Villupuram: கைலாசநாதர் கோவில் குளம் ஆக்கிரமிப்பு - அமைச்சர் சேகர் பாபுவுக்கு பக்தர்கள் விடுத்த கோரிக்கை..!

 விழுப்புரம் கைலாசநாதர் கோவில் குளம் ஆக்கிரமிப்பு செய்யப்பட்டு மாயமானது குறித்த ஆதாரம் இருந்தும், இந்து சமய அறநிலையத்துறை அதிகாரிகள் அகற்றாமல் மெத்தனப் போக்காக செயல்பட்டு வருகின்றனர்.

விழுப்புரம் கைலாசநாதர் கோவில் குளம் ஆக்கிரமிப்பு

விழுப்புரம் திரு.வி.க., வீதியில், பிரசித்தி பெற்ற கைலாசநாதர் கோவில் உள்ளது. இந்து சமய அறநிலையத் துறை கட்டுப்பாட்டில் உள்ள இக்கோவிலில், விழுப்புரம் நகரம் மட்டுமின்றி பல்வேறு பகுதிகளில் இருந்தும் பொதுமக்கள் சுவாமி தரிசனம் செய்து வருகின்றனர்.

இக்கோவிலுக்குச் சொந்தமான குளம், காமராஜர் மற்றும் திரு.வி.க., வீதியில் தலா 2 கடைகள் மற்றும் முத்தோப்பு அகரம்பாட்டையில் 31 வீடுகள், திரு.வி.க., வீதியில் 7 வீடுகள் என அசையா சொத்துக்கள் உள்ளது. இதில், கோவில் குளம் கடந்த 20 ஆண்டுகளாக ஆக்கிரமிப்பு செய்யப்பட்டு, தற்போது குளம் இருந்ததற்கான அடையாளமே காணப்படவில்லை. இந்த குளம் குறித்து கடந்த 2007ம் ஆண்டு கோவில் பிரதோஷ பேரவைத் தலைவர் நடராஜன் என்பவர் தகவல் அறியும் உரிமைச் சட்டத்தில் விபரம் கேட்டுள்ளார்.

அதற்கு, அப்போதைய இந்து சமய அறநிலையத்துறை இணை ஆணையராக இருந்த சுப்ரமணியன் பதில் அனுப்பியுள்ளார். அந்த பதிலில், கோவில் சொத்துக்கள் விபரம் மற்றும் புல எண் 5ல் கருங்கல்லால் ஆன குளம் இருந்தது. தற்போது மூடிய நிலையில் ஒரு சமூகத்தினர் ஆக்கிரமிப்பு செய்துள்ளதாக கூறியுள்ளார். இந்நிலையில், அனைத்து கோவில்களிலும் சொத்துக்கள் விபரங்களைத் தகவல் பலகையில் எழுத அரசு உத்தரவிட்டுள்ளது.

அதன்படி, கைலாசநாதர் கோவிலில் இந்து சமய அறநிலையத்துறை அதிகாரிகள் வைத்துள்ள தகவல் பலகையில், குளம் இருந்ததை குறிப்பிடவில்லை. அதிகாரிகள் ஏன் குளம் தொடர்பான விபரத்தை தகவல் பலகையில் எழுதவில்லை என பொதுமக்கள் கேள்வி எழுப்பியுள்ளனர். மேலும், கோவிலுக்குச் சொந்தமான குளம் ஆக்கிரமிப்பில் உள்ளதாக, அதிகாரிகள் பதில் கூறியுள்ளனர். அந்த ஆக்கிரமிப்பை அகற்றி, குளத்தை மீட்க, எவ்வித நடவடிக்கையும் எடுக்காமல் இந்து சமய அறநிலையத் துறை அதிகாரிகள் மெத்தனப் போக்காக செயல்பட்டு வருகின்றனர். எனவே, விழுப்புரத்தில் பிரசித்தி பெற்ற கைலாசநாதர் கோவில் குளத்தை மீட்க இந்து சமய அறநிலையத்துறை அமைச்சர் நடவடிக்கை எடுக்க வேண்டும் என பொதுமக்கள் கோரிக்கை விடுத்துள்ளனர்.

---

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூட்யூபில் வீடியோக்களை காண