13 நாட்களுக்குப்பின் ஈரான் மீதான தாக்குதலை நிறுத்திய ட்ரம்ப்; ஏன் இந்த முடிவு.? இத்தனை காரணங்களா.?
தொடர்ச்சியாக 13 நாட்கள் அமெரிக்கா நடத்திய தாக்குதல்களுக்குப் பிறகு, ஈரான் மீதான புதிய தாக்குதல்களை அமெரிக்க அதிபர் டோனல்ட் ட்ரம்ப் நிறுத்தியுள்ளார். இதற்கான முக்கிய காரணத்தை தெரிந்துகொள்ளலாம்.
பல அமெரிக்க ஊடகங்களின் அறிக்கைகளின்படி, தொடர்ச்சியாக 13 நாட்கள் அமெரிக்கா நடத்திய தாக்குதல்களுக்குப் பிறகு, ஈரான் மீதான புதிய ராணுவத் தாக்குதல்களை நிறுத்த அமெரிக்க அதிபர் டொனால்ட் ட்ரம்ப் முடிவு செய்துள்ளார். இந்த முடிவிற்கு, ராஜதந்திர முயற்சிகள் நடைபெறவும், அமெரிக்காவின் ஏவுகணைப் பாதுகாப்பு கையிருப்பு குறைந்து வருவது குறித்த கவலைகளும், மோதல் மேலும் தீவிரமடையும் அபாயம் உள்ளிட்ட பல காரணங்கள் கூறப்படுகின்றன.
அறிக்கைகளின்படி, வெள்ளிக்கிழமை எடுக்கப்பட்ட இந்த முடிவு, கிட்டத்தட்ட இரண்டு வாரங்களாக நடைபெற்று வந்த அமெரிக்க தினசரி தாக்குதல்களுக்கு, முதல் முற்றுப்புள்ளி வைத்ததாகும். புதிய தாக்குதலுக்கான திட்டங்கள் கிடைத்தபோதிலும், வேறு எந்தப் புதிய தாக்குதல்களையும் தொடங்க வேண்டாம் என்று ட்ரம்ப் ராணுவத்திற்கு உத்தரவிட்டதாக ஆக்சியோஸ் செய்தி வெளியிட்டுள்ளது. இது, பேச்சுவார்த்தைகள் மற்றும் ஒரு ராஜதந்திரத் தீர்வை நோக்கிய ஒரு குறிப்பிடத்தக்க படியாகக் கருதப்படுகிறது.
ராணுவ நடவடிக்கை மீண்டும் தொடங்கப்படலாம் – அமெரிக்கா
எனினும், தேவைப்பட்டால் ராணுவ நடவடிக்கை மீண்டும் தொடங்கப்படலாம் என்றும் அமெரிக்கா தெளிவுபடுத்தியுள்ளது. இந்த முடிவு குறித்து வெள்ளை மாளிகை அதிகாரப்பூர்வமாக கருத்து தெரிவிக்கவில்லை, ஆனால், அதிபர் ட்ரம்ப் எப்போதும் ஒரு ராஜதந்திர தீர்வையே ஆதரித்து வருகிறார் என்று வெள்ளை மாளிகையின் தகவல் தொடர்பு இயக்குனர் ஸ்டீவன் செங் கூறினார். மேலும், ஹார்முஸ் ஜலசந்தியில் ஈரான் தனது நடவடிக்கைகளை அதிகரித்தாலோ அல்லது அமெரிக்காவின் நட்பு நாடுகளுக்கு எதிராக நடவடிக்கை எடுத்தாலோ, அனைத்து ராணுவ வழிமுறைகளும் திறந்தே இருக்கும் என்றும் அவர் குறிப்பிட்டார்.
ஒரு பெரும் போர் வெடிக்கக்கூடும் – ட்ரம்ப்
அறிக்கையின்படி, தற்போதைய ராணுவ நடவடிக்கை அதன் செயல்திறன் வரம்புகளை எட்டியுள்ளதாகவும், மேலும் பதற்றம் அதிகரித்தால், அது ஒரு பெரிய போருக்கு வழிவகுக்கும் என்றும் ட்ரம்ப் நம்பினார். பேச்சுவார்த்தைகளுக்கு அதிக வாய்ப்புகளை வழங்க அதிகர் விரும்பினார், ஆனால் பேச்சுவார்த்தைகள் தோல்வியுற்றால் குறுகிய காலத்திற்குள் ராணுவ நடவடிக்கையை மீண்டும் தொடங்கும் வாய்ப்பையும் அவர் தக்க வைத்துக் கொள்ள விரும்பினார் என்று வட்டாரங்கள் தெரிவித்தன.
வெள்ளிக்கிழமை செய்தியாளர்களிடம் பேசிய ட்ரம்ப், அமெரிக்கா முழுமையாக தயாராக உள்ளது. ஆனால், ஈரானுடன் ஒரு ஒப்பந்தத்தை எட்டுவதே மிகவும் விவேகமான பாதையாக இருக்கும் என்று நம்புவதாகக் கூறினார். அமெரிக்காவிற்கும் ஈரானுக்கும் இடையிலான பேச்சுவார்த்தைகள் தொடர்வதாகவும், காலம் செல்லச் செல்ல ஈரான் பேச்சுவார்த்தைகளில் அதிக தீவிரம் காட்டி வருவதாகவும் அவர் நம்புவதாகக் கூறினார்.
அமெரிக்க பாதுகாப்பு இருப்புகள் மீது அதிகரித்த அழுத்தம்
இந்த முடிவிற்குப் பின்னால் உள்ள ஒரு மற்றொரு முக்கிய காரணம், அமெரிக்க பாதுகாப்பு அமைப்பிற்குள் அதிகரித்து வரும் கவலைகள் என்று கூறப்படுகிறது. நியூயார்க் டைம்ஸ் அறிக்கையின்படி, இந்த நடவடிக்கையை மேலும் தீவிரப்படுத்துவது, அமெரிக்காவின் ஏவுகணை பாதுகாப்பு அமைப்பிற்கு கடுமையான அழுத்தத்தை ஏற்படுத்தும் என்று மூத்த ராணுவ அதிகாரிகள் எச்சரித்துள்ளனர்.
பேட்ரியாட் இடைமறிப்பு ஏவுகணைகள் மற்றும் பிற பாதுகாப்பு அமைப்புகள் அதிகளவில் பயன்படுத்தப்பட்டு வருவதாக அந்த அறிக்கை குறிப்பிடுகிறது. இந்த மோதல் நீண்ட காலம் தொடர்ந்தால், மத்திய கிழக்கில் நிலைநிறுத்தப்பட்டுள்ள அமெரிக்கப் படைகள், ராணுவத் தளங்கள் மற்றும் நட்பு நாடுகளின் பாதுகாப்புக்கு அச்சுறுத்தல் ஏற்படக்கூடும். கூட்டுப் படைத் தலைவர் ஜெனரல் டான் கெய்ன், ராணுவம் ஒரு பெரிய தாக்குதலைத் தொடுக்கும் திறன் கொண்டது. ஆனால், இது ஏவுகணை பாதுகாப்பு இருப்புகளை கடுமையாகப் பாதிக்கும் என்று ட்ரம்பிடம் தெரிவித்தார். அந்த அறிக்கையின்படி, அமெரிக்கா சமீபத்திய மாதங்களில் ஏற்கனவே 1,200-க்கும் மேற்பட்ட பேட்ரியாட் இடைமறிப்பு ஏவுகணைகளைப் பயன்படுத்தியுள்ளது. இது, பாதுகாப்பு இருப்புகள் மீதான அழுத்தத்தை அதிகரித்துள்ளது.
Before You Go
"வேதனையில் இருக்கும் சிறுவனை இப்டியா இமிடேட் செய்வது" கொந்தளித்த TRB ராஜா
தலைப்பு செய்திகள்
ட்ரெண்டிங் செய்திகள்
