது. இந்த ஏலத்தை பிரபல விளையாட்டு வர்ணனையாளர் சாரு சர்மா முன்னெடுக்க, மதியம் 12 மணி முதல் இந்த ஏலம் ஸ்டார் ஸ்போர்ட்ஸில் நேரடியாக ஒளிபரப்பு செய்யப்பட இருக்கிறது.
பங்கேற்கும் வீரர்கள்:
தமிழ்நாட்டிலிருந்து சுமார் 942 கிரிக்கெட் வீரர்கள் TNPL ஏலத்தில் பங்கேற்கிறார்கள்.ஒவ்வொரு உரிமையாளருக்கும் மொத்த ஏலத்தொகை ரூ. 70 லட்சமாக நிர்ணயிக்கப்பட்டுள்ளது. பங்கேற்கும் 8 அணிகளும் அதிகபட்சம் இரண்டு வீரர்களைத் தக்கவைத்துக் கொள்ளலாம். மற்ற வீரர்கள் அனைவரும் ஏலத்தில் இடம் பெறுவார்கள். மொத்தம் 942 வீரர்களை கொண்டு நடத்தப்படும் இந்த ஏலத்தில் 4 பிரிவுகளாக பிரிக்கப்பட்டுள்ளன.
விலை பிரிவு:
- ஏ பிரிவுக்கு ரூ.10 லட்சம் (சர்வதேச போட்டிகளில் விளையாடிய வீரர்கள்)
- B பிரிவுக்கு ரூ. 6 லட்சம் (பிசிசிஐ மூத்த உள்நாட்டுப் போட்டிகளில் விளையாடிய வீரர்கள்)
- C பிரிவுக்கு ரூ. 3 லட்சம் (பிரிவு A அல்லது B இல் இல்லாத ஆனால் 30 TNPL போட்டிகளுக்கு மேல் விளையாடிய வீரர்கள்)
- D பிரிவு வீரருக்கு ரூ. 1.50 லட்சம் வகை (மற்ற வீரர்கள்)
தக்கவைப்பதற்கான காலக்கெடு ஜனவரி 30, 2023 ஆகும்.
அணிகள் தக்கவைத்துள்ள வீரர்கள் பட்டியல்:
சேப்பாக் சூப்பர் கில்லீஸ் - (மீதமுள்ள இருப்பு தொகை: ரூ.61,00,000)
- என்.ஜெகதீசன் - பி பிரிவு
- சசிதேவ்.யு - சி பிரிவு
திண்டுக்கல் டிராகன்ஸ் - (மீதமுள்ள இருப்பு தொகை: ரூ.60,00,000)
- ரவிசந்திரன் அஸ்வின்- ஏ பிரிவு
ஐட்ரீம் திருப்பூர் தமிழன்ஸ் - (மீதமுள்ள இருப்பு தொகை: ரூ.68,50,000)
- துஷார் ரஹேஜா - டி பிரிவு
LYCA கோவை கிங்ஸ் - (மீதமுள்ள இருப்பு தொகை: ரூ.62,50,000)
- ஷாருக் கான் - பி பிரிவு
- சுரேஷ் குமார் - டி பிரிவு
நெல்லை ராயல் கிங்ஸ் - (மீதமுள்ள இருப்பு தொகை: ரூ.62,50,000)
- அஜிதேஷ் - பி பிரிவு
- கார்த்திக் மணிகண்டன் - டி பிரிவு
ரூபி திருச்சி வாரியர்ஸ் - (மீதமுள்ள இருப்பு தொகை: ரூ.64,00,000)
- ஆண்டனி தாஸ் - பி பிரிவு
சேலம் ஸ்பார்டன்ஸ் - (மீதமுள்ள இருப்பு தொகை: ரூ.67,00,000)
- கணேஷ் மூர்த்தி - சி பிரிவு
Siechem மதுரை பாந்தர்ஸ் - (மீதமுள்ள இருப்பு தொகை: ரூ.68,50,000
- கௌதம் - டி பிரிவு
ஏலத்தில் பங்கேற்கும் ஒவ்வொரு அணியும் 70 லட்சத்தை மொத்த தொகையாக கொண்டே, தங்கள் அணிக்கான வீரர்களை ஏலம் எடுக்க வேண்டும். 8 அணிகளும் ஏலத்தில் குறைந்தபட்சம் 16 வீரர்களிலிருந்து, அதிகபட்சமாக 20 வீரர்களை தேர்வு செய்யலாம்.
அதிக விலைக்கு எதிர்பார்க்கப்படும் வீரர்கள்:
தினேஷ் கார்த்திக், டி.நடராஜன், வாஷிங்டன் சுந்தர், வருண் சக்ரவர்த்தி, விஜய் சங்கர் போன்ற பெரிய பெயர்கள் எல்லாம் தக்கவைப்பு பட்டியலில் இடம் பெறவில்லை. எனவே, அவர்களை வாங்க அனைத்து அணிகளும் போட்டியிடுவார்கள். அதேபோல், கடந்த சீசன்களில் அதிகம் கவனிக்கப்பட்ட சாய் கிஷோர், சாய் சுதர்சன், பாபா அபராஜித், பாபா இந்திரஜித் மற்றும் முருகன் அஸ்வின் ஆகியோர் நல்ல விலைக்கு ஏலம் போவார்கள் என்று எதிர்பார்க்கப்படுகிறது.
தலைப்பு செய்திகள்
ட்ரெண்டிங் செய்திகள்
