கண்கவர் ஓலைச் சப்பரத்தில் உலா வந்த சுவாமிகள்.. அற்புதக் காட்சியை கண்டு மெய்சிலிர்த்த பக்தர்கள்..!

மயிலாடுதுறை ஐயாரப்பர் கோயில் சித்திரை சப்தஸ்தான விழாவின் முக்கிய நிகழ்வான ஓலைச் சப்பரம் (சகோபுரம்) வீதி உலா மிக விமரிசையாக நடைபெற்றது.

ஐயாரப்பர் கோயில் ஓலைச் சப்பரம் வீதியுலா

Source : ABP

மயிலாடுதுறை ஐயாரப்பர் கோயில் சித்திரை சப்தஸ்தான விழாவின் முக்கிய நிகழ்வான ஓலைச் சப்பரம் (சகோபுரம்) வீதி உலா மிக விமரிசையாக நடைபெற்றது.

மயிலாடுதுறை: மயிலாடுதுறையின் ஆன்மீக அடையாளங்களில் ஒன்றான, வரலாற்றுச் சிறப்புமிக்க ஐயாரப்பர் ஆலயத்தில் சித்திரை சப்தஸ்தான பெருவிழாவின் முக்கிய நிகழ்வான ஓலைச் சப்பரம் (சகோபுரம்) வீதி உலா மிக விமரிசையாக நடைபெற்றது. இதில் திரளான பக்தர்கள் கலந்துகொண்டு சுவாமி தரிசனம் செய்தனர்.

வரலாற்றுப் பின்னணியும் ஆன்மீகச் சிறப்பும்

மயிலாடுதுறை நகரின் மையப்பகுதியில், காவிரி ஆற்றின் தென்கரையில் அமைந்துள்ள ஐயாரப்பர் ஆலயம், சோழர் காலத்துக் கட்டடக்கலைக்குச் சான்றாக விளங்குகிறது. இந்த ஆலயம் நாதசன்மா மற்றும் அவரது மனைவி அனவித்தை ஆகிய தீவிர சிவபக்தர்களால் வழிபாடு செய்யப்பட்டு, அவர்கள் இருவருக்கும் இறைவன் முக்தி அளித்த தலம் என்ற பெருமையைக் கொண்டது.

தஞ்சை மாவட்டம் திருவையாறில் நடைபெறுவதைப் போலவே, "மயிலாடுதுறை திருவையாறு" என்று போற்றப்படும் இத்தலத்திலும் ஆண்டுதோறும் சித்திரை மாதத்தில் சப்தஸ்தான பெருவிழா நடைபெறுவது வழக்கம்.

திருவிழா விபரங்கள்

இந்த ஆண்டிற்கான சப்தஸ்தான பெருவிழா கடந்த ஏப்ரல் 21-ம் தேதி கொடியேற்றத்துடன் முறைப்படி தொடங்கியது. விழாவின் ஒவ்வொரு நாளும் சுவாமிக்கும் அம்பாளுக்கும் சிறப்பு அபிஷேக ஆராதனைகள் செய்யப்பட்டு, வெவ்வேறு வாகனங்களில் வீதி உலா நடைபெற்று வந்தது.

விழாவின் சிகர நிகழ்ச்சிகளில் ஒன்றான ஓலைச் சப்பரம் வீதி உலா நேற்று இரவு அரங்கேறியது. இதற்காகப் பல நாட்களாக ஆலய வளாகத்தில் பிரம்மாண்டமான முறையில் சப்பரம் தயார் செய்யப்பட்டது.

கோலாகலமான ஓலைச் சப்பரம் வீதி உலா

நேற்று மாலை முதலே ஆலயத்தில் விசேஷ வழிபாடுகள் தொடங்கின. விழாவை முன்னிட்டு விநாயகர், சுப்பிரமணியர், ஐயாரப்பர், அறம்வளர்த்த நாயகி மற்றும் சண்டிகேஸ்வரர் ஆகிய பஞ்சமூர்த்திகளும் தனித்தனி ரிஷப வாகனங்களில் எழுந்தருளி பக்தர்களுக்குக் காட்சி அளித்தனர்.

 ஓலைச் சப்பரம் அலங்காரம்

வண்ணமிகு மலர்களாலும், பாரம்பரிய முறைப்படி ஓலைகளாலும் அலங்கரிக்கப்பட்ட பிரம்மாண்டமான சகோபுரம் (ஓலைச் சப்பரம்) தேரில் சுவாமியும் அம்பாளும் எழுந்தருளினர்.

வீதி உலா: மங்கல இசை முழங்க, வேதியர்கள் வேத மந்திரங்களை ஓத, பக்தர்கள் "தென்னாடுடைய சிவனே போற்றி" என முழக்கமிட்டபடி சப்பரத்தை வடம் பிடித்து இழுத்தனர்.

வீடுகள் தோறும் வழிபாடு 

இந்த வீதி உலாவானது ஆலயத்தின் நான்கு மாட வீதிகளையும் கடந்து சென்றது. வீதிகளின் இருபுறமும் திரண்டிருந்த திரளான பக்தர்கள், தங்கள் வீடுகளின் வாசலில் தீபாராதனை காட்டி இறைவனை வழிபட்டனர்.

பல்வேறு ஊர்களில் இருந்து திரண்ட பக்தர்கள் 

இந்த விழாவைக் காண்பதற்காக மயிலாடுதுறை  மட்டுமின்றி, சுற்றியுள்ள பல்வேறு கிராமங்களில் இருந்தும் ஏராளமான பக்தர்கள் வருகை தந்திருந்தனர். "திருவையாறில் நடைபெறும் சப்தஸ்தான விழாவைப் போலவே இங்கும் ஐயாரப்பர் வீதி உலா வருவது காணக் கிடைக்காத அற்புதம். குறிப்பாக இந்த ஓலைச் சப்பரத்தின் கலைநயமும், மின்விளக்கு அலங்காரமும் மனதிற்கு மிகுந்த அமைதியைத் தருகிறது," எனத் தரிசனத்திற்கு வந்திருந்த பக்தர்கள் நெகிழ்ச்சியுடன் தெரிவித்தனர்.  விழா ஏற்பாடுகளை ஆலய நிர்வாகத்தினர் மற்றும் ஊர் முக்கியஸ்தர்கள் இந்த விழாவிற்கான அனைத்து ஏற்பாடுகளையும் சிறப்பாகச் செய்திருந்தனர்.