திமுகவுக்கு எதிராக களத்தில் இறங்கிய பாஜக.. ஆளுநரை சந்தித்த மேலிட குழு.. அடுத்து என்ன?

சதானந்த கௌடா தலைமையிலான பாஜக பிரதிநிதிகள், தமிழ்நாடு ஆளுநர் ஆர்.என்.ரவியை இன்று சந்தித்துள்ளனர்.

தமிழ்நாடு ஆளுநரை சந்தித்த பாஜக நிர்வாகிகள்

கடந்த 2014ஆம் ஆண்டு முதல் மத்தியில் ஆட்சியில் உள்ள பாஜக, தொடர்ந்து மூன்றாவது முறையாக ஆட்சி அமைக்க பல்வேறு முயற்சிகளை செய்து வருகிறது. இன்னும் 5 மாதங்களில் மக்களவை தேர்தல் நடைபெற உள்ள நிலையில், அதிரடி நடவடிக்கைகளை எடுத்து வருகிறது.

வரவிருக்கும் தேர்தலில் ஆட்சிக்கு எதிரான மன நிலை, புதிதாக உருவாகியுள்ள INDIA கூட்டணி, விலைவாசி உயர்வு ஆகியவை பாஜகவுக்கு பெரும் சவாலாக அமையும் என கூறப்படுகிறது. எனவே, வட மாநிலங்களில் ஏற்படும் இழப்பை தென் மாநிலங்களில் சரி கட்ட பாஜக திட்டமிட்டு வருகிறது.

திமுகவுக்கு எதிராக களத்தில் இறங்கிய பாஜக:

அந்த வகையில், தமிழ்நாட்டுக்கு அதிக கவனம் அளித்து வருகிறது. சமீபத்தில், பாஜக கூட்டணியில் இருந்து அதிமுக விலகியது பாஜகவுக்கு பெரும் சிக்கலை ஏற்படுத்திய நிலையில், இவற்றை எல்லாம் சரிகட்ட பாஜக மேலிடம் முடிவு எடுத்துள்ளது. அதற்காக, திமுகவுக்கு எதிராக தீவிரமாக செயல்பட்டு வருகிறது.

அந்த வகையில், தமிழ்நாட்டில் ஆளும் திமுக அரசால் பாஜகவினருக்கு பிரச்னைகள் ஏற்படுவதாகக் கூறி, இதுகுறித்து ஆய்வு செய்ய நான்கு பேர் கொண்ட குழுவை பாஜக அமைத்தது. 

கட்சியின் தேசிய தலைவர் ஜே.பி.நட்டா அமைத்த குழுவில் கர்நாடக முன்னாள் முதலமைச்சரும் முன்னாள் மத்திய அமைச்சருமான சதானந்த கவுடா, மும்பை நகரத்தின் முன்னாள் காவல் ஆணையர் சத்ய பால் சிங், ஆந்திர பிரதேச மாநில பாஜக தலைவர் புரந்தேஸ்வரி, நாடாளுமன்ற உறுப்பினர் பி.சி மோகன் ஆகியோர் இடம்பெற்றனர். 

இந்த நிலையில், சதானந்த கௌடா தலைமையிலான பாஜக பிரதிநிதிகள், தமிழ்நாடு ஆளுநர் ஆர்.என்.ரவியை இன்று சந்தித்துள்ளனர்.
பொய்யான குற்றச்சாட்டுகளை சுமத்தி, மாநிலத்தின் சட்ட அமலாக்க துறையால் தங்கள் கட்சியினர் மீது கொடுமைகள் நடத்தப்படுவதாக கூறி, துன்புறுத்தல்களை எடுத்துக்காட்டி மனு ஒன்றை அளித்துள்ளனர்.

 

திரு டி.வி.சதானந்த கௌடா, எம்.பி., தலைமையிலான பா.ஜ.க பிரதிநிதிகள், ஆளுநரை சந்தித்து, பொய்யான குற்றச்சாட்டுகளை சுமத்தி, மாநிலத்தில் சட்ட அமலாக்க துறையால் தங்கள் கட்சியினர் மீது நடத்தப்படும் கொடுமைகள் மற்றும் துன்புறுத்தல்களை எடுத்துக்காட்டி ஒரு மனுவை அளித்தனர். pic.twitter.com/LcLjOwXlz7

— RAJ BHAVAN, TAMIL NADU (@rajbhavan_tn) October 28, 2023

தமிழ்நாடு ஆளுநருக்கு பறந்த மனு:

பொய் வழக்குகளை பதிவு செய்து பாஜகவினரை கைது செய்து வருவதாக திமுக அரசு மீது பாஜக தொடர் குற்றச்சாட்டை சுமத்தி வருகிறது. முதலமைச்சர் மு.க.ஸ்டாலின் குறித்து சமூக வலைதளங்களில் அவதூறு பரப்பியதாக தூத்துக்குடி பாஜக பிரமுகர் ஜான் ரவி என்பவரை போலீசார் சமீபத்தில் கைது செய்தது.

கொடி கம்பம் அகற்றிய விவகாரத்தில் பாஜக பிரமுகர் அமர்பிரசாத் ரெட்டியை காவல்துறை கைது செய்தது. சிறையில் உள்ள அவர் மீது மேலும் இரண்டு வழக்குகைளை காவல்துறை பதிவு செய்துள்ளது. தென்காசியில் அரசு வேலை வாங்கி தருவதாக பண மோசடி செய்த வழக்கில் பாஜக பிரமுகர் ஒருவர் கைது செய்யப்பட்டது குறிப்பிடத்தக்கது.