5 டூ 18 வயசுதான்... ஆனா சாதனை பெருசு! நாகை மாவட்டக் குழந்தைகளுக்குக் காத்திருக்கும் பிரதமரின் தேசிய விருது!

2026-ஆம் ஆண்டிற்கான பிரதான் மந்திரி ராஷ்ட்ரிய பால் புரஸ்கார் விருதுக்கு தகுதியான நாகப்பட்டினம் மாவட்டக் குழந்தைகள் ஜூலை 31-க்குள் விண்ணப்பிக்கலாம் என ஆட்சியர் கே.ஜே.பிரவீன் குமார் தெரிவித்துள்ளார்.

செயற்கை நுண்ணறிவு சித்தரிப்பு படம்

Source : AI

நாகப்பட்டினம்: இந்திய அரசின் பெண்கள் மற்றும் குழந்தைகள் மேம்பாட்டு அமைச்சகத்தின் சார்பில் ஆண்டுதோறும் வழங்கப்படும் உயரிய விருதான ‘பிரதான் மந்திரி ராஷ்ட்ரிய பால் புரஸ்கார்’ (மத்திய அரசின் தேசிய குழந்தைகள் விருது) விருதுக்கு தகுதியும் திறமையும் வாய்ந்த நாகப்பட்டினம் மாவட்டத்தைச் சேர்ந்த குழந்தைகள் விண்ணப்பிக்கலாம் என்று மாவட்ட ஆட்சியர் கே.ஜே.பிரவீன் குமார், தெரிவித்துள்ளார்.

இது குறித்து மாவட்ட ஆட்சியர் விடுத்துள்ள செய்திக்குறிப்பில் விரிவாகக் கூறப்பட்டுள்ளதாவது:

விருதின் முக்கிய நோக்கம்

இந்திய நாட்டின் எதிர்காலத் தூண்களாக விளங்கும் குழந்தைகளின் அசாத்திய திறமைகளையும், அவர்களின் சாதனைத் திறனையும் பாராட்டி ஊக்கப்படுத்துவது மிக அவசியமாகும். அந்த வகையில், தங்களின் உயிரைப் பொருட்படுத்தாமல் பிறர் உயிரைக் காத்த தன்னலமற்ற துணிச்சலான செயல்களில் ஈடுபட்ட திறமையான குழந்தைகளின் திறமைகளை அங்கீகரிப்பதையே இவ்விருது முதன்மை நோக்கமாகக் கொண்டுள்ளது.

துணிச்சல்மிக்க செயல்கள் மட்டுமின்றி, பின்வரும் பல்வேறு துறைகளில் வியக்கத்தக்க சாதனைகளைப் புரிந்து, சமூகத்தில் பரவலான மற்றும் வெளிப்படையான நேர்மறைத் தாக்கத்தை ஏற்படுத்திய குழந்தைகளுக்கு இந்த விருது வழங்கி கௌரவிக்கப்படுகிறது.

விளையாட்டு (Sports): மாநில, தேசிய மற்றும் சர்வதேச அளவிலான விளையாட்டுப் போட்டிகளில் சாதனை படைத்தவர்கள்.

சமூக சேவை (Social Service): சமூக விழிப்புணர்வு, சுற்றுச்சூழல் பாதுகாப்பு போன்ற நற்செயல்களில் ஈடுபட்டவர்கள்.

அறிவியல் மற்றும் தொழில்நுட்பம் (Science & Technology): புதிய கண்டுபிடிப்புகள் மற்றும் அறிவியல் துறையில் சிறந்து விளங்குபவர்கள்.

கலை மற்றும் கலாச்சாரம் (Art & Culture): கலைத்திறன், இசை, ஓவியம் மற்றும் பாரம்பரிய கலைகளில் முத்திரை பதித்தவர்கள்.

புத்தாக்கம் (Innovation): சமுதாயப் பயன்பாட்டிற்கான புதிய சிந்தனைகள் மற்றும் தொழில்நுட்பத் தீர்வுகளை உருவாக்கியவர்கள்.

கல்வித்திறன் (Academic Excellence): கல்வி மற்றும் ஆராய்ச்சித் துறையில் விதிவிலக்கான சாதனை புரிந்தவர்கள்.

விண்ணப்பிப்பதற்கான தகுதிகள்

பிரதான் மந்திரி ராஷ்ட்ரிய பால் புரஸ்கார் விருதுக்கு விண்ணப்பிக்கும் குழந்தைகள் பின்வரும் தகுதிகளைப் பெற்றிருக்க வேண்டும்.

* விண்ணப்பதாரர் கண்டிப்பாக இந்தியக் குடிமகனாக இருத்தல் வேண்டும்.

* தற்சமயம் இந்தியாவில் வசிப்பவராக இருக்க வேண்டும்.

* விண்ணப்பிக்கும் தேதியில் குழந்தையின் வயது 5 வயது முதல் 18 வயதிற்குட்பட்டதாக (18 வயது நிறைவடையாதவராக) இருத்தல் அவசியம்.

விண்ணப்பிக்கும் முறை

இவ்விருதிற்கான விண்ணப்பங்கள் முற்றிலும் ஆன்லைன் (Online) மூலமாக மட்டுமே வரவேற்கப்படுகின்றன. தகுதியான நபர்கள் தங்களது விண்ணப்பங்களை இந்திய அரசின் அதிகாரப்பூர்வ இணையதளமான https://awards.gov.in/ என்ற ஆன்லைன் போர்ட்டலில் Online Portal மட்டுமே பதிவு செய்ய வேண்டும். தபால் மூலமாகவோ அல்லது பிற வழிகளிலோ அனுப்பப்படும் விண்ணப்பங்கள் கண்டிப்பாக ஏற்றுக்கொள்ளப்பட மாட்டாது.

இந்த விருதினைப் பெறுவதற்கான விண்ணப்பங்களைச் சாதனை புரிந்த குழந்தைகளே நேரடியாகப் பதிவு செய்யலாம். அல்லது அக்குழந்தையைச் சார்ந்த பெற்றோர்கள், பள்ளி ஆசிரியர்கள், தலைமை ஆசிரியர்கள், மாவட்ட அளவிலான அலுவலர்கள் மற்றும் அக்குழந்தையின் திறமையை அங்கீகரிக்கும் சமூக ஆர்வலர்கள் என யார் வேண்டுமானாலும் தகுதியான குழந்தைகளின் பெயர்களைப் பரிந்துரை செய்து ஆன்லைனில் விண்ணப்பிக்கலாம்.

விண்ணப்பிக்கக் கடைசி நாள்

நாகப்பட்டினம் மாவட்டத்தில் வசிக்கும் விதிவிலக்கான திறமை கொண்ட குழந்தைகள், இத்தகு நல்வாய்ப்பினைப் பயன்படுத்திக் கொள்ளுமாறு கேட்டுக்கொள்ளப்படுகிறார்கள். எதிர்வரும் 2026-ஆம் ஆண்டிற்கான இவ்விருதுக்கான ஆன்லைன் விண்ணப்பங்களை இணையதளத்தில் பதிவு செய்வதற்கு 31.07.2026 இறுதி நாளாக அறிவிக்கப்பட்டுள்ளது. எனவே, தகுதியுடையவர்கள் உரிய காலத்திற்குள் தங்களின் சாதனைகளுக்கான சான்றுகளுடன் விண்ணப்பிக்குமாறு அறிவுறுத்தப்படுகிறார்கள்.

மாவட்ட அளவில் பல்வேறு துறைகளில் சிறந்து விளங்கும் சாதனைச் சிறுவர், சிறுமியர்களைக் கண்டறிந்து, அவர்களை தேசிய அளவில் அடையாளப்படுத்தப் பெற்றோர்களும், பள்ளி நிருவாகங்களும் முன்வர வேண்டும் என நாகப்பட்டினம் மாவட்ட ஆட்சியர் கே.ஜே.பிரவீன் குமார், தனது செய்திக் குறிப்பில் விடுத்துள்ள செய்தி வாயிலாகக் கேட்டுக்கொண்டுள்ளார்.