மின் நுகர்வோரின் பிரச்சினைகளுக்கு மின்னல் வேகத் தீர்வு.. மிஸ் பண்ணிடாதீங்க மக்களே...

மயிலாடுதுறை மாவட்டம் சீர்காழி கோட்ட மின் நுகர்வோர் குறைதீர்க்கும் முகாம் நாளை மே 20-ம் தேதி நடைபெற உள்ளது.

செயற்கை நுண்ணறிவு சித்தரிப்பு படம்

Source : ABP

மயிலாடுதுறை: சீர்காழி கோட்டத்திற்குட்பட்ட மின் நுகர்வோர்களின் குறைகளைக் கேட்டறிந்து, அவற்றுக்கு உடனடித் தீர்வு காணும் வகையில், சிறப்பு மின் நுகர்வோர் குறைதீர்க்கும் நாள் கூட்டம் நாளை மே 20 -ம் தேதி நடைபெற உள்ளது. இக்கூட்டத்தில் பொதுமக்கள் மற்றும் மின் நுகர்வோர்கள் கலந்துகொண்டு தங்களது மின்சார வாரியம் தொடர்பான புகார்களைத் தெரிவித்துப் பயன் பெறலாம் என்று அறிவிக்கப்பட்டுள்ளது.

 

 

கூட்டம் நடைபெறும் விவரம்

 

தமிழ்நாடு மின் உற்பத்தி மற்றும் பகிர்மானக் கழகத்தின் சார்பில், சீர்காழி கோட்ட அளவிலான இந்தக் குறைதீர்க்கும் முகாம் வரும் 20.05.2026 (புதன்கிழமை) அன்று காலை 10:30 மணியளவில்.

சீர்காழி கோட்டம் செயற்பொறியாளர், இயக்குதலும் பராமரித்தல் அலுவலகத்தில் நடைபெற உள்ளது. நாகை மின் பகிர்மான வட்ட மேற்பார்வை பொறியாளர் தெ. காளிதாஸ் தலைமையில் நடைபெறும் இக்கூட்டத்தில் மின் நுகர்வோர் மற்றும் பொதுமக்கள் கலந்துகொண்டு தங்கள் குறைகளை மனுவாக அளித்து பயன்பெறலாம் என சீர்காழி கோட்ட செயற்பொறியாளர் பொறுப்பு மூர்த்தி தெரிவித்துள்ளார்.

 

பயன்பெற வேண்டிய பகுதிகள்

 

இந்தக் குறைதீர்க்கும் முகாமில் சீர்காழி கோட்டத்தின் கீழ் வரும் பல்வேறு பிரிவு அலுவலகங்களைச் சார்ந்த பொதுமக்கள் தங்களது கோரிக்கைகளை முன்வைக்கலாம் என கூறப்பட்டுள்ளது. குறிப்பாகக் கீழே குறிப்பிட்டுள்ள பகுதிகளில் வசிக்கும் மின் நுகர்வோர்கள் இக்கூட்டத்தைப் பயன்படுத்திக் கொள்ளுமாறு கேட்டுக்கொள்ளப்பட்டுள்ளனர்.

 

* சீர்காழி

* கொள்ளிடம்

* மாதானம்

* அரசூர்

* பூம்புகார்

* காளி

* மணல்மேடு 

* வைத்தீஸ்வரன்கோவில்

* ஆக்கூர்

* திருக்கடையூர்

* கிடாரங்கொண்டான் 

* செம்பனார்கோவில்

* தரங்கம்பாடி

* திருவெண்காடு 

மற்றும் அதன் சுற்றுவட்டார பகுதிகள்

 

எந்த மாதிரியான புகார்களை அளிக்கலாம்?

 

மின் வாரியம் தொடர்பான பல்வேறு சிக்கல்களுக்குத் தீர்வு காண இந்த மேடை அமைக்கப்பட்டுள்ளது. பொதுமக்கள் பின்வரும் குறைகள் தொடர்பாகப் மனு அளித்து பயனடையலாம்.

 

1. புதிய மின் இணைப்பு: வீடுகள் அல்லது வணிக நிறுவனங்களுக்குப் புதிய மின் இணைப்பு பெறுவதில் உள்ள காலதாமதம்.

 

2. மின் கட்டணப் பிரச்சனைகள்: மின் பயன்பாட்டுக் கணக்கீட்டில் உள்ள குளறுபடிகள் அல்லது கூடுதல் கட்டணம் தொடர்பான புகார்கள்.

 

3. மின்மாற்றி (Transformer) பராமரிப்பு: குறைந்த மின்னழுத்தப் பாதிப்புகள் (Low Voltage) அல்லது பழுதடைந்த மின் கம்பங்களை மாற்றுதல்.

 

 4.பெயர் மாற்றம்: மின் இணைப்பில் பெயர் மாற்றம் செய்தல் அல்லது மின்சுமை (Load) மாற்றம் தொடர்பான விண்ணப்பங்கள்.

 

 5. இதர கோரிக்கைகள்: விவசாய மின் இணைப்பு மற்றும் மின் விநியோகத்தில் ஏற்படும் தொடர் பாதிப்புகள் குறித்த புகார்கள்.

 

நிர்வாகத்தின் வேண்டுகோள்

 

இது குறித்து சீர்காழி கோட்ட இயக்குதலும் பராமரித்தலும் செயற்பொறியாளர் வெளியிட்டுள்ள அறிக்கையில், சீர்காழி கோட்டத்தைச் சுற்றியுள்ள கிராமப்புற மற்றும் நகர்ப்புற மின் நுகர்வோர்கள் இந்த நல்வாய்ப்பைப் பயன்படுத்திக் கொள்ள வேண்டும் என வலியுறுத்தியுள்ளார். மேற்பார்வை பொறியாளர் முன்னிலையில் நடைபெறும் இக்கூட்டத்தில் அளிக்கப்படும் மனுக்கள் மீது உரிய விசாரணை நடத்தப்பட்டு, விரைந்து நடவடிக்கை எடுக்கப்படும் என்றும் உறுதி அளிக்கப்பட்டுள்ளது.

எனவே, மின்சார வாரியம் தொடர்பான குறைகள் உள்ள பொதுமக்கள் 20-ஆம் தேதி காலை சீர்காழி செயற்பொறியாளர் அலுவலகத்தில் நடைபெறும் முகாமில் நேரில் கலந்துகொண்டு தங்களது கோரிக்கை மனுக்களை அளிக்கலாம்.