TNEB: மின்வாரியத்தின் அடுத்த அதிரடி...! எல்லா வீடுகளுக்கும் வரப்போகுது "ஸ்மார்ட் மீட்டர்"

தமிழ்நாடு முழுவதும் உள்ள மின் இணைப்புகளில் ஸ்மார்ட் மீட்டர்களை பொருத்துவது தொடர்பாக மத்திய அரசு ரூ.10,790 கோடி நிதி ஒதுக்கீடு செய்துள்ளது.

மாதிரிப்படம்

தமிழ்நாடு முழுவதும் உள்ள மின் இணைப்புகளில் ஸ்மார்ட் மீட்டர்களை பொருத்துவது தொடர்பாக மத்திய அரசு ரூ.10,790 கோடி நிதி ஒதுக்கீடு செய்துள்ளது.

தமிழ்நாட்டில் ஒட்டுமொத்தமாக 3.25 கோடி வீட்டு மின்இணைப்புகளும், 22.87 லட்சம் விவசாய மின் இணைப்புகளும், 9.75 லட்சம் குடிசை வீடுகளுக்கான மின் இணைப்புகளும் உள்ளது. மத்திய அரசு அறிவுறுத்தலின்படி, தமிழ்நாடு முழுவதும் அனைத்து உள்ள மின் இணைப்புகளிலும் ஸ்மார்ட் மீட்டர் பொருத்தும் பணி நடைபெற இருக்கிறது. 

ஸ்மார்ட் மீட்டர்:

இதுகுறித்து, மின்வாரிய அதிகாரிகள் தெரிவிக்கையில்,” மத்திய அரசின் சீரமைக்கப்பட்ட விநியோகத் துறை திட்டத்தின் கீழ்,நாட்டில் உள்ள 13 மாநிலங்களில் ஸ்மார்ட் மீட்டர் பொருத்த ரூ.3.03 லட்சம் கோடி நிதி ஒதுக்கப்பட்டுள்ளது. இதில் தமிழகத்துக்கு ரூ.10,790 கோடி ஒதுக்கப்பட்டு, முதற்கட்டமாக ரூ.8,600 கோடி வழங்கப்படும்.

இதையடுத்து தமிழ்நாடு முழுவதும் ஸ்மார்ட் மீட்டர்களை பெறுவதற்கான நிறுவனங்களைத் தேர்வு செய்ய வரும் 15ம் தேதிக்குள் டெண்டர் விடப்படும். அதேபோல், வருகின்ற 2025-26-ம் ஆண்டுக்குள் ஸ்மார்ட் மீட்டர் பொருத்தும் பணியை முடிக்கத் திட்டமிடப்பட்டுள்ளது.

மேலும், ஸ்மார்ட் சிட்டி திட்டத்தின் கீழ், சென்னையில் உள்ள தி.நகரில் 1.09லட்சம் ஸ்மார்ட் மீட்டர்கள் பொருத்தப்பட்டுள்ளன. இந்த மீட்டர்கள் போஸ்ட்பெய்ட் திட்டத்தின் கீழ் பொருத்தப்பட்டுள்ளன. இவற்றை ப்ரீபெய்டு திட்டமாகவும் மாற்ற முடிவு செய்யப்பட்டுள்ளது.

அதேபோல், இலவச மின் இணைப்புகளான விவசாயம் மற்றும் குடிசை வீட்டு மின் இணைப்புகளுக்கும் ஸ்மார்ட்மீட்டர் பொருத்தத் திட்டமிடப்பட்டுள்ளது” என அதிகாரிகள் தெரிவித்துள்ளனர். 

ஸ்மார்ட் மீட்டர்: 

முன்னதாக, ஆளில்லாத மின் பயன்பாட்டை கணக்கெடுக்கும் திட்டத்தை விரைந்து முடிக்க வேண்டும் என தமிழ்நாடு மின் வாரியத்திற்கு மத்திய அரசு அறிவுறுத்தியது. இரு மாதங்களுக்கு ஒருமுறை, ஊழியர்கள் சென்று மீட்டரில் பதிவாகியுள்ள மின் பயன்பாட்டை கணக்கு எசுத்து வருகின்றனர். இதன் காரணமாக, அதிகளவு காலதாமதம் ஆவதால், குறைந்த அளவு மின் பயன்பாட்டு இருப்பதாக கணக்கு காண்பித்து முறைக்கேடுகள் நடப்பதாக கூறப்படுகிறது. 

இந்த பிரச்சனை நாடு முழுவதும் உள்ளதால், மின் பயன்பாட்டை ஆளின்றி கணக்கெடுக்க ஸ்மார்ட் மீட்டர் திட்டத்தை செயல்படுத்த மாநில அரசுகளுக்கு, மத்திய அரசு உத்தரவிட்டது. 

ஸ்மார்ட் மீட்டர் பயன்கள்:

குறிப்பிட்ட தேதி வந்ததும் ஸ்மார்ட் மீட்டர் தானாகவே மின் பயன்பாட்டை கணக்கெடுத்து, மின் கட்டண விவரம், நுகர்வோரின் மொபைல் போன் எண்ணிற்கு மெசேஜை சென்று விடும். 

இந்தியா முழுவதும் பல மாநிலங்களில் ஸ்மார்ட் மீட்டர் மிகப்பெரிய அளவில் செயல்படுத்தப்பட்டு வரும் நிலையில், தமிழ்நாட்டில் சென்னை தி.நகரில் 1.42 லட்சம் இணைப்புகளில் ஸ்மார்ட் மீட்டர் திட்டம் செயல்படுத்தப்பட்டுள்ளது. அத்திட்டத்தை மாநிலம் முழுவதும் விரிவுபடுத்த ஆய்வுகள் முடிந்துள்ளனர்.