அண்ணாமலையார் கோயிலில் கார்த்திகை தீப திருவிழா; முகூர்த்த பந்த கால் நடப்பட்டது

திருவண்ணாமலை அண்ணாமலையார் கோயிலில் கார்த்திகை தீபத் திருவிழா வருகிற 27ம்தேதி கொடியேற்றத்துடன் துவங்க உள்ள நிலையில் பூர்வாங்க பணிகள் செய்திட இன்று முகூர்த்த பந்தகால் நடும் விழா நடைபெற்றது.

முகூர்த்த பந்தக்கால் நடும் விழா

நினைத்தாலே முக்தி தரும் தலமாகவும், பஞ்சபூத தலங்களில் அக்னி தலமாகவும் விளங்கக் கூடிய திருவண்ணாமலை அண்ணாமலையார் திருக்கோவில் ஆண்டுதோறும் திருக்கார்த்திகை தீபத் திருவிழாவனது தொடர்ந்து 10 நாட்கள் வெகு விமரிசையாக கொண்டாடப்பட்டு வருகின்றது. இந்த திருவிழாவிற்கு தமிழகம் மற்றும் வெளிநாடுகளில் இருந்து சுமார் 25 லட்சத்திற்கும் மேற்பட்ட பக்தர்கள் கலந்துகொண்டு சாமி தரிசனம் செய்வர். இந்நிலையில் இந்த பிலவ ஆண்டு திருக்கார்த்திகை தீபத் திருவிழாவின் கொடியேற்ற விழா வருகின்ற நவம்பர் மாதம் 27-ஆம் தேதி காலை திருக்கோவிலில் அண்ணாமலையார் சன்னதியின் முன்புறம், 64 அடி உயரம் கொண்ட தங்க கொடிமரத்தில் கொடியேற்றத்துடன் தொடங்குகிறது. முக்கிய விழாவான கற்கபக விற்சகம் தேர், வெள்ளித் தேர் திருவிழா, மகா ரதம் என்னும் பஞ்ச மூர்த்திகளின் மகா தேரோட்டம் மற்றும் அதனைத் தொடர்ந்து டிசம்பர் மாதம் 6-ஆம் தேதி அதிகாலை 4 மணிக்கு திருக்கோவில் கருவறையில் பரணி தீபமும் அன்று மாலை 6 மணிக்கு திருக்கோவில் பின்புறம் உள்ள சிவனே மலையாக காட்சி அளிக்க கூடிய 2,668 அடி உயரம் கொண்ட மலையின் மீது மகா தீபமும் ஏற்றப்பட்ட உள்ளது.

 

இந்தத் திருக்கார்த்திகை தீபத் திருவிழாவின் 10 நாட்களும் காலை இரவு என இரு வேளைகளிலும் சுவாமி, அம்பாள் மாட வீதிகளில் வலம் வந்து பக்தர்களுக்கு காட்சியளிப்பர். திருக்கார்த்திகை தீபத் திருவிழாவை முன்னிட்டு பூர்வாங்க பணிகளுக்காக பந்தல் அமைத்தல், சுவாமி வீதி உலா வரும் வாகனங்கள் பழுது பார்த்தல் மற்றும் வர்ணம் தீட்டுதல், தேர்கள் பழுதுபார்த்தல் உள்ளிட்ட திருவிழாவிற்கான அனைத்து ஏற்பாடுகளையும் செய்வதற்காக இன்று காலை திருக்கோவிலில் உள்ள சம்பந்த விநாயகருக்கு சிறப்பு அபிஷேக ஆராதனைகள் செய்யப்பட்டது.

 

பின்னர் சம்மந்த விநாயகர் சந்நதியில் பந்தக்காலுக்கு பால், தயிர், சந்தனம், மஞ்சள் உள்ளிட்ட பல்வேறு வாசனை திரவியங்களை கொண்டு சிறப்பு அபிஷேகம் மற்றும் பூஜைகள் செய்யப்பட்டது. திருக்கோவிலின் உள்ளே ஊர்வலமாக கொண்டு வரப்பட்டு, தமிழகத்திலேயே இரண்டாவது உயரமான ராஜகோபுரம் முன்புள்ள 16 கால் மண்டபம் வளாகத்தில் காலை 06:30 மணிக்கு சிவாச்சாரியார்கள் வேதமந்திரங்கள் முழங்க உத்திராட நட்சத்திரம் சிம்ம லக்னத்தில், பந்தக்கால் முகூர்த்தம் விழா நடைபெற்றது. இந்நிகழ்வில் சிவாச்சாரியார்கள், கோவில் பணியாளர்கள் மற்றும் ஏராளமான பக்தர்கள் கலந்துகொண்டு பந்தக்கால் முகூர்த்தம் விழாவினை நடத்தினர். இந்த விழாவில் திருக்கோவில் இணை ஆணையர் அசோக்குமார் , நகர துணை காவல் கண்காணிப்பாளர் குணசேகரன் மற்றும் காவலர்கள் பாதுகாப்பு பணியில் ஈடுப்பட்டனர்.