இனிப்புகளுடன் ஹெல்மெட் விழிப்புணர்வு: மயிலாடுதுறை காவல் நிலையத்தில் நெகிழ்ச்சியான 80-வது சுதந்திர தின விழா!
80-வது சுதந்திர தினத்தை முன்னிட்டு மயிலாடுதுறை காவல் நிலையத்தில் ஹெல்மெட் விழிப்புணர்வு ஏற்படுத்தி பொதுமக்களுக்கு இனிப்புகளை வழங்கி தூய்மைப் பணியாளர்களுக்குச் சால்வை அணிவித்து மரியாதை செலுத்தினர்.
80-வது சுதந்திர தினத்தை முன்னிட்டு மயிலாடுதுறை காவல் நிலையத்தில் ஹெல்மெட் விழிப்புணர்வு ஏற்படுத்தி பொதுமக்களுக்கு இனிப்புகளை வழங்கி தூய்மைப் பணியாளர்களுக்குச் சால்வை அணிவித்து மரியாதை செலுத்தியுள்ளனர்.
மயிலாடுதுறை: நாடு முழுவதும் 80-வது சுதந்திர தின விழா விமரிசையாகவும், உற்சாகமாகவும் கொண்டாடப்பட்டு வரும் நிலையில், மயிலாடுதுறை காவல் நிலையத்தில் நடைபெற்ற சுதந்திர தின விழா பொதுமக்களின் பெரும் கவனத்தையும் பாராட்டையும் பெற்றுள்ளது. வழக்கமான கொடியேற்ற நிகழ்வோடு முடிந்துவிடாமல், மக்கள் நலன் சார்ந்த விழிப்புணர்வு மற்றும் உழைப்பாளர்களைக் கௌரவிக்கும் நிகழ்வாக இக்கொண்டாட்டம் அமைந்தது.
கம்பீரமாகப் பறந்த தேசியக் கொடி
இன்று காலை மயிலாடுதுறை காவல் நிலைய வளாகத்தில் விழாப்போலக் காட்சி அளித்த சூழலில், காவல் ஆய்வாளர் சிவசெந்தில் குமார் தேசியக் கொடியை ஏற்றி வைத்தார். சீருடை அணிந்த காவல்துறையினர் அணிவகுத்து நின்று தேசியக் கொடிக்கு வீரவணக்கம் செலுத்தினர். தொடர்ந்து, அங்கிருந்த காவல்துறையினர் மற்றும் பொதுமக்களுக்குச் சுதந்திர தின நல்வாழ்த்துகள் பரிமாறப்பட்டன.
இனிப்போடு சேர்ந்த உயிர்க்காக்கும் விழிப்புணர்வு
கொடியேற்ற நிகழ்வு நிறைவடைந்ததைத் தொடர்ந்து, காவல் ஆய்வாளர் சிவசெந்தில் குமார் தலைமையில் காவல்துறையினர் ஒரு வித்தியாசமான முயற்சியைக் கையிலெடுத்தனர். காவல் நிலையத்திற்கு முன்பாகச் சென்ற பிரதான சாலையில், பயணித்த வாகன ஓட்டிகள் மற்றும் பொதுமக்களுக்கு இனிப்புகளை வழங்கிச் சுதந்திர தின வாழ்த்துகளைத் தெரிவித்தனர்.
அப்போது, இருசக்கர வாகனங்களில் ஹெல்மெட் அணியாமல் சென்ற வாகன ஓட்டிகளை அன்போடு தடுத்து நிறுத்திய காவலர்கள், தண்டனை வழங்குவதற்குப் பதிலாக இனிப்புகளை வழங்கினர். தொடர்ந்து, "சுதந்திரக் காற்றைச் சுவாசிக்கும் நாம், நமது உயிரையும் பாதுகாப்பாகப் பார்த்துக்கொள்ள வேண்டும். தலைகவசம் (ஹெல்மெட்) என்பது சட்டத்திற்காக அல்ல; நம் குடும்பத்தின் பாதுகாப்பிற்காக!" என்று ஹெல்மெட் அணிவதன் அவசியத்தை நிதானமாகவும் சுவாரஸ்யமாகவும் எடுத்துரைத்தனர்.
காவல்துறையினரின் இந்த அணுகுமுறை வாகன ஓட்டிகளிடையே ஆச்சரியத்தையும் நெகிழ்ச்சியையும் ஏற்படுத்தியது. இனிப்பைப் பெற்றுக்கொண்ட பொதுமக்கள் பலரும், "இனி கட்டாயம் ஹெல்மெட் அணிந்துதான் வாகனம் ஓட்டுவோம்" என உறுதியளித்துச் சென்றனர்.
தூய்மைப் பணியாளர்களுக்குச் சால்வை அணிவித்து மரியாதை செலுத்திய காவல்துறையினர்
விழாவின் முத்தாய்ப்பாக, காவல் நிலைய வளாகத்தையும் அதைச் சுற்றியுள்ள பகுதிகளையும் நாள்தோறும் தூய்மையாகப் பராமரித்து வரும் தூய்மைப் பணியாளர்களைக் கௌரவிக்கும் நிகழ்ச்சி நடைபெற்றது.
சமுதாயத்தின் உண்மையான சுதந்திரத்திற்கும் ஆரோக்கியத்திற்கும் அடித்தளமாக விளங்கும் தூய்மைப் பணியாளர்களின் சேவையைப் பாராட்டி, அவர்களுக்குப் பொன்னாடை போர்த்திச் சால்வை அணிவித்து மரியாதை செலுத்தப்பட்டது. மேலும், அவர்களுக்கும் இனிப்புகள் வழங்கப்பட்டு சுதந்திர தின வாழ்த்துகள் தெரிவிக்கப்பட்டன. காவல்துறையினரின் இந்தச் சமத்துவமான செயலைக் கண்டு தூய்மைப் பணியாளர்கள் உணர்ச்சிவசப்பட்டு தங்களது நன்றியைத் தெரிவித்துக் கொண்டனர்.
சமூக ஆர்வலர்கள் மற்றும் பொதுமக்கள் பாராட்டு
சட்டம்-ஒழுங்கைப் பராமரிப்பதில் எப்போதும் கடுமையானவர்களாகப் பார்க்கப்படும் காவல்துறையினர், சுதந்திர தினத்தில் காட்டிய இந்த மென்மையான, பரிவோடு கூடிய அணுகுமுறை சமூக ஆர்வலர்கள் மற்றும் பொதுமக்களிடையே பெரும் வரவேற்பைப் பெற்றுள்ளது. தலைகவசம் (ஹெல்மெட்) விழிப்புணர்வு மற்றும் தூய்மையாளர்களைக் கௌரவித்தல் என இருவேறு சமூகக் கடமைகளைச் ஒரே நிகழ்வில் ஒருங்கிணைத்துச் செயல்படுத்திய மயிலாடுதுறை காவல் துறையினரைச் சமூக ஆர்வலர்களும், ஊர் பொதுமக்களும் வெகுவாகப் பாராட்டி வருகின்றனர்.
தலைப்பு செய்திகள்
ட்ரெண்டிங் செய்திகள்
