தஞ்சையில் மாற்றுத்திறனாளிகளுக்கு உதவி உபகரணங்கள் வழங்க பயனாளிகள் தேர்வு செய்யும் முகாம்

இதுவரை உதவிகள் பெறாதவர்களுக்காக முகாம்கள் நடத்தப்பட்டு அவர்களுக்கு தேவையான கருவிகள் வழங்கப்பட்டு வருகிறது.

மாற்றுத்திறனாளி

தஞ்சாவூர்: தஞ்சாவூர் மாவட்டத்தில் மாற்றுத்திறனாளிகளுக்கு உதவி உபகரணங்கள் வழங்க பயனாளிகள் தேர்வு முகாம் நடைபெற உள்ளது. இதில் தகுதியுள்ள மாற்றுத்திறனாளிகள் கலந்து கொண்டு பயன்பெற வேண்டும் என்று மாவட்ட கலெக்டர் தினேஷ் பொன்ராஜ் ஆலிவர் தெரிவித்துள்ளார்.

மாற்றுத்திறனாளிகள் நலனுக்காக பல்வேறு வகையிலும் உதவிகள் செய்யப்பட்டு வருகிறது. செயற்கை கால், மடக்கு சக்கர நாற்காலி, மூன்று சக்கர சைக்கிள், ஊன்றுகோல், மூளை முடக்கு வாதத்தால் பாதிக்கப்பட்டோருக்கான சக்கர நாற்காலி, ரோலேட்டர் என்று பல்வேறு வகையிலும் உதவிகள் செய்யப்பட்டு வருகின்றன. மேலும் இதுவரை உதவிகள் பெறாதவர்களுக்காக முகாம்கள் நடத்தப்பட்டு அவர்களுக்கு தேவையான கருவிகள் வழங்கப்பட்டு வருவதும் குறிப்பிடத்தக்கது.  

அந்த வகையில் தஞ்சாவூர் மாவட்டத்தில் மாற்றுத்திறனாளிகள் நலத்துறை மற்றும் NIEPMD நிறுவனம் இணைந்து நடத்தும் மாற்றுத்திறனாளிகளுக்கு உதவி உபகரணங்கள் பயனாளிகள் தேர்வு செய்வதற்கான மதிப்பீட்டு முகாம் 4 இடங்களில் நடைபெற உள்ளது.

சென்னை முட்டுகாடு பகுதியில் செயல்பட்டு தேசிய பல்வகை மாற்றுத்திறனாளிகளுக்கான (NIEPMD) நிறுவனத்திருந்து உபகரணங்கள் தேர்வு செய்வதற்கான குழுக்கள் முகாமில் கலந்து கொண்டு பயனாளிகளை தேர்வு செய்ய உள்ளனர்.

இம்முகாம்களில் முட நீக்கு சாதனம், செயற்கை கால், மடக்கு சக்கர நாற்காலி, மூன்று சக்கர சைக்கிள், ஊன்றுகோல், மூளை முடக்கு வாதத்தால் பாதிக்கப்பட்டோருக்கான சக்கர நாற்காலி, ரோலேட்டர், மனவளர்ச்சி குன்றியவர்களுக்கான பயிற்சி சாதனம் (TLM Kit) பார்வையற்றோருக்கு பிரெய்லி வாட்ச், பிரெய்சி சிலேட், டெய்சி பிளேயர், மற்றும் காதொலி கருவி, போன்ற உபகரணங்களில் அவர்களின் தகுதிக்கேற்ப தேர்வு செய்து வழங்கப்பட உள்ளது.

நாளை 26ம் தேதி திருவிடைமருதூர் வட்டம் ஆடுதுறை வீர சோழன் கோசி மணிமண்டப வளாகம், 27ம் தேதி கும்பகோணம் சங்கமம் மஹால் இரங்கா நகர் சாக்கோட்டை, 28ம் தேதி பட்டுக்கோட்டை வடச்சேரி ரோடு பகுதியில் உள்ள திரிஸ்டார் திருமண மஹாலில் நடைபெற உள்ளது.

தஞ்சாவூர் மாவட்டத்தில் உதவி உபகரணங்கள் தேவைப்படும் மாற்றுத்திறனாளிகள், ஆதார் அட்டை நகல் மாற்றுத்திறனாளிகளுக்கான அடையாள அட்டை நகல், UDID கார்டு நகல், கை பேசி எண், வருமானச்சான்று மற்றும் இரண்டு புகைப்படம் ஆகியவற்றுடன் முகாமில் கலந்துகொண்டு பயன்பெறலாம். மேலும் முகாம் பற்றிய தகவல் 04362-236791 என்ற தொலை பேசி எண்ணில் தகவல் பெறலாம்.

எனவே தஞ்சாவூர் மாவட்டத்தைச் சேர்ந்த உபகரணங்கள் தேவைப்படும் மனவளர்ச்சி குன்றிய, பார்வைத்திறன் பாதிக்கப்பட்ட, கால் பாதிக்கப்பட்ட செவித்திறன் பாதிக்கப்பட்ட உள்ள அனைத்து மாற்றுத்திறனாளிகளும் மதிப்பீட்டு முகாமில் கலந்துகொண்டு தங்களுக்கு தேவைப்படும் உதவி உபகரணம் குறித்து பதிவு செய்து பயன்பெறுமாறு கேட்டுக் கொள்ளப்படுகின்றனர்.  இவ்வாறு மாவட்ட கலெக்டர் தினேஷ் பொன்ராஜ் ஆலிவர் தெரிவித்துள்ளார்.