Madras HC to Tamil Newspaper: 'தலைவர்களின் பெயர்களுக்கும் உரிய மரியாதை கொடுக்க வேண்டும்’ ஊடகங்களுக்கு உயர்நீதிமன்றம் அறிவுறுத்தல்..!

நாட்டின் தலைவர்கள் குறித்து செய்தி வெளியிடும் போது அவர்களுக்கு உரிய மரியாதையும், அவர்கள் பெயருக்கான அங்கீகாரமும் கொடுக்க வேண்டும்

சென்னை உயர்நீதிமன்றம்

தலைவர்களின் பெயர்களை குறிப்பிடும் போது, அவர்களுக்கு உரிய மரியாதை கொடுக்க வேண்டும் என பத்திரிகைகளுக்கு சென்னை உயர்நீதிமன்றம் அறிவுறுத்தல் வழங்கியுள்ளது.

'பெரு மழையை வெள்ளமாக மாற்றிய தமிழக அரசு' என்ற தலைப்பில் கடந்த 2016 ஆம் ஆண்டு தினமலர் நாளேடு செய்து ஒன்றை வெளியிட்டது. அதில், முதலமைச்சராக இருந்த ஜெயலலிதாவின் நடவடிக்கைகள் குறித்து அவதூறாக செய்தி வெளியிட்டதாக கூறி தினமலர் பத்திரிக்கையின் ஆசிரியர் ஆர்.கிருஷ்ணமூர்த்தி, வெளியீட்டார் ஆர்.லக்‌ஷ்மிபதி ஆகியோருக்கு எதிராக தமிழ்நாடு அரசின் சார்பில் நகர அரசு தலைமை வழக்கறிஞர் சென்னை முதன்மை அமர்வு நீதிமன்றத்தில் அவதூறு வழக்கு ஒன்றை தாக்கல் செய்திருந்தார். இந்த அவதூறு வழக்குக்கு தடை விதிக்கக்கோரி ஆர்.கிருஷ்ணமூர்த்தியும், லக்‌ஷ்மிபதியும் சென்னை உயர் நீதிமன்றத்தில் மேல்முறையீட்டு வழக்கு தொடர்தனர்.

மறைந்த தினமலர் ஆசிரியர் ஆர்.கிருஷ்ணமூர்த்தி

இந்த வழக்கு நீதிபதி பவானி சுப்பராயன் முன்பு விசாரணைக்கு வந்தபோது, மறைந்த முதல்வர் ஜெயலலிதா குறித்து அவதூறு செய்தி வெளியிடவில்லை என மனுதாரர் தரப்பில் வாதிடப்பட்டது. தனிப்பட்ட முறையில் அப்போதைய முதல்வர் ஜெயலலிதா குறித்து ஆட்சேபமான செய்தி வெளியிட்டிருந்தாலும் கூட, தனக்கெதிராக வழக்கு தொடர நகர அரசு தலைமை வழக்கறிஞருக்கு அதிகாரம் இல்லை என்றும் வழக்கறிஞர் வாதிட்டார். இந்த வாதங்களை ஏற்றுக்கொண்ட நீதிபதி,  அவதூறு செய்தி வெளியிட்டதாக தொடரப்பட்ட வழக்கை தள்ளுபடி செய்து உத்தரவிட்டார்.

அதே வேளையில், மறைந்த முதல்வர் ஜெயலலிதாவை அந்த குறிப்பிட்ட செய்தியில் 'ஜெ' என குறிப்பிட்டு செய்தி வெளியிட்ட தினமலர் பத்திரிக்கைக்கு நீதிமதி கண்டனம் தெரிவித்தார். மேலும், நாட்டின் தலைவர்கள் குறித்து செய்தி வெளியிடும் போது அவர்களுக்கு உரிய மரியாதையும், அவர்கள் பெயருக்கான அங்கீகாரமும் கொடுக்க வேண்டும் எனவும், அவமரியாதை செய்து செய்தி வெளியிட நினைப்பதை பத்திரிகைகள் கைவிட வேண்டுமெனவும் நீதிபதி இந்த வழக்கின் மூலம் அறிவுறுத்தியுள்ளார்.