TN Special Bus: ஊருக்கு போற ப்ளான் இருக்கா? 600 சிறப்பு பேருந்துகள் இயக்கம்.. போக்குவரத்து கழகம் வெளியிட்ட அறிவிப்பு..

நாளை வார இறுதி நாள் என்பதால் கூடுதலாக 600 சிறப்பு பேருந்துகள் இயக்கப்படும் என அறிவிக்கப்பட்டுள்ளது.

கோப்பு புகைப்படம்

வார இறுதி  நாட்களை ஒட்டி மக்கள் சொந்த ஊர்களுக்கு செல்ல தமிழ்நாடு போக்குவரத்து கழகம் சார்பில் 600 சிறப்பு பேருந்துகள் இயக்கப்படும் என அறிவிக்கப்பட்டுள்ளது.

தமிழ்நாடு அரசின் மாநில பேருந்து போக்குவரத்து சேவை என்பது மக்களின் தினசரி வாழ்வில் தவிர்க்க முடியாததாக உள்ளது. வழக்கமாக இயக்கப்படும் பேருந்துகளுடன், அவ்வப்போது பண்டிகை காலம், சிறப்பு விடுப்புகள், வார இறுதி நாட்கள் போன்ற காலங்களில் பொதுமக்களின் தேவைக்கேற்ப கூடுதல் பேருந்துகள் இயக்கப்படும். குறிப்பாக பொங்கல், தீபாவளி, கோடை விடுமுறை, ரம்ஜான் மற்றும் கிறிஸ்துமஸ் போன்ற முக்கிய விழாக்களின்போது,  பொதுமக்கள் தங்களது சொந்த ஊர்களுக்கு செல்வதற்கு ஏதுவாக அரசு தரப்பில் கூடுதலாக சிறப்பு பேருந்துகள் இயக்கப்படும்.

ரயில்களில் அதிகப்படியான மக்கள் பயணம் மேற்கொள்வதால் டிக்கெட்டுகள் கிடைக்காத நிலை உள்ளது. மேலும் ரயில் பயணிகள் பயணங்களை முன்கூட்டியே திட்டமிடுவதால் 3 மாதங்களுக்கு முன்னரே டிக்கெட் முன்பதிவு செய்கின்றனர். இதனால் பண்டிகை காலங்கள் அல்லது சிறப்பு விடுமுறையின்போது போதிய டிக்கெட்டுகள் கிடைக்காமல் உள்ளது. ரயிலில் வழக்கமாக கூட்டம் நிரம்பி வழியும் என்பதாலும் டிக்கெட்டுகள் இல்லாத காரணத்தாலும் மக்கள் பேருந்துகளில் பயணம் மேற்கொள்வார்கள். ஆனால் பேருந்தில் எந்த ஒரு சிரமமுமின்றி மக்கள் சௌகரியமாக பயணம் மேற்கொள்ள சிறப்பு பேருந்துகள் இயக்கப்படுகிறது. அந்த வகையில் நாளை வார இறுதி நாட்கள் என்பதால் 600 சிறப்பு பேருந்துகள் இயக்கப்படும் என போக்குவரத்து கழகம் அறிவிப்பை வெளியிட்டுள்ளது.  

இதுகுறித்து போக்குவரத்து கழகம் வெளியிட்டுள்ள அறிக்கையில், "07/10/2023 (சனிக்கிழமை) மற்றும் 08/10/2023 (ஞாயிறு) ஆகிய விடுமுறை நாட்களை முன்னிட்டு 06/10/2023  அன்று சென்னையிலிருந்தும் மற்றும் பிற இடங்களிலிருந்தும் கூடுதலான பயணிகள் தமிழகம் முழுவதும் பயணம் மேற்கொள்வார்கள் என எதிர்பார்க்கப்படுகிறது.
    
இதனை கருத்தில் கொண்டு தமிழ்நாடு அரசு போக்குவரத்துக் கழகங்கள் தினசரி இயக்கப்படும் பேருந்துகளுடன் கூடுதலாக சிறப்பு பேருந்துகளை  இயக்க திட்டமிடப்பட்டுள்ளது. சென்னையிலிருந்து தமிழகத்தின் முக்கிய இடங்களுக்கு  06/10/2023 அன்று தினசரி இயக்க கூடிய பேருந்துகளுடன் கூடுதலாக 300 சிறப்பு பேருந்துகளும்  மற்றும் பல்வேறு இடங்களிலிருந்து அதாவது கோவை, மதுரை, திருநெல்வேலி, திருச்சி , சேலம் போன்ற இடங்களிலிருந்து முக்கிய இடங்களுக்கும் மற்றும் பெங்களூரிலிருந்து பிற இடங்களுக்கும் 300 சிறப்பு பேருந்துகளும் ஆக மொத்தம் 600 பேருந்துகள் இயக்க திட்டமிடப்பட்டுள்ளது.

மேலும், ஞாயிறு அன்று சொந்த ஊர்களில் இருந்து சென்னை மற்றும் பெங்களூர் திரும்ப வசதியாக பயணிகளின் தேவைகேற்ப அனைத்து இடங்களிலிருந்தும் சிறப்பு பேருந்துகள் இயக்கிட திட்டமிடப்பட்டுள்ளது .  இந்நிலையில் , இந்த வார இறுதியில் பயணம் மேற்கொள்வதற்கு இதுவரை 5,896 பயணிகள் முன்பதிவு செய்துள்ளனர். இந்த  எண்ணிக்கை மேலும் அதிகரிக்க வாய்ப்பு உள்ளதால்,  தொலைதூர பயணம் மேற்கொள்ள இருக்கும் பயணிகள் தங்களது பயணத்திற்கு முன்பதிவு செய்து பயணிக்க கேட்டுக்கொள்ளப்படுகிறார்கள்.  இச்சிறப்பு பேருந்து இயக்கத்தினை கண்காணிக்க அனைத்து பேருந்து நிலையங்களிலும் போதிய அலுவலர்கள் நியமிக்கப்பட்டுள்ளனர். எனவே,  பயணிகள் மேற்குறிப்பிட்டுள்ள பேருந்து சேவையினை பயன்படுத்தி, தங்களது பயணத்தினை  திட்டமிட்டுக் கொள்ள கேட்டுக் கொள்ளப்படுகிறது” என குறிப்பிடப்பட்டுள்ளது.