திருச்செந்தூர் சூரசம்ஹாரம்: விடுமுறை அறிவித்த ஆட்சியர்! பக்தர்களின் மகிழ்ச்சிக்கு காரணம் என்ன? முழு விபரம் இதோ!

 திருச்செந்தூர் முருகன் கோயிலில் வரும் 27 ஆம் தேதி சூரசம்ஹாரம் நிகழ்வையொட்டி தூத்துக்குடி மாவட்டத்திற்கு அன்று விடுமுறை அறிவிக்கப்பட்டுள்ளது.

தூத்துக்குடி ஆட்சியர் இளம்பகவத்

Source : ABPLIVE AI

முருகப்பெருமானின் ஆறுபடை வீடுகளில் இரண்டாம் படை வீடான திருச்செந்தூர் சுப்பிரமணிய சுவாமி திருக்கோயிலில் நடைபெறும் சூரசம்ஹாரம் மிகவும் பிரசித்தி பெற்றது. திருச்செந்தூர் முருகன் கோயிலில் வரும் 27 ஆம் தேதி அன்று சூரசம்ஹாரம் நிகழ்வு நடைபெற உள்ளது. இந்த நிகழ்வை முன்னிட்டு  தூத்துக்குடி மாவட்டத்திற்கு திங்கட்கிழமை அன்று விடுமுறை அளிக்கப்பட்டுள்ளது. 

தூத்துக்குடி மாவட்ட ஆட்சியரின் அறிவிப்பால் மக்கள் மகிழ்ச்சியில் உள்ளனர். திருச்செந்தூர் கடற்கரையில் தான் சூரபத்மனை முருகப்பெருமான் வதம் செய்ததாக நம்பப்படுகிறது. இந்த நிகழ்வின் முக்கிய நிகழ்வான சூரசம்ஹாரம் வரும் அக்டோபர் 27ஆம் தேதியும், திருக்கல்யாணம் வைபவம் வரும் அக்டோபர் 28ஆம் தேதியும் நடைபெற உள்ளது. இதனை முன்னிட்டு தூத்துக்குடி மாவட்ட ஆட்சியர் 27ஆம் தேதி விடுமுறை அளித்துள்ளார். ஆனால் அத்தியாவசியப் பணிகளில் ஈடுபடும் பணியாளர்கள் மற்றும் அலுவலகங்களுக்கு இந்த விடுமுறை பொருந்தாது என அறிவிக்கப்பட்டுள்ளது.

அன்றைய தினம் அளிக்கப்படும் உள்ளூர் விடுமுறைக்கு ஈடுசெய்ய இரண்டாம் சனிக்கிழமையான நவம்பர் 8ம் தேதி அன்று வேலை நாளாக அறிவிக்கப்பட்டுள்ளது. திருச்செந்தூர் முருகன் கோயிலில் நடைபெறும் உலகப் புகழ்பெற்ற சூரசம்ஹாரத்தைக் காண லட்சக்கணக்கான பக்தர்கள் கூடுவார்கள் என்பதால், தூத்துக்குடி மாவட்ட நிர்வாகம் இந்த விடுமுறையை அறிவித்துள்ளது. திருச்செந்தூரில் கந்த சஷ்டி விழா மொத்தம் 12 நாட்கள் நடைபெறும். அதன்படி, அக்டோபர் 22ஆம் தேதி கந்த சஷ்டி விழா தொடங்கப்பட்டது. அக்டோபர் 23ஆம் தேதி முதல் அக்டோபர் 26ஆம் தேதி வரை விரத நாட்கள் (சஷ்டி விரதம்) கடைப்பிடிக்கப்படும்.

இந்த நிகழ்வின் முக்கிய தினமாக சூரசம்ஹாரம் அக்டோபர் 27ஆம் தேதி நடைபெற உள்ளது. அதிகாலை நடை திறப்பு, யாக சாலை பூஜை நிறைவு. மாலை 4:30 மணிக்கு சுவாமி ஜெயந்திநாதர் கடற்கரையில் எழுந்தருளி சூரபத்மனை வதம் செய்யும் சூரசம்ஹாரம் நடைபெறும்.அக்டோபர் 28ஆம் தேதி திருக்கல்யாணம் நடைபெற உள்ளது. அதிகாலை நடை திறப்பு. மாலை 6:30 மணிக்கு தெய்வானை அம்மனுக்கு சுவாமி காட்சி கொடுத்தல் மற்றும் மாலை மாற்றும் வைபவம் நடைபெறும். இரவு 11 மணிக்கு சுவாமி குமரவிடங்கப் பெருமானுக்கும், தெய்வானை அம்மனுக்கும் திருக்கல்யாணம் நடைபெறும். அக்டோபர் 29ஆம் தேதி முதல் நவம்பர் 01ஆம் தேதி வரை ஊஞ்சல் சேவை நடைபெறும். பின்னர் நவம்பர் 2ஆம் தேதி ஊஞ்சல் சேவை மற்றும் விடையாற்றியுடன் விழா நிறைவுபெறும்.