பழனி முருகன் கோயில் உண்டியல் காணிக்கை; பக்தர்களே மொத்த வசூல் நிலவரம் இதோ உங்களுக்காக

பழனி கோயிலுக்கு வருகை தரும் பக்தர்கள் முருகப்பெருமானை தரிசித்துவிட்டு உண்டியல்களில் பணம், தங்கம், வெள்ளி பொருட்களை காணிக்கையாக செலுத்துகின்றனர்.

பழனி உண்டியல் காணிக்கை எண்ணும் பணியில் மாணவிகள்

பழனி மலைக்கோயில் உண்டியல் திறக்கப்பட்டு  எண்ணப்பட்டதில் பக்தர்களின் மொத்த காணிக்கை வரவு ரூ. 6 கோடியே 84 லட்சம் கிடைத்துள்ளது.

அறுபடை வீடுகளில்  மூன்றாம் படைவீடான பழனி முருகன் கோயில் உலகப் பிரசித்தி பெற்றது. இங்கு சாமி தரிசனம் செய்ய தமிழகம் மட்டுமின்றி வெளிமாநிலங்களில் இருந்து தினமும் ஏராளமான பக்தர்கள் வருகை தருகின்றனர். விழாக்காலத்தில் லட்சக்கணக்கான பக்தர்கள் வந்து சாமி தரிசனம் செய்வர். இவ்வாறு வருகை தரும் பக்தர்கள், முருகப்பெருமானை தரிசித்துவிட்டு உண்டியல்களில் பணம், தங்கம், வெள்ளி பொருட்களை காணிக்கையாக செலுத்துகின்றனர். இதற்காக கோயில் நிர்வாகம் சார்பில், கோயில் வளாகத்தில் பல்வேறு உண்டியல்கள் வைக்கப்பட்டுள்ளன. இந்த உண்டியல்கள் நிரம்பியவுடன், அதில் உள்ள பணம், தங்கப் பொருட்கள் எண்ணி அளவிடப்பட்டு வருகிறது.

அதன்படி, பக்தர்கள் செலுத்திய காணிக்கையை எண்ணுவதற்கு உண்டியல்கள் திறக்கப்பட்டு மலைக்கோயில் கார்த்திகை மண்டபத்தில் வைத்து 1ம் தேதி , 4ம் தேதி , 5ம் தேதி என கடந்த மூன்று நாட்களாக எண்ணப்பட்டது.  எண்ணிக்கை முடிவில் ரொக்கம் ரூபாய் 6 கோடியே 84 இலட்சத்து 59 ஆயிரத்து 013 கிடைத்துள்ளது. பக்தர்கள் தங்கம் மற்றும் வெள்ளியாலான தாலி, கொலுசு, வேல், காவடி, மோதிரம் போன்றவற்றையும் காணிக்கையாக செலுத்தியிருந்தனர்.

தங்கம்  2334 கிராமும், வெள்ளி 57,339 ( 57 கிலோ)  கிராமும் மலேசியா, சிங்கப்பூர், அமெரிக்கா உள்ளிட்ட பல்வேறு வெளிநாட்டு கரன்சிகள்  2097 ம் காணிக்கையாக கிடைத்துள்ளது.  உண்டியல் எண்ணிக்கையில் ஐநூறுக்கும் மேற்பட்ட கல்லூரி மாணவிகள், கோயில் பணியாளர்கள் பங்கேற்றனர். உண்டியல் எண்ணிக்கையின் போது பழனிக்கோயில் இணை ஆணையர் மாரிமுத்து, உதவி ஆணையர் லட்சுமி, என பலர் பங்கேற்றனர்.