Mettur Dam: மேட்டூர் அணை நீர்மட்டம்: டெல்டா பாசனத்திற்கு அதிகரிக்கும் நீர் திறப்பு! இன்றைய நிலவரம் இதோ !

மேட்டூர் அணையில் இருந்து காவிரி டெல்டா பாசனத்துக்கு திறக்கப்படும் நீரின் அளவு விநாடிக்கு ,22,000 கனஅடியாகவும் அதிகரிக்கப்பட்டுள்ளது

Written By : சிவரஞ்சித் | Updated at : 18 Aug 2025 09:02 AM (IST)

மேட்டூர் அணை

Source : ABP NADU

சேலம்: மேட்டூர் அணையின் மொத்த நீர்மட்டம், 120 அடி. காவிரி டெல்டா பாசனத்துக்கு திறக்கப்படும் நீரின் அளவு விநாடிக்கு ,22,000 கனஅடியாகவும் அதிகரிக்கப்பட்டுள்ளது.

சேலம் மாவட்டத்தில் அமைந்துள்ள மேட்டூர் அணையின் மூலமாக தஞ்சாவூர், திருவாரூர், நாகை, மயிலாடுதுறை, அரியலூர், திருச்சி என டெல்டா உள்பட 11 மாவட்டங்கள் பாசன வசதி பெற்று வருகின்றன. பல மாவட்டங்களின் குடிநீர் ஆதாரமாகவும் மேட்டூர் அணை விளங்கி வருகிறது. கர்நாடகாவில் பெய்து வரும் மழையால் அங்குள்ள கபினி, கேஆர்எஸ் அணைகள் நிரம்பின. இதனால் காவிரியில் உபரிநீர் திறக்கப்பட்டு, மேட்டூர் அணை நடப்பாண்டில் 4 முறை நிரம்பியது.

காவிரி நீர்ப்பிடிப்புப் பகுதிகளில் பெய்து வரும் மழையைப் பொறுத்து மேட்டூர் அணைக்கு நீர்வரத்து அதிகரித்தும், குறைந்தும் காணப்படுகிறது. அணைக்கு நேற்று முன்தினம் 6,408 கனஅடியாக இருந்த நீர்வரத்து நேற்று 6,223 கனஅடியாக குறைந்தது. அணையிலிருந்து காவிரி டெல்டா பாசனத்துக்கு திறக்கப்படும் நீரின் அளவு விநாடிக்கு 10,000 கனஅடியாக இருந்த நிலையில், நேற்று காலை நீர்திறப்பு விநாடிக்கு 18,000 கனஅடியாகவும், மாலையில் 22,000 கனஅடியாகவும் அதிகரிக்கப்பட்டுள்ளது. அதேபோல, கால்வாய் பாசனத்துக்கு 500 கனஅடி வீதம் தண்ணீர் திறக்கப்படுகிறது. அணை நீர்மட்டம் நேற்று 118.25 அடியாகவும், நீர் இருப்பு 90.70 டிஎம்சியாகவும் இருந்தது.

ஒகேனக்கலின் நீர்வரத்து குறைவு

கர்நாடக மாநிலத்தின் காவிரி நீர் பிடிப்புப் பகுதிகளில் பெய்துவந்த மழையின் தாக்கம் குறைந்துள்ளதால், நீர்வரத்து படிப்படியாகக் குறையத் தொடங்கியுள்ளது. காவிரி ஆற்றின் நீர்ப்பிடிப்புப் பகுதிகளான குடகு, மைசூரு, மாண்டியா போன்ற இடங்களில் மழை குறைந்ததே இதற்கு முக்கிய காரணமாகக் கூறப்படுகிறது.

நீர்வரத்து குறைந்ததால், ஒகேனக்கலின் பிரதான அருவிகளில் ஆர்ப்பரித்து வந்த தண்ணீர் ஓரளவிற்கு குறைந்துள்ளது. இதனால், சுற்றுலாப் பயணிகள் அருவிகளில் குளிப்பதிலும், பரிசல் சவாரியிலும் முன்புபோல் உற்சாகம்கொள்ளவில்லை. ஆனாலும், விடுமுறை நாட்களில் தொடர்ந்து சுற்றுலாப் பயணிகள் வந்துசெல்கின்றனர். இருப்பினும், நீர்வரத்து மேலும் குறைந்தால், சுற்றுலாப் பயணிகளின் வருகை அதிகரித்துள்ளது.

தருமபுரி மாவட்டம் ஒகேனக்கல் காவிரி ஆற்றில் கடந்த 13-ம் தேதி காலை 6 மணியளவில் நீர்வரத்து விநாடிக்கு 14 ஆயிரம் கனஅடியாக பதிவானது. இரவு 7 மணியளவில் 9,500 கனஅடியாக நீர்வரத்து குறைந்தது. அதேபோல, கடந்த 14-ம் தேதி காலை விநாடிக்கு 6,500 கனஅடியாக நீர்வரத்து குறைந்தது. அன்று முதல் நேற்று மாலை வரை விநாடிக்கு 6,500 கனஅடியாகவே நீர்வரத்து தொடர்கிறது.