புதுசா.. பெருசா.. ஃப்ரெஷ்ஷா.. அதிரடி மாற்றங்களுடன் ஹூண்டாய் க்ரெட்டா SUV: டிசைன், இன்ஜின், மைலேஜ்!

இந்த புதிய க்ரெட்டா, ஹூண்டாயின் K3 பிளாட்ஃபார்மில் கட்டமைக்கப்பட உள்ளது. இதனால் கேபினில் பயணிகளுக்குக் கூடுதல் இடவசதி கிடைப்பதுடன், காரின் உறுதித்தன்மை மற்றும் ஓட்டுநர் அனுபவமும் மேம்படும்.

புது கிரெட்டா

Source : சிறப்பு ஏற்பாடு

புதிய தலைமுறை ஹூண்டாய் க்ரெட்டா: வடிவமைப்பு, இன்ஜின் மற்றும் சிறப்பம்சங்கள் குறித்த முழு விவரம்

இந்திய சந்தையில் மிகவும் பிரபலமான மிட்-சைஸ் எஸ்யூவி-யான ஹூண்டாய் க்ரெட்டாவின் புதிய தலைமுறை மாடலை உருவாக்கும் பணிகளில் நிறுவனம் ஈடுபட்டுள்ளது. இதற்கான சோதனை ஓட்டங்கள் ஏற்கனவே தொடங்கிவிட்டன. இந்த புதிய காரில் வெளிப்புறம், உட்புறம் மற்றும் பிளாட்ஃபார்ம் என பெரிய அளவிலான முக்கிய மாற்றங்கள் செய்யப்பட உள்ளன.

வடிவமைப்பில் என்னென்ன மாற்றம்?

தற்போதைய மாடலின் வளைவான வடிவமைப்பிற்கு பதிலாக, புதிய மாடல் சதுர வடிவிலான மற்றும் கம்பீரமான தோற்றத்தைப் பெறும் வகையில் உருவாக்கப்பட்டுள்ளது. முந்தைய மாடலை விட இது அளவில் சற்று பெரியதாக இருக்கும். முழுமையாக மறைக்கப்பட்ட நிலையில் சோதனை செய்யப்பட்டதால் முழு விவரங்களும் தெரியவில்லை என்றாலும், காரின் முன்புறத்தில் புதிய லைட் பார் மற்றும் பெரிய கிரில் இடம்பெறும் எனத் தெரிகிறது. பின்புறத்தில் புதிய எல்இடி டெயில்லைட்கள் மற்றும் புதிய டெயில்கேட் வழங்கப்பட உள்ளன.

உட்புறம் மற்றும் சிறப்பம்சங்கள்

கேபினில் முற்றிலும் புதிய டேஷ்போர்டு அமைப்பு மற்றும் புதிய சீட் கவர் டிசைன்கள் இடம்பெறும். பெரிய டிஜிட்டல் திரை, மேம்படுத்தப்பட்ட ப்ளூலிங்க் கனெக்டட் கார் வசதிகளுடன் உட்புறம் மிகவும் நவீனமாகவும், பிரீமியமாகவும் வடிவமைக்கப்படும். தற்போதுள்ள 10.25 இன்ச் டச்ஸ்க்ரீன், 10.25 இன்ச் டிஜிட்டல் இன்ஸ்ட்ருமென்ட் கிளஸ்டர், பனோரமிக் சன்ரூஃப், வென்டிலேட்டட் சீட்டுகள், 360 டிகிரி கேமரா, லெவல் 2 ADAS, டூயல் ஜோன் கிளைமேட் கண்ட்ரோல் மற்றும் பிரீமியம் ஆடியோ சிஸ்டம் போன்ற வசதிகள் புதிய மாடலில் மேலும் மேம்படுத்தப்பட்டு வழங்கப்படும்.

பிளாட்ஃபார்ம் மற்றும் இன்ஜின்

இந்த புதிய க்ரெட்டா, ஹூண்டாயின் K3 பிளாட்ஃபார்மில் கட்டமைக்கப்பட உள்ளது. இதனால் கேபினில் பயணிகளுக்குக் கூடுதல் இடவசதி கிடைப்பதுடன், காரின் உறுதித்தன்மை மற்றும் ஓட்டுநர் அனுபவமும் மேம்படும். இன்ஜினைப் பொறுத்தவரை, தற்போதுள்ள 1.5 லிட்டர் பெட்ரோல், 1.5 லிட்டர் டர்போ-பெட்ரோல் மற்றும் 1.5 லிட்டர் டீசல் ஆகிய இன்ஜின் ஆப்ஷன்களே புதிய மாடலிலும் தொடரும் என எதிர்பார்க்கப்படுகிறது. மேலும், இதில் ஹைபிரிட் (Hybrid) இன்ஜின் தொழில்நுட்பம் வழங்கப்படலாம் என்றும் கூறப்படுகிறது; இருப்பினும் இது அதிகாரப்பூர்வமாக உறுதிப்படுத்தப்படவில்லை.

எதிர்பார்க்கப்படும் அறிமுகம்

புதிய க்ரெட்டாவின் வெளியீட்டு தேதியை நிறுவனம் அதிகாரப்பூர்வமாக அறிவிக்கவில்லை. இருப்பினும், சோதனை ஓட்டங்களை வைத்துப் பார்க்கையில் 2027ஆம் ஆண்டு வாக்கில் இது இந்திய சந்தையில் அறிமுகமாகலாம். மேற்கண்ட தகவல்கள் அனைத்தும் சோதனை மற்றும் அறிக்கைகளின் அடிப்படையிலானவை என்பதால், அறிமுகத்தின்போது இதன் இறுதி விவரங்களில் மாறுபாடுகள் இருக்கக்கூடும் என்று தெரிவிக்கப்பட்டுள்ளது.