Indonesia open badminton: இந்தோனேசிய ஓபன் இறுதிப் போட்டியில் சாத்விக் - சிராக் இணை.. பிரணாய்க்கு ஏமாற்றம்!

விறுவிறுப்பாக நடந்த அரையிறுதி ஆட்டத்தில் வெற்றிப் பெற்று இறுதிப் போட்டிக்கு முன்னேறியுள்ளது சிராக் - சாத்விக் இணை.

சிராக் ஷெட்டி - சாத்விக் ரங்கிரெட்டி

இந்தோனேசிய ஓபன் பேட்மிண்டன் தொடர் ஜகார்த்தாவில் நடந்து வருகிறது.

இந்த தொடரில் முன்னதாக சாத்விக் - சிராக் ஜோடி மற்றும் எச்.எஸ்.பிரணாய் உள்ளிட்ட இந்திய வீரர்கள் சிறப்பாக ஆடி அரையிறுதிக்கு முன்னேறியிருந்தனர்.

இந்நிலையில் நேற்று நடைப்பெற்ற ஆண்கள் இரட்டையர் பிரிவின் அரையிறுதி ஆட்டத்தில் சாத்விக் - சிராக் இணை தென் கொரியாவின் மின் ஹியுக் காங் - செயுங் ஜே சியோ ஜோடியுடன் மோதியது.

விறுவிறுப்பாக சென்ற அந்த ஆட்டத்தில் 17-21, 21-19, 21-18 என்ற செட் கணக்கில் வெற்றி பெற்ற இந்திய இணை இறுதிப் போட்டிக்கு முன்னேறியுள்ளது.

அரையிறுதிக்கு தகுதிப் பெற்றிருந்த மற்றொரு இந்திய வீரரான எச்.எஸ்.பிரணாய் 15-21, 15-21 என்ற நேர் செட்களில் டென்மார்க் வீரர் விக்டர் ஆல்செல்சனிடம் அதிர்ச்சி தோல்வியுற்று வெளியேறினார்.

இதற்கு முன்னதாக இந்திய நட்சத்திர பேட்மிண்டன் வீரர்களான கிடாம்பி ஸ்ரீகாந்த், பி.வி.சிந்து உள்ளிட்டோர் தொடரில் இருந்து வெளியாகியிருந்தது குறிப்பிடத்தக்கது.