G7 on Afghan : தலிபான் விவகாரம்...ஜி7 மாநாட்டில் என்ன நடந்தது? என்ன செய்யப் போகிறது அமெரி்க்கா?

ஆஃப்கானில் இருந்து இதுவரை சுமார் 70,700 பேரை அமெரிக்கப் படை அப்புறப்படுத்தியுள்ளது.

ஜி7 ஜோ பைடன்

அமெரிக்கப் படைகளை தொடர்ந்து ஆஃப்கானிஸ்தானில் வைத்திருக்கும் சர்வதேச நாடுகளின் யோசனையை ஜோ பைடன் நிராகரித்துள்ளார். தலிபான்களின் தீவிரவாத எச்சரிக்கையைக் காரணம் காட்டி அவர் சர்வதேச நாடுகளின் இந்த யோசனையை நிராகரித்துள்ளார். ஜி7 நாடுகளின் அதிபர்களுடன் நடந்த காணொளி ஆலோசனையில் அவர் இந்த முடிவை எட்டியுள்ளார். 

’ஆஃப்கானிஸ்தானில் எங்களது நடவடிக்கைகள் 31 ஆகஸ்ட்டுடன் முடித்துக்கொள்ளத் தயாராக இருக்கிறோம். எவ்வளவு விரைந்து முடிக்கிறோமோ..அவ்வளவு நல்லது. ஆஃப்கானில் இருக்கும் ஓவ்வொரு நாளும் அமெரிக்கப் படைகளுக்கு ஆபத்தை அதிகரிக்கிறது.ஆப்கானில் இருந்து மக்களை அப்புறப்படுத்தும் நோக்கத்தில் நாங்கள் உறுதியாக இருக்கிறோம்.ஆனால் அதே சமயம் அதில் இருக்கும் ஆபத்துகளையும் நாங்கள் கவனத்தில் கொள்ள வேண்டியிருக்கிறது’ என ஜி7 மாநாட்டில் அதிபர் பைடன் பேசியுள்ளார்.  ஆஃப்கானில் இருந்து இதுவரை சுமார் 70,700 பேரை அமெரிக்கப் படை அப்புறப்படுத்தியுள்ளது. 31ந் தேதி வரைதான் அமெரிக்கப் படைகள் ஆஃப்கானிஸ்தானில் இருக்கலாம் அதைக் கடந்து அவர்கள் இருந்தால் கடும் விளைவுகளைச் சந்திக்க வேண்டி இருக்கும் என தலிபான் செய்தித் தொடர்பாளர் எச்சரிகை விடுத்திருந்தார். 

முன்னதாக, ஆப்கானிஸ்தானில் தலிபான் ஆட்சி அமைந்துள்ள நிலையில், அங்கு முழுக்க முழுக்க இஸ்லாமிய சட்டப்படியே ஆட்சி அமையும் என்று தலிபான்கள் அறிவித்துள்ளனர். மேலும் தங்கள் தேசத்தை இனி இஸ்லாமிக் எமிரேட்ஸ் ஆஃப் ஆப்கானிஸ்தான் என்று அழைக்கலாம் என்றும் கூறியுள்ளனர். மேலும், ஆப்கனில் புதிய அரசு அமைக்கும் முயற்சியில் ஈடுபட்டுள்ள தலிபான்கள் அந்நாட்டின் முன்னாள் அதிபர் ஹமீத் கர்சாய் உள்ளிட்டோருடன் மீண்டும் பேச்சுவார்த்தை நடத்தியுள்ளனர். புதிய அரசில் ஹமீத் கர்சாயை இணைக்க வாய்ப்பு இருப்பதாகக் கூறப்படுகிறது.

தலிபான்கள் கையில் ஆட்சி சென்று ஒரு வாரத்துக்கு மேல் ஆகிவிட்ட நிலையிலும் அங்கிருந்து மக்கள் இன்னும் கூட்டம் கூட்டமாக வெளியேறி வருகின்றனர். அண்டை நாடுகள் எல்லைகளைத் திறந்து வைக்குமாறு ஐ.நா.வும் வேண்டுகோள் விடுத்துள்ளது. உலகமே ஆப்கான் நிலவரத்தை உற்றுக் கவனித்து வரும் சூழலில் தான் ஆப்கானிஸ்தான் தொடர்பாக அமெரிக்கா ஜி7 நாடுகளுடன் முக்கிய ஆலோசனைக்கு அழைப்பு விடுத்திருந்தது.முன்னேறிய நாடுகள் என்று கருதப்படும், வளர்ந்த பொருளாதாரங்களைக் கொண்ட ஏழு நாடுகள் இருக்கும் அமைப்பே ஜி7. அதாவது Group of Seven. இதில் கனடா, பிரான்ஸ், ஜெர்மனி, இத்தாலி, ஜப்பான், பிரிட்டன் மற்றும் அமெரிக்கா ஆகிய நாடுகள் இடம் பெற்றிருக்கின்றன

அந்த வகையில், இந்த ஆலோசனைக் கூட்டத்தில், ஜி7 நாட்டுத் தலைவர்களான பிரிட்டன் பிரதமர் போரிஸ் ஜான்சன், ஜெர்மனி பிரதமர் ஏஞ்செலா மெர்கெல், பிரான்ஸ் அதிபர் இமானுவேல் மேக்ரோன், இத்தாலி பிரதமர் மரியோ ட்ராகி உள்ளிட்டோர் கலந்து கொண்டனர். இந்த ஆலோசனைக் கூட்டம் தலிபான்கள் மத்தியிலும் எதிர்பார்ப்பை கூட்டியிருந்தது குறிப்பிடத்தக்கது.