விவசாயிகள் கவனத்திற்கு! சம்பா பயிர்க்காப்பீடு செய்ய நவம்பர் 16 இறுதி கெடு!
மயிலாடுதுறை மாவட்ட விவசாயிகள் நெல் பயிர்க்காப்பீடு செய்ய நவம்பர் 16 கடைசி நாள் எனவும், ஏக்கருக்கு ரூ.38,900 காப்பீட்டுத் தொகை பெற ரூ.583.50 செலுத்தி பதிவு செய்து கொள்ள அறிவுறுத்தப்பட்டுள்ளனர்.
மயிலாடுதுறை: மயிலாடுதுறை மாவட்டத்தில் 2026-27 ஆம் ஆண்டிற்கான திருத்தியமைக்கப்பட்ட பிரதம மந்திரி பயிர்க்காப்பீட்டுத் திட்டத்தின் கீழ், சம்பா (சிறப்பு பருவம்) நெல்-II பயிரை விவசாயிகள் விரைவாக காப்பீடு செய்து பயனடைய வேண்டும் என்று மாவட்ட ஆட்சியர் ஹெச்.எஸ்.ஸ்ரீகாந்த், வேண்டுகோள் விடுத்துள்ளார்.
இயற்கைச் சீற்றங்கள், பூச்சித் தாக்குதல் மற்றும் எதிர்பாராத பருவநிலை மாற்றங்களால் விவசாயிகளுக்கு ஏற்படும் பொருளாதார இழப்புகளைத் தடுத்து, உரிய நிதிப் பாதுகாப்பை வழங்குவதற்காக இத்திட்டம் மாநிலத்தில் சிறப்பாகச் செயல்படுத்தப்பட்டு வருகிறது.
காப்பீட்டு நிறுவனம் மற்றும் அறிவிக்கை கிராமங்கள்
நடப்பு நிதியாண்டில் தமிழ்நாட்டில் செயல்படுத்தப்படும் திருத்தியமைக்கப்பட்ட பிரதம மந்திரி பயிர்க்காப்பீட்டுத் திட்டத்தின் கீழ், மயிலாடுதுறை மாவட்டத்திற்கு அக்ரிகல்சுரல் இன்சூரன்ஸ் கம்பெனி லிமிடெட் (Agricultural Insurance Company of India Limited - AICIL) எனும் பொதுத்துறை காப்பீட்டு நிறுவனம் மூலம் இத்திட்டம் நடைமுறைப்படுத்தப்பட்டு வருகிறது. மயிலாடுதுறை மாவட்டத்தில் உள்ள விவசாயிகளின் நலனைக் கருத்தில் கொண்டு, சம்பா (சிறப்பு பருவ) நெற்பயிருக்காக தற்போது மொத்தம் 277 வருவாய் கிராமங்கள் முறைப்படி அறிவிக்கை செய்யப்பட்டுள்ளன.
இந்தப் பகுதிகளில் சம்பா சாகுபடி மேற்கொண்டுள்ள அனைத்து விவசாயிகளும் திட்டத்தின்கீழ் பதிவு செய்து தங்களது பயிர்களுக்கு முழுமையான பாதுகாப்பு பெற வழிவகை செய்யப்பட்டுள்ளது.
காப்பீட்டுக் கட்டணம் மற்றும் முக்கிய காலக்கெடு
சம்பா (சிறப்பு) பருவத்தில் சாகுபடி செய்யப்படும் நெற்பயிர்களை விவசாயிகள் எவ்வித சிரமமுமின்றி நிர்ணயிக்கப்பட்ட காலக்கெடுவுக்குள் காப்பீடு செய்துகொள்ள அறிவுறுத்தப்படுகிறார்கள். வருகின்ற 2026 நவம்பர் மாதம் 16-ஆம் தேதிக்குள் (16.11.2026) விவசாயிகள் அனைவரும் தங்களது விருப்பத்தின்பேரில் கட்டணத்தைச் செலுத்தி காப்பீடு செய்துகொள்ள வேண்டும். நெல்-II சம்பா பருவத்திற்கான ஒரு ஏக்கர் பயிர் காப்பீட்டுத் தொகையாக ரூ.38,900/- நிர்ணயம் செய்யப்பட்டுள்ளது.
இதில் விவசாயிகள் செலுத்த வேண்டிய காப்பீட்டுக் கட்டணப் பங்கான 1.5 சதவீதத் தொகை மட்டும், அதாவது ஏக்கருக்கு வெறும் ரூ.583.50/- செலுத்தினால் போதுமானது. மீதமுள்ள பெரும் பகுதி கட்டணத் தொகையை மத்திய மற்றும் மாநில அரசுகளே மானியமாக ஏற்றுக்கொள்கின்றன.
பதிவு செய்யும் முறைகள் மற்றும் வழிமுறைகள்
சம்பா நெல்-II சாகுபடி மேற்கொள்ளும் விவசாயிகள் இத்திட்டத்தில் இணைவதற்குப் பல்வேறு எளிமையான வழிகள் ஏற்படுத்தப்பட்டுள்ளன. பயிர்க்கடன் பெறும் விவசாயிகள் தங்களுக்குக் கடன் வழங்கும் தொடக்க வேளாண்மை கூட்டுறவு கடன் சங்கங்களிலோ அல்லது தேசியமயமாக்கப்பட்ட வங்கிகளிலோ நேரடியாகவே காப்பீட்டுப் பதிவை மேற்கொள்ளலாம். கடன் பெறாத விவசாயிகள் அருகிலுள்ள அரசு பொது சேவை மையங்கள் (இ-சேவை மையங்கள்), வணிக வங்கிகள் அல்லது தேசிய பயிர் காப்பீட்டு இணையதளத்தில் உள்ள “விவசாயிகள் கார்னர்” www.pmfby.gov.in என்ற முகவரியின் வழியாக நேரிடையாகவே இணைய வழியில் தங்களது பெயர்களைப் பதிவு செய்துகொள்ளலாம்.
தேவையான ஆவணங்கள் மற்றும் விழிப்புணர்வு எச்சரிக்கை
விவசாயிகள் இத்திட்டத்தின் கீழ் தங்களது பயிர்களைப் பதிவு செய்யும்போது சில முக்கிய ஆவணங்களை இணைப்பது கட்டாயமாகும். அதன்படி, முன்மொழிவு விண்ணப்பம், பூர்த்தி செய்யப்பட்ட பதிவு விண்ணப்பம், கிராம நிர்வாக அலுவலர் (VAO) வழங்கும் நடப்பு பசலிக்கான அடங்கல் அல்லது இ-அடங்கல் சான்றிதழ், வங்கியின் சேமிப்புக் கணக்கு புத்தகத்தின் முதல் பக்க நகல் மற்றும் அடையாளச் சான்றாக ஆதார அட்டையின் நகல் ஆகியவற்றைச் சமர்ப்பிக்க வேண்டும். உரிய கட்டணத்தைச் செலுத்திய பின்னர், அதற்கான அதிகாரப்பூர்வ இரசீதை பொது சேவை மையங்கள் அல்லது வங்கிகளிடம் தவறாமல் பெற்றுக்கொள்ள வேண்டும்.
மேலும், கட்டணம் செலுத்திப் பதிவேற்றம் செய்யும்போது, விவசாயிகள் தாங்கள் உண்மையாகவே சாகுபடி செய்துள்ள வருவாய் கிராமத்தின் பெயர் கணினியில் சரியாகப் பதிவேற்றம் செய்யப்பட்டுள்ளதா என்பதைக் கூடுதல் கவனத்துடன் சரிபார்த்துக் கொள்ள வேண்டும். இதன் மூலம் எதிர்காலத்தில் பயிர் இழப்பீட்டுத் தொகை பெறும்போது எந்தவிதத் தாமதமும் சிரமமும் இன்றி உரிய தொகை நேரடியாக வங்கிக் கணக்கில் வரவு வைக்கப்படும் என்று மாவட்ட ஆட்சியர் ஹெச்.எஸ்.ஸ்ரீகாந்த், தனது செய்திக் குறிப்பில் விரிவாகத் தெரிவித்துள்ளார்.
தலைப்பு செய்திகள்
ட்ரெண்டிங் செய்திகள்
