மயிலாடுதுறை: நவம்பர் மாத அரிசி அக்டோபரிலேயே! கனமழை எச்சரிக்கை: குடும்ப அட்டைதாரர்களுக்கு ஆட்சியரின் முக்கிய அறிவிப்பு!
வடகிழக்குப் பருவமழை முன்னெச்சரிக்கை நடவடிக்கையாக மயிலாடுதுறை மாவட்டத்தில் நவம்பர் மாத அரிசி அக்டோபரிலேயே விநியோகம் செய்ய மாவட்ட ஆட்சியர் உத்தரவிட்டுள்ளார்.
மயிலாடுதுறை: வடகிழக்குப் பருவமழை தீவிரமடைய வாய்ப்புள்ள நிலையில், மழைக்காலத்தில் பொது மக்கள் அத்தியாவசியப் பொருட்களைப் பெறுவதில் சிரமம் ஏற்படாமல் இருக்க, மயிலாடுதுறை மாவட்ட நிர்வாகம் ஒரு முக்கிய அறிவிப்பை வெளியிட்டுள்ளது. அதன்படி, இம்மாவட்டத்தில் உள்ள அனைத்து அரிசி குடும்ப அட்டைதாரர்களும் தங்களுக்குரிய நவம்பர் 2025 மாதத்திற்கான அரிசி ஒதுக்கீட்டை முன்கூட்டியே, அதாவது அக்டோபர் 2025 மாதத்திலேயே நியாயவிலைக் கடைகளில் பெற்றுக்கொள்ளலாம் என மாவட்ட ஆட்சியர் ஹெச்.எஸ். ஸ்ரீகாந்த், தெரிவித்துள்ளார்.
பருவமழைக்கான மாவட்ட நிர்வாகத்தின் தயார்நிலை
தமிழ்நாட்டில் பொது விநியோகத் திட்டம் என்பது, ஏழை எளிய மக்களின் வாழ்வாதாரத்தில் முக்கியப் பங்கு வகிக்கும் ஒன்றாகும். மயிலாடுதுறை மாவட்டம் முழுவதும் முன்னுரிமை (Priority) மற்றும் முன்னுரிமையற்ற (Non-Priority) குடும்ப அட்டைதாரர்களுக்கு, அரிசி மற்றும் கோதுமையுடன் சேர்த்து, சர்க்கரை, மண்ணெண்ணெய் ஆகியவையும் விநியோகிக்கப்பட்டு வருகின்றன. இதுமட்டுமல்லாமல், சிறப்புப் பொது விநியோகத் திட்டத்தின் கீழ் அத்தியாவசியப் பொருட்களான துவரம் பருப்பு மற்றும் பாமாயில் ஆகியவையும் அனைத்து நியாயவிலைக் கடைகள் மூலமும் தடையின்றி வழங்கப்பட்டு வருகின்றன.
தற்போது, தமிழ்நாடு முழுவதும் வடகிழக்குப் பருவமழை பெய்து வருகிறது மேலும், வரலாறு காணாத அளவில் கனமழை பெய்யக்கூடும் என வானிலை ஆய்வு மையங்கள் எச்சரிக்கை விடுத்துள்ளதல், மழை வெள்ளப் பாதிப்புக் காலங்களில் பொதுமக்கள், குறிப்பாகக் கிராமப்புறங்களில் உள்ளவர்கள், அத்தியாவசியப் பொருட்களைப் பெறுவதற்கு நியாயவிலைக் கடைகளுக்குச் செல்வதில் ஏற்படும் சிரமங்களைத் தவிர்க்கும் நோக்குடன் இந்தச் சிறப்பான முன்கூட்டிய விநியோகத் திட்டத்தை மாவட்ட நிர்வாகம் அறிவித்துள்ளது.
ஆட்சியரின் அறிவிப்பு
இது தொடர்பாக மாவட்ட ஆட்சியர் ஹெச்.எஸ். ஸ்ரீகாந்த் விடுத்துள்ள செய்திக்குறிப்பில், அரிசி குடும்ப அட்டைதாரர்கள் இந்தச் சலுகையைப் பயன்படுத்திக் கொள்ளுமாறு வலியுறுத்தியுள்ளார்.
யார் யார் பெறலாம்?
* பொது விநியோகத் திட்டத்தின் கீழ் அரிசி பெறும் தகுதி உடைய அனைத்து அரிசி குடும்ப அட்டைதாரர்களும் இந்தச் சலுகையைப் பயன்படுத்திக் கொள்ளலாம்.
* அக்டோபர் 2025 மாதத்திற்கான 12 கிலோ முதல் 35 கிலோ வரையிலான அரிசி ஒதுக்கீட்டை ஏற்கனவே நியாயவிலைக் கடைகளில் பெற்றுக்கொண்டவர்களும்,
* அக்டோபர் மாத அரிசி ஒதுக்கீட்டை இதுவரை பெறாத குடும்ப அட்டைதாரர்களும்,
* நவம்பர் 2025 மாதத்திற்கான 12 கிலோ முதல் 35 கிலோ வரையிலான அரிசியை முன்கூட்டியே அக்டோபர் மாதத்திலேயே பெற்றுக்கொள்ளலாம்.
இந்தத் திட்டம், மழைக்காலத்தில் போக்குவரத்துத் தடையாலோ அல்லது அவசரத் தேவையாலோ பொதுமக்கள் பாதிக்கப்படாமல் இருக்கவும், அரிசி கையிருப்பில் வைத்துக் கொள்வதை உறுதிப்படுத்தவும் உதவும்.
மாற்று ஏற்பாடு
இந்த முன்கூட்டிய விநியோகம் என்பது கட்டாயமில்லை. நவம்பர் மாதத்திற்கான அரிசியை அக்டோபர் மாதத்தில் பெற விரும்பாத குடும்ப அட்டைதாரர்கள், தாங்கள் வழக்கம்போல் நவம்பர் 2025 மாதத்தில் தங்களுக்குரிய அரிசியினைப் பெற்றுக்கொள்ளலாம். நவம்பர் மாத ஒதுக்கீட்டை முன்கூட்டியே அக்டோபரில் பெறுபவர்களுக்கு, நவம்பர் மாதத்தில் அரிசி விநியோகம் இருக்காது.
அத்தியாவசியத் தேவைகளை உறுதிப்படுத்துதல்
வடகிழக்குப் பருவமழை காலத்தில் மக்களின் அத்தியாவசியத் தேவைகளைப் பூர்த்தி செய்வதற்காகவே இந்த முக்கியமான, முன்யோசனை கொண்ட முடிவை மாவட்ட நிர்வாகம் எடுத்துள்ளது.
இதில் அரிசி மட்டும் வழங்கப்படும், கோதுமை, சர்க்கரை, மண்ணெண்ணெய், துவரம் பருப்பு மற்றும் பாமாயில் போன்ற இதர பொருட்களின் வழக்கம்போல வழங்கப்படும் என கூறப்பட்டுள்ளது.
மாவட்ட ஆட்சியர் ஹெச்.எஸ். ஸ்ரீகாந்த், வெளியிட்டுள்ள இந்த அறிவிப்பானது, அரசின் பொது விநியோகத் திட்டம், பேரிடர் காலங்களில் பொதுமக்களுக்கு உதவும் ஒரு சமூகப் பாதுகாப்புத் திட்டமாகச் செயல்படுகிறது என்பதை உறுதிப்படுத்தியுள்ளது. எனவே, அனைத்து அரிசி குடும்ப அட்டைதாரர்களும் இந்தச் சிறப்பு வசதியைப் பயன்படுத்தி, நவம்பர் மாதத்திற்குரிய அரிசியை உடனடியாக நியாயவிலைக் கடைகளில் பெற்றுக்கொள்ளுமாறு மாவட்ட நிர்வாகத்தின் சார்பில் கேட்டுக்கொள்ளப்பட்டுள்ளது.
தலைப்பு செய்திகள்
ட்ரெண்டிங் செய்திகள்
