மயிலாடுதுறை கடன் மேளா: ரூ.25 லட்சம் வரை கடன்! உங்களுக்கான வாய்ப்பு மிஸ் பண்ணிடாதீங்க..

மயிலாடுதுறை மாவட்டத்தில் தமிழ்நாடு பிற்படுத்தப்பட்டோர் பொருளாதார மேம்பாட்டுக் கழகம் பல்வேறு கடன் திட்டங்களை அறிவித்துள்ளது.

கோப்புப் படம்

Source : ABP

மயிலாடுதுறை மாவட்டத்தில் வசிக்கும் பிற்படுத்தப்பட்டோர், மிகவும் பிற்படுத்தப்பட்டோர் மற்றும் சீர்மரபினர் வகுப்பைச் சார்ந்த மக்களின் பொருளாதார நிலையை மேம்படுத்தும் நோக்கில், தமிழ்நாடு பிற்படுத்தப்பட்டோர் பொருளாதார மேம்பாட்டுக் கழகம் (TABCEDCO) பல்வேறு கடன் திட்டங்களை அறிவித்துள்ளது. இத்திட்டங்களின் கீழ் பயன்பெற விரும்புவோருக்கான சிறப்பு கடன் மேளா (Loan Mela) நடைபெற உள்ளது. இது குறித்து மயிலாடுதுறை மாவட்ட ஆட்சியர் ஹெச்.எஸ். ஸ்ரீகாந்த்  விடுத்துள்ள செய்திக்குறிப்பில் விரிவான தகவல்கள் வெளியிட்டுள்ளார்.

கடன் திட்டங்களின் விவரம் மற்றும் தகுதிகள்

பிற்படுத்தப்பட்டோர் நலத்துறை மூலம் வழங்கப்படும் இக்கடனுதவிகள், சிறு தொழில் மற்றும் வியாபாரம் செய்யத் துடிக்கும் தனிநபர்களுக்கும், சுய உதவிக்குழுக்களுக்கும் பெரும் வாய்ப்பாக அமையும்.

விண்ணப்பதாரருக்கான அடிப்படைத் தகுதிகள்

* விண்ணப்பதாரர் பிற்படுத்தப்பட்டோர் (BC), மிகப்பிற்படுத்தப்பட்டோர் (MBC) மற்றும் சீர்மரபினர் (DNC) சமூகத்தைச் சார்ந்தவராக இருக்க வேண்டும்.

 * குடும்ப ஆண்டு வருமானம் ரூ. 3,00,000/- க்கு மிகாமல் இருக்க வேண்டும்.

 * 18 வயது பூர்த்தி அடைந்தவராகவும் 60 வயதுக்கு உட்பட்டவராகவும் இருத்தல் அவசியம்.

 * ஒரு குடும்பத்தில் ஒரு நபருக்கு மட்டுமே இக்கடனுதவி முன்னுரிமை அடிப்படையில் வழங்கப்படும்.

தனிநபர் கடன் திட்டம்: ரூ. 25 லட்சம் வரை வாய்ப்பு

சிறு வணிகம், விவசாயம் சார்ந்த தொழில்கள், கைவினைப் பொருட்கள் தயாரித்தல் மற்றும் மரபுவழித் தொழில்களில் ஈடுபடுவோருக்கு இத்திட்டம் வரப்பிரசாதமாகும்.

 * அதிகபட்சக் கடன்: ரூ. 25.00 லட்சம் வரை.

 * வட்டி விகிதம்: * ரூ. 1.25 லட்சம் வரையிலான கடன்களுக்கு 7% வட்டி.

   * ரூ. 1.25 லட்சம் முதல் ரூ. 15.00 லட்சம் வரையிலான கடன்களுக்கு 8% வட்டி.

 * திருப்பிச் செலுத்தும் காலம்: 3 ஆண்டுகள் முதல் 5 ஆண்டுகள் வரை.

சுய உதவிக் குழுக்களுக்கான (SHG) கடனுதவி

பெண்கள் மற்றும் ஆண்களுக்கான சுய உதவிக் குழுக்கள் தங்களின் வாழ்வாதாரத்தை மேம்படுத்த இத்திட்டத்தைப் பயன்படுத்திக் கொள்ளலாம்.

* கடன் அளவு: ஒரு உறுப்பினருக்கு அதிகபட்சமாக ரூ. 1.25 லட்சமும், ஒரு குழுவிற்கு மொத்தமாக ரூ. 25 லட்சம் வரையும் வழங்கப்படும்.

 * வட்டி: ஆண்டுக்கு 7% மட்டுமே.

 * நிபந்தனைகள்: குழு தொடங்கி குறைந்தது 6 மாதங்கள் முடிந்திருக்க வேண்டும். மகளிர் திட்ட அலுவலரால் தரம் (Grading) செய்யப்பட்டிருக்க வேண்டும். ஒரு குழுவில் அதிகபட்சம் 20 உறுப்பினர்கள் வரை இருக்கலாம்.

 * காலம்: கடனை 3 ஆண்டுகளுக்குள் திருப்பிச் செலுத்த வேண்டும்.

கறவை மாடு வளர்ப்புத் திட்டம்

பால் உற்பத்தியாளர் கூட்டுறவு சங்கங்களில் உறுப்பினர்களாக உள்ளவர்களுக்கு முன்னுரிமை அளிக்கப்படுகிறது.

 * ஒரு கறவை மாட்டிற்கு ரூ. 60,000/- வீதம், இரண்டு கறவை மாடுகள் வாங்க ரூ. 1.20 லட்சம் வரை கடனுதவி வழங்கப்படும்.

* இதற்கு 7% வட்டி நிர்ணயிக்கப்பட்டுள்ளது. 3 ஆண்டுகளில் கடனைத் திருப்பிச் செலுத்தலாம்.

ஆட்சியர் அழைப்பு

இத்திட்டங்கள் குறித்த விழிப்புணர்வை ஏற்படுத்தவும், தகுதியுள்ள பயனாளிகளிடம் இருந்து நேரடியாக விண்ணப்பங்களைப் பெறவும் சிறப்பு முகாமிற்கு ஏற்பாடு செய்யப்பட்டுள்ளது.

முகாம் விவரம்
 * நாள்: 19.12.2025 (வெள்ளிக்கிழமை)

 * நேரம்: காலை 10.00 மணி

* இடம்: மயிலாடுதுறை மாவட்ட ஆட்சியர் அலுவலக வளாகம்.

இம்முகாமில் கலந்துகொள்ளும் பொதுமக்கள் தங்களின் சாதிச் சான்றிதழ், வருமானச் சான்றிதழ், இருப்பிடச் சான்றிதழ், ஆதார் அட்டை நகல் மற்றும் தொழில் குறித்த திட்ட அறிக்கை ஆகியவற்றுடன் வருமாறு கேட்டுக்கொள்ளப்படுகிறார்கள்.
"மாவட்டத்தில் உள்ள தகுதியுள்ள சிறு வணிகர்கள் மற்றும் சுய உதவிக் குழுக்கள் இந்த அரிய வாய்ப்பைப் பயன்படுத்தி, பொருளாதார ரீதியாகத் தங்களை உயர்த்திக் கொள்ள வேண்டும்" என மாவட்ட ஆட்சியர் தனது அறிக்கையில் வலியுறுத்தியுள்ளார்.