ரயில்வேயில் குரூப்-டி வேலை: தமிழக இளைஞர்களுக்கு பொன்னான வாய்ப்பு! மயிலாடுதுறையில் இலவச பயிற்சி & உடனே விண்ணப்பியுங்கள்!

ரயில்வே ஆட்சேர்ப்பு வாரியம் (RRB) 22,195 குரூப்-டி பணியிடங்களுக்கு விண்ணப்பிக்கும் முறை மற்றும் வேலைவாய்ப்பு அலுவலகம் நடத்தும் இலவசப் பயிற்சி வகுப்பு குறித்து ஆட்சியர் அறிவிப்பு வெளியிட்டுள்ளார்.

செயற்கை நுண்ணறிவு சித்தரிப்பு படம்

Source : ABP

மயிலாடுதுறை: இந்திய ரயில்வே துறையில் பணியாற்றுவதை லட்சியமாகக் கொண்ட இளைஞர்களுக்கு ஒரு சிறந்த நற்செய்தி வெளியாகியுள்ளது. ரயில்வே ஆட்சேர்ப்பு வாரியம் (RRB), நாடு முழுவதும் உள்ள பல்வேறு ரயில்வே மண்டலங்களில் காலியாக உள்ள 22,195 ‘குரூப்-டி’ (Level-1) பணியிடங்களை நிரப்புவதற்கான பிரம்மாண்டமான வேலைவாய்ப்பு அறிவிப்பை வெளியிட்டுள்ளது. இதற்கான விண்ணப்பச் செயல்முறைகள் தற்போது விறுவிறுப்பாகத் தொடங்கி நடைபெற்று வருகின்றன.

பல்வேறு துறைகளில் கொட்டிக்கிடக்கும் வேலைவாய்ப்புகள்

இந்த ஆட்சேர்ப்பின் மூலம் ரயில்வேயின் தொழில்நுட்பம் மற்றும் பராமரிப்புப் பிரிவுகளில் பல்வேறு முக்கியப் பணியிடங்கள் நிரப்பப்பட உள்ளன. 

குறிப்பாக:

* உதவியாளர் (தட இயந்திரம் - Track Machine)

* உதவியாளர் (பாலம் - Bridge)

*பாதை பராமரிப்பாளர் (Track Maintainer Grade IV)

* உதவியாளர் (P-Way, TRD, TL & AC)

*உதவியாளர் லோகோ ஷெட் (மின்சாரம்) மற்றும் செயல்பாடுகள் (மின்சாரம்)

* பாயிண்ட்ஸ்மேன் (Pointsman)

*உதவியாளர் (S&T - Signal and Telecommunication)

உள்ளிட்ட பல பிரிவுகளில் வேலைவாய்ப்புகள் அறிவிக்கப்பட்டுள்ளன.

கல்வித்தகுதி மற்றும் வயது வரம்பு

இந்தப் பணியிடங்களுக்கு விண்ணப்பிக்க விரும்புவோர் அங்கீகரிக்கப்பட்ட கல்வி வாரியங்களில் 10-ஆம் வகுப்பு (SSLC) தேர்ச்சி பெற்றிருக்க வேண்டும் அல்லது அதற்கு இணையான கல்வித்தகுதி பெற்றிருக்க வேண்டும்.

வயது வரம்பு: 01.01.2026 அன்று விண்ணப்பதாரர்கள் 18 முதல் 33 வயதுக்கு உட்பட்டவர்களாக இருக்க வேண்டும். இருப்பினும், அரசு விதிகளின்படி உச்ச வயது வரம்பில் தளர்வுகள் வழங்கப்பட்டுள்ளன.

*SC/ST பிரிவினர்: 5 ஆண்டுகள் தளர்வு.

*OBC (Non-Creamy Layer) பிரிவினர்: 3 ஆண்டுகள் தளர்வு.

*மாற்றுத்திறனாளிகள் (PwBD): 10 ஆண்டுகள் தளர்வு வழங்கப்பட்டுள்ளது.

விண்ணப்பிக்கும் முறை மற்றும் கட்டணம்

தகுதியுள்ள விண்ணப்பதாரர்கள் https://www.rrbapply.gov.in என்ற அதிகாரப்பூர்வ இணையதளத்தின் வாயிலாக ஆன்லைனில் விண்ணப்பிக்கலாம்.

விண்ணப்பிக்கக் கடைசி நாள் 02.03.2026 ஆகும்.

கட்டண விவரம்

* பொதுப் பிரிவினர்: ரூ 500

*பெண்கள், SC/ST, மாற்றுத்திறனாளிகள், சிறுபான்மையினர் மற்றும் முன்னாள் ராணுவத்தினர்: ரூ 250

விண்ணப்பக் கட்டணத்தை ஆன்லைன் பணப் பரிவர்த்தனை (Net Banking/Debit/Credit Card/UPI) மூலம் செலுத்தலாம்.

தேர்வு முறை: தமிழில் எழுதலாம்!

ரயில்வே தேர்வுகளின் ஒரு சிறப்பம்சமாக, இந்தப் போட்டித் தேர்வை மாணவர்கள் தங்கள் தாய்மொழியான தமிழிலேயே எழுதலாம். இது தமிழக மாணவர்களுக்குக் கூடுதல் சாதகமான அம்சமாகும். தேர்வு நிலைகள் பின்வருமாறு அமையும்:

* கணினி அடிப்படையிலான தேர்வு (CBT): 100 மதிப்பெண்களுக்குக் கொள்குறி வகை (Objective Type) கேள்விகள் கேட்கப்படும்.

* உடல் திறன் சோதனை (PET): எழுத்துத் தேர்வில் தேர்ச்சி பெறுபவர்களுக்கு இந்தப் பரிசோதனை நடத்தப்படும்.

* மருத்துவப் பரிசோதனை மற்றும் ஆவண சரிபார்ப்பு.

பாடத்திட்டம்: எழுத்துத் தேர்வில் பொது நுண்ணறிவு மற்றும் பகுத்தறிவு (Reasoning), பொது அறிவு (GK), பொது அறிவியல் (General Science) மற்றும் கணிதம் (Mathematics) ஆகிய பகுதிகளில் இருந்து கேள்விகள் இடம்பெறும். ஒரு சரியான பதிலுக்கு 1 மதிப்பெண் வழங்கப்படும், தவறான பதில்களுக்கு எதிர்மறை மதிப்பெண் (Negative Marking) உண்டு.

இலவச பயிற்சி வகுப்புகள்

மயிலாடுதுறை மாவட்டத்தைச் சேர்ந்த இளைஞர்கள் இத்தேர்வில் அதிக அளவில் வெற்றி பெற வேண்டும் என்ற நோக்கில், மாவட்ட நிர்வாகம் மற்றும் வேலைவாய்ப்பு அலுவலகம் இணைந்து சிறப்பு ஏற்பாடுகளைச் செய்துள்ளது.

மாவட்ட வேலைவாய்ப்பு மற்றும் தொழில்நெறி வழிகாட்டும் மையத்தில் இயங்கி வரும் தன்னார்வ பயிலும் வட்டத்தின் (Study Circle) வாயிலாக, இந்த ரயில்வே குரூப் டி தேர்விற்கான வழிகாட்டுதல் நிகழ்ச்சி மற்றும் இலவசப் பயிற்சி வகுப்புகள் தொடங்கப்பட உள்ளன.

நிகழ்ச்சி விவரம்

*நாள்: 17.02.2026 (செவ்வாய்க்கிழமை)

* நேரம்: காலை 11.00 மணி

*இடம்: மாவட்ட வேலைவாய்ப்பு மற்றும் தொழில்நெறி வழிகாட்டும் மையம், பாலாஜி நகர், 2-வது குறுக்கு தெரு, (கால் டாக்ஸி பெட்ரோல் பங்கிலிருந்து பூம்புகார் செல்லும் வழி), மயிலாடுதுறை-1.

இது குறித்து மயிலாடுதுறை மாவட்ட ஆட்சியர் ஹெச்.எஸ்.ஸ்ரீகாந்த் விடுத்துள்ள அறிக்கையில், "மயிலாடுதுறை மாவட்ட தகுதியுள்ள இளைஞர்கள் இந்த அரிய வாய்ப்பைப் பயன்படுத்தி மத்திய அரசுப் பணியில் சேர வேண்டும். விருப்பமுள்ளவர்கள் நேரடியாக அலுவலகத்திற்கு வந்தோ அல்லது 9499055904 என்ற வாட்ஸ்அப் எண்ணிற்குத் தங்கள் விவரங்களை அனுப்பியோ முன்பதிவு செய்து கொள்ளலாம். விழிப்புணர்வு நிகழ்ச்சியில் கலந்துகொண்டு மாணவர்கள் தங்கள் சந்தேகங்களைத் தீர்த்துக்கொள்ளலாம்" எனத் தெரிவித்துள்ளார்.

உதவிக்கு அணுகவும்:

 வாட்ஸ்அப் எண்: 9499055904

முகவரி: மாவட்ட வேலைவாய்ப்பு அலுவலகம், பாலாஜி நகர், மயிலாடுதுறை.