VCK: விடுதலைச் சிறுத்தைகள் தனித்துப் போட்டி! திருமா அதிரடி அறிவிப்பு - எந்தெந்த தொகுதிகளில்?

விடுதலைச் சிறுத்தைகள் கட்சி பாண்டிச்சேரியில் 3 தொகுதிகளில் தனித்துப் போட்டியிட உள்ளதாக திருமாவளவன் அறிவித்துள்ளார்.

திருமாவளவன்

Source : Twitter

புதுச்சேரியில் சட்டமன்ற தேர்தல் வரும் ஏப்ரல் 9ம் தேதி நடைபெறுகிறது. இதற்கான வேட்புமனுத் தாக்கல் நிறைவு பெற்ற நிலையில், அந்த மாநிலத்தில் திமுக - காங்கிரஸ் கூட்டணி தொகுதிப் பங்கீடு இன்னும் நிறைவடையவில்லை. 

இந்த சூழலில், பாண்டிச்சேரியில் உள்ள 30 தொகுதிகளில் விடுதலைச் சிறுத்தைகள் கட்சி 3 தொகுதிகளில் தனித்துப் போட்டியிடுவதாக இன்று திருமாவளவன் போட்டியிட்டுள்ளார். இதுதொடர்பாக, அவர் இன்று வெளியிட்டுள்ள அறிக்கையில் கூறியிருப்பதாவது,

கூட்டணி கட்சிகள் ஒத்துழைப்பு இல்லை:

புதுச்சேரி மாநிலத்தில் மதச்சார்பற்ற முற்போக்குக் கூட்டணியில் விடுதலைச் சிறுத்தைகள் கட்சி கடந்த பல ஆண்டுகளாக அங்கம் வகித்து சட்டப்பேரவைத் தேர்தல்களை சந்தித்து வருகிறது. 2001 ஆம் ஆண்டு இரண்டு தொகுதிகளில் திமுக தலைமையிலான கூட்டணியில் போட்டியிட்டோம். 

கடந்த 2021 ஆம் ஆண்டு தேர்தலில் உழவர்கரை பொதுத் தொகுதியை மட்டுமே காங்கிரஸ் ஒதுக்கியது. கூட்டணிக்கு நெருக்கடி வரக்கூடாது என்ற வகையில் அப்போது அதனை ஏற்றுக்கொண்டு போட்டியிட்டோம். ஆனால், கூட்டணிக் கட்சிகளின் ஒத்துழைப்பு கிடைக்கவில்லை. எனினும், சுமார் 6 ஆயிரம் வாக்குகளுக்கு மேலாக பெற்றோம்.

மன உளைச்சல்:

தற்போது நடைபெற உள்ள சட்டப்பேரவைத் தேர்தலில் விடுதலைச் சிறுத்தைகள் கட்சி 3 தொகுதிகளைக் கோரியிருந்தது. நீண்ட இழுபறிக்குப் பின்னர் வேட்புமனுத் தாக்கல் முடிந்த பிறகே காங்கிரஸ் கட்சிக்கும் திமுகவுக்கும் இடையிலான தொகுதி எண்ணிக்கை முடிவு செய்யப்பட்டுள்ளது. கூட்டணியில் அதிக இடங்களில் போட்டியிடும் காங்கிரஸ் கட்சி மற்ற கூட்டணிக் கட்சிகளுக்குத் தொகுதிகளை ஒதுக்க முன் வரவில்லை. திமுக தரப்பிலிருந்து ஒரு தொகுதியை விசிக'வுக்கு ஒதுக்க முன்வந்துள்ளது. இருந்த போதிலும் வேடபு மனு தாக்கல் முடிந்த பிறகும் கூட அது எந்தத் தொகுதி என்பது இன்னும் உறுதியாகவில்லை. 

விடுதலைச் சிறுத்தைகள் கட்சி, சிபிஐ வேட்பு மனு தாக்கல் செய்துள்ள தொகுதிகள் அனைத்திலும் காங்கிரஸ் கட்சியும் வேட்புமனு தாக்கல் செய்துள்ளது. விசிக'வுக்கு இதுவரை எந்தத் தொகுதி என்பதே தெரியாத நிலையில் எமது கட்சி நிர்வாகிகள் தேவையற்ற மன உளைச்சலுக்கு ஆளாகியுள்ளனர்.  

3 தொகுதிகளில் தனித்துப் போட்டி:

எனவே, விசிக சார்பில் தற்போது வேட்புமனுத் தாக்கல் செய்துள்ள ஊசுடு, நெட்டப்பாக்கம் மற்றும் உழவர்கரை ஆகிய மூன்று தொகுதிகளிலும் தனித்துப் போட்டியிட முடிவு செய்துள்ளோம். நாங்கள் போட்டியிடாத மற்ற தொகுதிகளில் மதச்சார்பற்ற முற்போக்குக் கூட்டணி வேட்பாளர்களுக்கு ஆதரவு அளிக்கப்படும் . 

இவ்வாறு அவர் தெரிவித்துள்ளார்.

இந்த 3 தொகுதிகளில் நெட்டப்பாக்கம், ஊசுடு ஆகிய 2 தொகுதிகளும் தனித்தொகுதி ஆகும். உழவர்கரை தொகுதி பொதுத்தொகுதி ஆகும். பாண்டிச்சேரியில் காங்கிரஸ் கட்சியினர் இதுவரை திமுக-விற்கு ஒத்துழைப்பு அளிக்காமல் நெருக்கடி அளித்து வருவதே தொகுதிப் பங்கீட்டிற்கு இழுபறியாவதற்கு காரணம் ஆகும்.