கறிக்கோழி விற்பனைக்கு ஒரு வாரம் முழு தடை? கோழி வணிகர்கள் எச்சரிக்கை!

கோழி கழிவுகளை அறிவியல் முறையில் அகற்றுவதற்காக அனைத்து மாவட்டங்களிலும் நவீன கழிவு மேலாண்மை மையங்களை அமைக்க அரசு அனுமதி வழங்க வேண்டும்

தஞ்சாவூரில் கோழி வணிகர்கள் கூட்டமைப்பு கூட்டம்

Source : Abpnadu Original

தஞ்சாவூர்: தீவனக் கட்டுப்பாடு நெறிமுறைகளை அரசு உடனடியாக அமல்படுத்த வேண்டும். இல்லையெனில் மாநிலம் முழுவதும் கோழி இறைச்சி விற்பனையை நிறுத்துவோம் என தமிழ்நாடு கோழி வணிகர்களின் கூட்டமைப்பு எச்சரிக்கை விடுத்து அறிவித்துள்ளது. 

கறிக்கோழி உற்பத்தி மற்றும் விற்பனையில் தரநிலையை உறுதி செய்யவும், நுகர்வோர் நலனை பாதுகாக்கவும், அரசு வகுத்துள்ள தீவனக் கட்டுப்பாடு நெறிமுறைகள் முழுமையாக நடைமுறைப்படுத்தப்பட வேண்டும் என்ற வலியுறுத்தலுடன் தமிழ்நாடு கோழி வணிகர்களின் கூட்டமைப்பு முக்கிய தீர்மானங்களை நிறைவேற்றியுள்ளது. இந்த கோரிக்கைகள் புறக்கணிக்கப்படும் பட்சத்தில், மாநிலம் முழுவதும் ஒரு வார காலத்திற்கு கோழி இறைச்சி விற்பனையை நிறுத்தும் போராட்டத்தில் ஈடுபடுவதாகவும் கூட்டமைப்பு எச்சரிக்கை விடுத்துள்ளது.

தஞ்சாவூரில் நடைபெற்ற மாநில செயற்குழு கூட்டத்தில் இந்த முக்கிய தீர்மானங்கள் ஒருமனதாக நிறைவேற்றப்பட்டன. மாநிலத்தின் பல்வேறு மாவட்டங்களைச் சேர்ந்த ஏராளமான கோழி வணிகர்கள் கலந்து கொண்ட இந்த கூட்டத்திற்கு மாநிலத் தலைவர் பி. துரைராஜ் தலைமை வகித்தார். மாநில செயலாளர் எம். சுந்தரலிங்கம் முன்னிலை வகித்த நிலையில், மாநில பொருளாளர் எஸ். ஜான் கென்னடி நன்றி தெரிவித்தார்.

15 மணி நேர தீவனக் கட்டுப்பாடு அவசியம்

கூட்டத்திற்குப் பிறகு செய்தியாளர்களிடம் பேசிய மாநிலத் தலைவர் பி. துரைராஜ், கறிக்கோழிகளை சந்தைக்கு அனுப்புவதற்கு குறைந்தது 15 மணி நேரத்திற்கு முன்பே தீவனம் வழங்குவதை நிறுத்த வேண்டும் என்ற நடைமுறை கட்டாயமாக பின்பற்றப்பட வேண்டும் என்று வலியுறுத்தினார்.

தற்போது சில உற்பத்தியாளர்கள் விற்பனைக்கு முன்புவரை கோழிகளுக்கு தீவனம் வழங்குவதால், இயற்கைக்கு மாறாக எடை அதிகரித்து விற்பனை செய்யப்படுவதாகவும், இதனால் வணிகத்தில் சமநிலை பாதிக்கப்படுவதோடு, நுகர்வோரும் மறைமுகமாக பாதிக்கப்படுவதாகவும் அவர் குறிப்பிட்டார்.

சுற்றுச்சூழல் மற்றும் சுகாதார பாதிப்பு

விற்பனைக்கு முன்பு அதிகளவில் தீவனம் வழங்கப்படும் கோழிகளின் உடலில் தீவனக் கழிவுகள் முழுமையாக ஜீரணமடையாமல் இருப்பதால், போக்குவரத்து மற்றும் இறைச்சி பதப்படுத்தும் இடங்களில் அதிகளவில் கழிவுகள் வெளியேறுகின்றன. இது சுற்றுச்சூழல் மாசுபாட்டை ஏற்படுத்துவதோடு, சுகாதாரத்திற்கும் சவாலாக மாறுகிறது என கூட்டத்தில் கவலை தெரிவிக்கப்பட்டது.

இதனைத் தவிர்க்க, அரசு அனைத்து மண்டல மற்றும் மாவட்ட கால்நடைத் துறை அதிகாரிகளுக்கும் தெளிவான வழிகாட்டுதல்களை வழங்கி, தீவனக் கட்டுப்பாட்டு நடைமுறையை கடுமையாக அமல்படுத்த வேண்டும் என்று கூட்டமைப்பு வலியுறுத்தியுள்ளது.

கோரிக்கை ஏற்காவிட்டால் விற்பனை நிறுத்தம்

தங்களது கோரிக்கைகள் மீது அரசு உரிய நடவடிக்கை எடுக்காத பட்சத்தில், மாநிலம் முழுவதும் ஒரு வார காலத்திற்கு கோழி இறைச்சி விற்பனையை முழுமையாக நிறுத்தும் போராட்டத்தை முன்னெடுக்க தீர்மானிக்கப்பட்டுள்ளதாகவும் மாநிலத் தலைவர் தெரிவித்தார். இந்த போராட்டம் மூலம் உற்பத்தியாளர்கள் மற்றும் அரசின் கவனத்தை ஈர்க்க முயற்சிக்கப்படுவதாகவும் அவர் கூறினார்.

பிற முக்கிய கோரிக்கைகள்

மகாவீர் ஜெயந்தி, வள்ளலார் தினம் உள்ளிட்ட சில நாட்களில் கோழி இறைச்சி விற்பனைக்கு விதிக்கப்படும் கட்டுப்பாடுகளை நீக்கி, ஆண்டு முழுவதும் அனைத்து நாட்களிலும் விற்பனை செய்ய அனுமதி வழங்க வேண்டும் என்றும் கூட்டமைப்பு கோரிக்கை விடுத்துள்ளது.

அதேபோல், கோழி கழிவுகளை அறிவியல் முறையில் அகற்றுவதற்காக அனைத்து மாவட்டங்களிலும் நவீன கழிவு மேலாண்மை மையங்களை அமைக்க அரசு அனுமதி வழங்க வேண்டும் என்றும் வலியுறுத்தப்பட்டுள்ளது. இதன்மூலம் சுற்றுச்சூழல் பாதுகாப்பு மேம்படுவதோடு, பொதுச் சுகாதாரமும் உறுதி செய்யப்படும் என்று வணிகர்கள் தெரிவித்தனர்.

இந்த தீர்மானங்கள் நடைமுறைக்கு வந்தால் கோழி விற்பனைத் துறையில் ஒழுங்குமுறை ஏற்படுவதோடு, நுகர்வோருக்கும் தரமான இறைச்சி கிடைக்கும் என வணிகர்கள் நம்பிக்கை தெரிவித்துள்ளனர். அதே நேரத்தில், ஒரு வார விற்பனை நிறுத்த அறிவிப்பு நடைமுறைக்கு வந்தால், கோழி இறைச்சி சந்தையில் தற்காலிக தட்டுப்பாடு மற்றும் விலை மாற்றம் ஏற்பட வாய்ப்புள்ளதாகவும் வணிக வட்டாரங்கள் கருதுகின்றன.