கரூர் மாயனூர் கதவணையில் இருந்து காவிரி ஆற்றில் ஒரு லட்சம் கனஅடி தண்ணீர் திறப்பு

மாயனூர் கதவணையில் இருந்து காவிரி ஆற்றிற்கு ஒரு லட்சத்து, 953 கன அடி தண்ணீர் திறக்கப்பட்டுள்ளது. மேலும் 4 பாசன வாய்க்காலில் 1,220 கன அடி தண்ணீர் திறக்கப்பட்டது.

மாயனூர் கதவணையிலிருந்து தண்ணீர் திறக்கப்பட்டுள்ள காட்சி.

மாயனூர் கதவணையில் இருந்து காவிரி ஆற்றில் ஒரு லட்சம் கனஅடி தண்ணீர் திறக்கப்பட்டுள்ளது. காவிரி நீர் பிடிப்பு பகுதிகளில் பெய்து வரும் மழையின் காரணமாக கடந்த சில நாட்களாக மேட்டூர் அணைக்கு நீர் வரத்து படிப்படியாக அதிகரித்துக் கொண்டே வருகிறது. இதனால் காவிரி ஆற்றில் வெள்ளப்பெருக்கு ஏற்பட்டுள்ளது. கடந்த 26 ஆம் தேதி அணைக்கு வினாடிக்கு 50 ஆயிரம் கன அடி வீதம் தண்ணீர் வந்து கொண்டு இருந்தது. இந்நிலையில் காலை வினாடிக்கு 60 ஆயிரம் கன அடியாகவும், மாலையில் வினாடிக்கு 80 ஆயிரம்  கனடியாகவும் அதிகரித்தது. பின்னர் இரவில் வினாடிக்கு ஒரு லட்சம் கனஅடியாக அதிகமானது. காலை வினாடிக்கு ஒரு லட்சத்து 10 ஆயிரம் கன அடியாக உயர்ந்தது. இதனால் சேலம், நாமக்கல், ஈரோடு, கரூர், திருச்சி உட்பட 11 மாவட்டங்களுக்கு வெள்ள அபாய எச்சரிக்கை விடப்பட்டது.

மேட்டூரில் இருந்து விடப்பட்ட தண்ணீரின் காரணமாக மாயனூர் கதவணைக்கு வரும் தண்ணீரின் அளவு ஒரு லட்சம் கன அடியாக அதிகரித்துள்ளது. மாயனூர் கதவணைக்கு வினாடிக்கு ஒரு லட்சத்து 2 ஆயிரத்து, 173 கன அடி தண்ணீர் வந்தது. இதனால் மாயனூர் கதவணையில் இருந்து காவிரி ஆற்றிற்கு ஒரு லட்சத்து, 953 கன அடி தண்ணீர் திறக்கப்பட்டுள்ளது. மேலும் 4 பாசன வாய்க்காலில் 1,220 கன அடி தண்ணீர் திறக்கப்பட்டது. காவிரி ஆற்றில் திடீரென வெள்ளப்பெருக்கு ஏற்பட்டுள்ளதால், பொதுமக்கள் யாரும் காவிரி ஆற்றில் குளிக்கவோ, துணி துவைக்கவோ இறங்க வேண்டாம் என நீர்வளத்துறை அதிகாரிகள் கேட்டுக் கொண்டுள்ளனர். மேட்டூர் தண்ணீரால் தற்போது மாயனூர் கதவணை கடல் போல் காட்சியளிக்கிறது.

மேட்டூர் அணையில் இருந்து திறந்து விடப்பட்ட தண்ணீர், கரூர் மாவட்டம் நொய்யல் மரவாபாளையம், சேமங்கி, பூங்கோடை வழியாக தவிட்டுப்பாளையம் காவிரி ஆற்றின் குறுக்கே கட்டப்பட்டுள்ள பாலம் வழியே சென்று கொண்டிருக்கிறது. இங்கிருந்து காவிரி ஆற்றில் வெள்ள நீர் இரு கரைகளையும் தொட்டபடி திருச்சியை நோக்கி சென்று கொண்டிருக்கிறது. காவிரி ஆற்றுக்கு செல்லும் வழியில் வருவாய்த்துறை சார்பில் தடுப்புகள் அமைக்கப்பட்டுள்ளது. மேலும், காவிரி ஆற்றுக்குச் சென்று குளிக்கவும், மீன்பிடிக்கவும், நீச்சல் அடிக்கவும் தடை விதிக்கப்பட்டுள்ளதாக பதாகைகள் வைக்கப்பட்டுள்ளது. காவிரி ஆற்றில் மீண்டும் வெள்ளப்பெருக்கு ஏற்பட்டுள்ளதால் காவிரி ஆற்றின் இரு கரைகளையும் தொட்டுச் செல்லும் தண்ணீரை பொதுமக்கள்  பார்த்துச் சென்றனர்.

அமராவதி அணையில் இருந்து திறக்கப்பட்டுள்ள தண்ணீரும், காவிரி ஆற்றில் சேர்ந்து, மாயனூர் கதவணைக்கு வந்து சேர்கிறது. இதனால் மாயனூர் கதவணைக்கு வினாடிக்கு, ஒரு லட்சத்து, 2,173 கன அடி தண்ணீர் வந்தது. டெல்டா பாசன பகுதி குறுவை சாகுபடிக்காக, காவிரி ஆற்றில், ஒரு லட்சத்து, 953 கன அடி தண்ணீரும், நான்கு கிளை வாய்க்காலில், 1,020 கன அடி தண்ணீர் திறக்கப்பட்டுள்ளது. காவேரி பாசனப் பகுதிகளில் அடுத்த மாதம், சம்பா சாகுபடி துவங்க உள்ள நிலையில், மாயனூர் கதவனுக்கு மீண்டும் வினாடிக்கு, ஒரு லட்சம் கன அடி வரை தண்ணீர் வரத்து உள்ளதால், விவசாயிகள் மகிழ்ச்சியில் உள்ளனர்.