மயிலாடுதுறை ரயில் நிலையத்தில் விபத்து: அம்ரித் பாரத் திட்டப் பணியில் பீகார் தொழிலாளர்கள் காயம்! பாதுகாப்பு கேள்விக்குறி?
மயிலாடுதுறை ரயில் நிலையத்தில் அம்ரித் பாரத் திட்டத்தின்கீழ் நடைபெற்று வரும் விரிவாக்க மற்றும் சீரமைப்புப் பணிகளின்போது ஏற்பட்ட விபத்தில், புலம்பெயர் தொழிலாளர்கள் உள்ளிட்ட 9 பேர் காயமடைந்தனர்.
மயிலாடுதுறை ரயில் நிலையத்தில் அம்ரித் பாரத் திட்டத்தின்கீழ் நடைபெற்று வரும் விரிவாக்க மற்றும் சீரமைப்புப் பணிகளின்போது ஏற்பட்ட விபத்தில், பீகார் மாநில புலம்பெயர் தொழிலாளர்கள் உட்பட 9 பேர் காயமடைந்தனர். இந்த விபத்தில் காயமடைந்தவர்கள் மயிலாடுதுறை அரசு மருத்துவமனையில் சிகிச்சை பெற்றுச் சென்றனர்.
அம்ரித் பாரத் திட்டம்
மத்திய அரசின் அம்ரித் பாரத் திட்டத்தின் கீழ் நாடுமுழுவதும் பல்வேறு ரயில் நிலையங்களில் விரிவாக்க பணிகள் நடைபெற்று வருகின்றது. அதன் ஒன்றாக மயிலாடுதுறை ரயில் நிலையம் விரிவுபடுத்தப்பட்டு, நவீன வசதிகளுடன் மேம்படுத்தப்பட்டு வருகிறது. இத்திட்டத்தின் ஒரு பகுதியாக, புதிய டிக்கெட் கவுன்ட்டர்கள், காத்திருப்பு அறைகள், நடைமேடைகள் மற்றும் பிற உள்கட்டமைப்பு வசதிகள் அமைக்கப்பட்டு வருகின்றன. இத்திட்டம் நிறைவடையும்போது, மயிலாடுதுறை ரயில் நிலையம் பயணிகளுக்கு மேம்பட்ட அனுபவத்தை வழங்கும் என எதிர்பார்க்கப்படுகிறது.
பணியின் போது ஏற்பட்ட விபத்து
மயிலாடுதுறை ரயில் நிலையத்தில் நேற்று மாலை புதிதாக டிக்கெட் கவுன்ட்டர் அமைக்கும் பணி நடைபெற்றுள்ளது. அப்போது அந்தக் கவுன்ட்டரில் 7 அடிக்கு 8 அடி அளவிலான ஒரு பெரிய கண்ணாடியைப் பொருத்தும் பணியில் தொழிலாளர்கள் ஈடுபட்டனர். இந்தப் பணியின்போது, எதிர்பாராத விதமாக அந்தக் கண்ணாடி கைதவறி கீழே விழுந்தது.
கண்ணாடி விழுந்ததில், அதைப் பொருத்தும் பணியில் ஈடுபட்டிருந்த தமிழகத்தைச் சேர்ந்த தொழிலாளர்களான செல்லதுரை, பரத், ஈஸ்வர், தீபக் ஆகியோரும், பீகார் மாநிலத்தைச் சேர்ந்த புலம்பெயர் தொழிலாளர்களான லோகேஸ்வரதாஸ், குஷேஸ்வர் தாஸ், மகேஷ் உள்ளிட்ட மேலும் சிலரும் காயமடைந்தனர். மொத்தம் 9 தொழிலாளர்களுக்குக் கைகளில் கண்ணாடி கிழித்ததில் காயங்கள் ஏற்பட்டன. ஒருவருக்கு மட்டும் முகத்தில் காயம் ஏற்பட்டது.
மருத்துவமனையில் சிகிச்சை
விபத்து நடந்தவுடன், காயமடைந்த அனைத்துத் தொழிலாளர்களும் உடனடியாக மயிலாடுதுறை அரசு மருத்துவமனைக்குக் கொண்டு செல்லப்பட்டனர். அங்கு அவர்களுக்குப் புறநோயாளிகளாகச் சிகிச்சை அளிக்கப்பட்டது. காயங்கள் லேசாக இருந்ததால், முதலுதவி மற்றும் கட்டு கட்டுதல் உள்ளிட்ட சிகிச்சைகளைப் பெற்றுக்கொண்டு அனைவரும் உடனடியாகப் பணிக்குத் திரும்பினர். அதிர்ஷ்டவசமாக யாருக்கும் பெரிய அளவில் காயம் ஏற்படவில்லை என்பது குறிப்பிடத்தக்கது.
பாதுகாப்பு நடைமுறைகள்
பொதுவாக, இதுபோன்ற பெரிய கட்டுமானப் பணிகளின்போது, தொழிலாளர்களின் பாதுகாப்புக்கு மிகுந்த முக்கியத்துவம் அளிக்கப்படும். பாதுகாப்பு உபகரணங்கள் (கையுறை, தலைக்கவசம், பாதுகாப்பு கண்ணாடிகள் போன்றவை), சரியான பயிற்சி மற்றும் பணியிடத்தில் முறையான மேற்பார்வை ஆகியவை தொழிலாளர்களின் பாதுகாப்பை உறுதி செய்ய அத்தியாவசியமானவை. இந்த விபத்து தொடர்பாக விரிவான விசாரணை நடத்தப்பட்டு, பாதுகாப்பு விதிமுறைகளை பின்பற்றி தொழிலாளிகள் பணியாளர்கள் ஈட்டுபட்டார்களா..? என கண்டறிந்து, இதுபோன்ற சம்பவங்கள் மீண்டும் நிகழாமல் தடுக்கத் தேவையான அனைத்து பாதுகாப்பு நடவடிக்கைகளும் மேற்கொள்ள வேண்டும் என சமூக ஆர்வலர்கள் கோரிக்கை விடுத்துள்ளனர்.
புலம்பெயர் தொழிலாளர்களின் பங்கு
இந்த விபத்தில் பீகார் மாநிலத்தைச் சேர்ந்த புலம்பெயர் தொழிலாளர்களும் காயமடைந்துள்ளனர். நாட்டின் பல்வேறு பகுதிகளில் நடைபெற்று வரும் உள்கட்டமைப்பு மற்றும் கட்டுமானப் பணிகளில் புலம்பெயர் தொழிலாளர்கள் முக்கியப் பங்காற்றி வருகின்றனர். அவர்களின் உழைப்பு நாட்டின் வளர்ச்சிக்கு மிகவும் அவசியம். எனவே, அவர்களின் பாதுகாப்பிற்கும், நலனுக்கும் அரசு மற்றும் தனியார் நிறுவனங்கள் அதிக கவனம் செலுத்த வேண்டும் என்பது சமூக ஆர்வலர்களின் கருத்தாக உள்ளது. மேலும் இதுபோன்ற விபத்துக்கள் ஏற்படும்போது, அவர்களுக்குத் தேவையான மருத்துவ உதவிகளும், இழப்பீடுகளும் உடனடியாகக் கிடைப்பதை உறுதி செய்ய வேண்டும் எனவும் தெரிவித்துள்ளனர்.
தலைப்பு செய்திகள்
ட்ரெண்டிங் செய்திகள்
