Weapons: இந்தியா இல்லை.. அமெரிக்காவிடம் இருந்து ஆயுங்களை வாங்கி குவிக்கும் நாடு பற்றி தெரியுமா? ஏன்?
US Weapons Import: அமெரிக்காவிடம் இருந்து அதிக அளவில் ஆயுதங்களை வாங்கு குவிக்கும் நாடு குறித்து இந்த தொகுப்பில் அறியலாம்.
US Weapons Import: அமெரிக்காவிடம் இருந்து அதிக அளவில் ஆயுதங்களை வாங்கு குவிக்கும் நாடு எது? ஏன்? என்ற கேள்விக்கான பதில்கள் கீழே பட்டியலிடப்பட்டுள்ளன.
இந்தியா - அமெரிக்கா ஆயுத ஒப்பந்தம்:
தடையற்ற வர்த்தக ஒப்பந்தம் மேற்கொள்வதில் இந்தியா - அமெரிக்கா இடையேயான பேச்சுவார்த்தை இழுபறியாக நீடித்து வருகிறது. இதனிடையே, இந்திய ராணுவத்திற்கு சுமார் 823 கோடி ரூபாய் மதிப்பிலான ஆயுதங்களை விற்பனை செய்ய அமெரிக்கா ஒப்புக்கொண்டுள்ளது. அதன்படி ராணுவ வீரர்கள் தோளில் வைத்து ஏவும் வகையிலான ஜாவெலின் FGM-148 ஏவுகணைகள், 25 ஜாவெலின் இலகுரக ஏவுகணையை ஏவும் அமைப்புகள் (LwCLU) அல்லது ஜாவெலின் பிளாக் 1 ஏவுகணை ஏவும் அமைப்பு(CLU), 216 எக்ஸ்கலிபர் பீரங்கி குண்டுகள் ஆகியவை முதல் தொகுப்பில் அடங்கும். இரண்டாவது தொகுப்பில் எக்ஸ்காலிபர் எரிபொருட்கள் மற்றும் தொடர்புடைய உபகரணங்கள் அடங்கும். இந்நிலையில் தான், அமெரிக்காவிடம் இருந்து அதிக ஆயுதங்களை வாங்கும் நாடு எது? என்ற கேள்வியும் பலரிடம் எழுந்துள்ளது.
அமெரிக்காவின் ஆயுத விற்பனை:
உலகளாவிய ஆயுதப் போட்டி எந்த திசையில் செல்கிறது என்பதைப் புரிந்து கொள்ள, ஒரே ஒரு கேள்வி போதும். ஆம், எந்த நாடு அமெரிக்காவிடமிருந்து அதிக ஆயுதங்களை வாங்குகிறது? என்பதே அந்த கேள்வியாகும். இது கேட்பதற்கு ஆச்சரியமாக இருந்தாலும், ஆயுத வர்த்தகத்தின் பின்னணியில் உள்ள சக்தி, செல்வாக்கு மற்றும் சர்வதேச அரசியலை வெளிப்படுத்தும் புள்ளிவிவரங்கள் இன்னும் சுவாரஸ்யமானதாக இருக்கும்.
ஆயுத கொள்முதல் - எந்த நாடு முதலிடத்தில் உள்ளது?
உலகளாவிய ஆயுத வர்த்தகம் என்பது பாதுகாப்பு தொடர்பான விஷயம் மட்டுமல்ல, ராஜதந்திரம், அதிகாரம் மற்றும் ஆதிக்கத்தின் விளையாட்டாகும். அமெரிக்கா பல தசாப்தங்களாக உலகின் மிகப்பெரிய ஆயுத ஏற்றுமதியாளராக இருந்து வருகிறது. மேலும் சவுதி அரேபியா அதன் வாடிக்கையாளர் நாடுகளின் பட்டியலில் முதலிடத்தில் உள்ளது. மேற்கு ஆசியாவில் அதன் பாதுகாப்பு, ராணுவ சக்தி மற்றும் பிராந்திய செல்வாக்கை மேம்படுத்துவதற்காக கடந்த பத்தாண்டுகளில் சவுதி அரேபியா அமெரிக்காவிடமிருந்து மிகப்பெரிய அளவில் ஆயுதங்களை கொள்முதல் செய்துள்ளது.
சவுதி அரேபியாவிற்கு எப்படி முதலிடம்?
2011 முதல் தொடர்ந்து அமெரிக்காவின் மிகப்பெரிய ஆயுத இறக்குமதியாளராக சவுதி அரேபியா உள்ளது. அறிக்கைகளின்படி, 2011 முதல் சவுதி அரேபியா அமெரிக்க ஆயுதங்களுக்காக $6.5 பில்லியனுக்கும் அதிகமாக செலவிட்டுள்ளது. இது அமெரிக்க பாதுகாப்பு ஏற்றுமதியில் தோராயமாக 10% ஆகும். இந்த செலவில் சிறிய ஆயுதங்கள் மட்டுமல்ல, மேம்பட்ட போர் விமானங்கள், ஏவுகணை அமைப்புகள், வான் பாதுகாப்பு அமைப்புகள் மற்றும் உயர் தொழில்நுட்ப கண்காணிப்பு உபகரணங்களும் அடங்கும்.
வரலாற்றுச் சிறப்புமிக்க பாதுகாப்பு ஒப்பந்தம்
2017 ஆம் ஆண்டில், அமெரிக்காவிற்கும் சவுதி அரேபியாவிற்கும் இடையே ஏற்பட்ட 109.7 பில்லியன் டாலர் மதிப்பிலான மெகா ஒப்பந்தம் உலக கவனத்தை ஈர்த்தது. இது வரலாற்றில் மிகப்பெரிய ஆயுத ஒப்பந்தங்களில் ஒன்றாகும். இந்த ஒப்பந்தத்தைத் தொடர்ந்து, சவுதி அரேபியா பேட்ரியாட் ஏவுகணை அமைப்புகள், டாங்கிகள், ஹெலிகாப்டர்கள், ரேடார்கள் மற்றும் போர் விமானங்கள் உள்ளிட்ட அதிநவீன ஆயுதங்களை பெருமளவில் வாங்கி தனது ராணுவத்தில் இணைத்துள்ளது.
சவுதி அரேபியாவிற்கு ஆயுத அவசியம் என்ன?
ஈரானுடன் அதிகரித்து வரும் பதற்றங்கள் காரணமாகவும், மத்திய கிழக்கில் ஆதிக்கத்தைத் தக்கவைத்துக் கொள்ளவும், அமெரிக்க தொழில்நுட்பத்துடன் தனது பாதுகாப்பை வலுப்படுத்தவும், ஏமன் போரை ஆதரிக்கவும், பிராந்திய ராணுவ நடவடிக்கைகளுக்காகவும் சவுதி அரேபியா குறிப்பிடத்தக்க ஆயுதக் கொள்முதல்களைச் செய்து வருகிறது. அமெரிக்க ஆயுதங்களை வாங்குவதன் மூலம், சவுதி அரேபியா தனது ராணுவ உள்கட்டமைப்பை வலுப்படுத்துவது மட்டுமல்லாமல், உலக அரசியலில் ஒரு முக்கிய பங்காளியாகவும் தன்னை நிலைநிறுத்திக் கொள்கிறது.
அமெரிக்காவில் இருந்து அதிகம் ஆயுதம் வாங்கும் நாடுகள்:
2020 தொடங்கி 2024 காலகட்டத்தில் அமெரிக்காவிடம் இருந்து அதிகளவில் ஆயுதங்களை வாங்கிய நாடுகள் கீழே பட்டியலிடப்பட்டுள்ளன.
- சவுதி அரேபியா - அமெரிக்காவின் மொத்த ஏற்றுமதியில் 12%
- உக்ரைன் - அமெரிக்காவின் மொத்த ஏற்றுமதியில் 9.3%
- கத்தார் - அமெரிக்காவின் மொத்த ஏற்றுமதியில் 7.7%
- குவைத் - அமெரிக்காவின் மொத்த ஏற்றுமதியில் 4.4%
- ஜப்பான் - 2019-23 காலகட்டத்தில் அமெரிக்காவின் மொத்த ஏற்றுமதியில் 9.5%
தலைப்பு செய்திகள்
ட்ரெண்டிங் செய்திகள்
