வடலூரில் ரயில் முன் பாய்ந்து மாணவி தற்கொலை - நீட் தேர்வு அச்சம் காரணமா?

நீட் தேர்வுக்கான மாதிரி தேர்வு கடந்த சில நாட்களுக்கு முன்பு கோச்சிங் சென்டரில் நடத்தப்பட்டதாகவும், அதில் நிஷா குறைந்த மதிப்பெண் பெற்றதால் மன அழுத்தத்தில் இருந்து வந்ததாகவும் கூறப்படுகிறது.

மாதிரிப்படம்

நீட் தேர்வுக்காக பயிற்சி பெற்று வந்த மாணவி ரயில் முன் பாய்ந்து தற்கொலை செய்து கொண்ட சம்பவம் வடலூரில் பரபரப்பை ஏற்படுத்தி உள்ளது.

 

கடலூர் மாவட்டம் வடலூர் கோவிந்தசாமி நகர் பகுதியில் வசித்து வரும் உத்திராபதி. இவரது மகள் (17 வயது) நிஷா. இவர் நெய்வேலி இந்திரா நகர் ஆர்ச் கேட் பகுதியில் உள்ள தனியார் கோச்சிங் சென்டரில் நீட் தேர்வுக்கான பயிற்சியில் பயின்று வந்தார். 

 

இந்த ஆண்டுக்கான நீட் தேர்வு வருகின்ற மே மாதம் நடைபெற உள்ள நிலையில் நீட் தேர்வுக்கான மாதிரி தேர்வு கடந்த சில நாட்களுக்கு முன்பு கோச்சிங் சென்டரில் நடத்தப்பட்டதாகவும், அதில் நிஷா குறைந்த மதிப்பெண் பெற்றதால் மன அழுத்தத்தில் இருந்து வந்ததாகவும் கூறப்படுகிறது.

 

இந்நிலையில் பெங்களூரிலிருந்து காரைக்காலுக்கு செல்லும் பாசஞ்சர் ரயில் மாலை 5.30 மணி அளவில் வடலூர் வழியாக கடலூரை நோக்கி சென்ற பொழுது ரயில்வே தண்டவாளத்தில் நின்ற நிஷா, திடீரென ரயில் முன் பாய்ந்து தற்கொலை செய்து கொண்டார். தகவல் அறிந்த காவல் துறையினர் சம்பவ இடத்திற்கு விரைந்து சென்று தங்களது தரப்பு விசாரணையை மேற்கொண்டனர்.

 

பின்னர் வடலூர் போலீசார் அளித்த தகவலின் பெயரில் கடலூர் ரயில்வே போலீசார் உடலை கைப்பற்றி வழக்கு பதிவு செய்து விசாரணை மேற்கொண்டு வருகின்றனர். நீட் தேர்வு அச்சத்தால் இளம்பெண் தற்கொலை செய்து கொண்டார் அல்லது வேறு ஏதேனும் காரணமா என்பது தெரியாத நிலையில் ரயில் முன் பாய்ந்து கல்லூரி மாணவி தற்கொலை செய்து கொண்ட சம்பவம் வடலூர் பகுதியில் மிகுந்த சோகத்தை ஏற்படுத்தியுள்ளது.

 

Suicidal Trigger Warning..

வாழ்க்கையில் கவலைகளும், துன்பங்களும் வந்து கொண்டுதான் இருக்கும். அவைகளை தற்காலிகமாக்குவதும், நிரந்தரமாக்குவதும் நாம் கையாளும் விதத்தில் தான் உள்ளது. தற்கொலை என்பது எதற்கும் தீர்வு ஆகாது. வாழ்க்கைக்கான நோக்கத்தைப் பற்றிய தெளிவும் அதை அடைவதற்கான வழிகளையும் கண்டறிய துவங்கினால் வாழ்க்கை சுவாரஸ்யமானதாக இருக்கும். அப்படி தங்களுக்கு மன அழுத்தம் ஏற்பட்டாலோ தற்கொலை எண்ணம் உண்டானாலும் அதனை மாற்ற கீழ்காணும் எங்களுக்கு அழைக்கவும். மாநில உதவி மையம் :104.

சினேகா தன்னார்வ தொண்டு நிறுவனம்,
எண்; 11, பார்க் வியூவ் சாலை, ஆர்.ஏ. புரம்,
சென்னை - 600 028.
தொலைபேசி எண் - (+91 44 2464 0050, +91 44 2464 0060)

---

மேலும் செய்திகளை காண, ABP நாடு செய்திகளை Google News -ல் பின் தொடர இங்கே கிளிக் செய்யவும்

ABP நாடு செய்திகளை சமூக வலைத்தள பக்கங்களிலும் பின் தொடரலாம்

பேஸ்புக் பக்கத்தில் தொடர

ட்விட்டர் பக்கத்தில் தொடர

யூடியூபில் வீடியோக்களை காண