தேனி, திண்டுக்கல் மாவட்டத்தில் உயிரிழந்த 2 காளைகள் -ஊர்கூடி அஞ்சலி செலுத்திய கிராம மக்கள்

திண்டுகல் மாவட்டத்தில் உயிரிழந்த ஜல்லிக்கட்டு காளைக்கும், தேனியில் உயிரிழந்த பட்டத்து காளைக்கும் ஊர் மக்கள் இறுதி அஞ்சலி செலுத்தினர்

உயிரிழந்த காளைகள்

திண்டுக்கல் அருகே உள்ள அ.வெள்ளோடு ஊராட்சி கல்லுப்பட்டி கிராமத்தில் உள்ள தோட்டத்து வீட்டில் வசிப்பவர் ஆட்டுக்கார சேசு. இவர், கடந்த 8 ஆண்டுகளாக ஜல்லிக்கட்டு காளை ஒன்றை வளர்த்து வந்தார். இதற்கு சுறா என பெயரிடப்பட்டு இருந்தது.  இந்த காளையை, தனது குடும்பத்தில் ஒருவரை போல பாவித்து ஆட்டுக்கார சேசு குடும்பத்தினர் வளர்த்து வந்தனர். பல்வேறு ஜல்லிக்கட்டு போட்டிகளில் கலந்து கொண்டு இந்த காளை பரிசுகளை வென்றிருக்கிறது. இந்தநிலையில் அ.வெள்ளோடு பகுதியில் உழவர் திருநாளுக்கு அடுத்த நாள் ஆடு, மாடு, கோழிகளை அங்குள்ள பகவதி அம்மன் கோயிலுக்கு அழைத்து வந்து சாமி கும்பிட்டு பொங்கல் வைப்பார்கள். பின்னர் அந்த பொங்கலை ஆடு, மாடுகளுக்கு கொடுப்பது வழக்கம். அதன்படி  பகவதி அம்மன் கோயிலுக்கு விவசாயிகள் ஆடு, மாடுகளை கொண்டு வந்தனர்.

 

இதைத்தொடர்ந்து ஆட்டுக்கார சேசு, தனது சுறா காளையை மினி லாரியில் ஏற்றி அ.வெள்ளோட்டில் உள்ள பகவதி அம்மன் கோவிலுக்கு கொண்டு வந்தார். இது ஜல்லிக்கட்டு காளை என்பதால், ஊருக்கு வெளியே உள்ள காட்டுப்பகுதியில் வைத்து காளையை லாரியில் இருந்து இறக்க முயன்றனர்.  அப்போது லாரியில் இருந்து துள்ளிக்குதித்து ஓடிய காளை, திடீரென அருகில் இருந்த கிணற்றில் தவறி விழுந்தது. இதில் கிணற்றில் இருந்த பாறை மீது விழுந்த காளை சிறிதுநேரத்தில் தண்ணீரில் மூழ்கி பரிதாபமாக இறந்தது.

 

இதுகுறித்த தகவலின்பேரில் திண்டுக்கல்லில் இருந்து தீயணைப்பு படையினர் விரைந்து வந்து கிணற்றில் இருந்து காளையின் உடலை மீட்டனர். அதன்பிறகு அ.வெள்ளோடு நாட்டாண்மை யாக்கோபு, ஊர் மணியம் அருளானந்து ஆகியோர் கிராம மக்கள் சார்பில் இறந்த காளைக்கு பட்டு வேட்டி கட்டி மாலை அணிவித்தனர். மேலும் கிராம மக்களும் கண்ணீர் மல்க இறுதி அஞ்சலி செலுத்தினர்.  பின்னர் காளையின் உடலை ஊர்வலமாக கொண்டு சென்று கல்லுப்பட்டியில் உள்ள தோட்டத்தில் அடக்கம் செய்தனர்.

 

அதே போல் தேனி மாவட்டம் பூதிப்புரம் கிராமத்தில் ஊர்காலப்பர் கோவில் உள்ளது. இந்த கோவிலில் பல தலைமுறையாக காளைகளுக்கு பட்டம் சூட்டி வழிபடும் பழக்கம் இருந்து வருகிறது.  அந்த வகையில் கடந்த 21 ஆண்டுகளுக்கு முன்பு பட்டம் சூட்டப்பட்ட காளை, வரதராஜ பெருமாள் கோவிலுக்கு எதிரே காலி இடத்தில் பராமரிக்கப்பட்டு வந்தது. பட்டம் சூட்டிய போது அந்த காளைக்கு 2 வயதே ஆகி இருந்தது.

தற்போது அதற்கு வயது 23. ஒவ்வொரு ஆண்டும் மாட்டுப்பொங்கல் பண்டிகையன்று நடத்தப்படும் ஊர்வலத்தில் இந்த காளை அலங்கரிக்கப்பட்டு கம்பீரமாக நடந்து வரும்.  அந்த காளையை மக்கள் வணங்கி, அது நடந்து வரும் பாதையில் மலர் தூவி வரவேற்பார்கள். இந்த ஆண்டும் சிறப்பாக ஊர்வலத்தை நடத்த ஏற்பாடுகள் செய்து வந்தனர். ஆனால், கடந்த ஒரு வாரகாலமாக இந்த காளை உடல் நலக்குறைவால் அவதிப்பட்டு வந்தது. இதனால், கடந்த 15-ந்தேதி மாட்டுப்பொங்கல் அன்று ஊர்வலம் ரத்து செய்யப்பட்டது. 

காளைக்கு உடல் நலக்குறைவு ஏற்பட்டதால் கிராம மக்கள் சோகத்தில் மூழ்கி இருந்தனர். இந்தநிலையில் பட்டத்து காளை நேற்று மாலை உயிரிழந்தது. இதை அறிந்த மக்கள் காளை பராமரிக்கப்படும் இடத்தில் சோகத்துடன் கூடினர். அங்கு காளையின் உடல் மலர்களால் அலங்கரிக்கப்பட்டு பொதுமக்கள் அஞ்சலிக்காக வைக்கப்பட்டது.  காளையின் உடலுக்கு கண்ணீர் மல்க பொதுமக்கள் அஞ்சலி செலுத்தினர். இரவில் காளையின் உடல் மேளதாளத்துடன் ஊர்வலமாக எடுத்துச் செல்லப்பட்டு ஊர்காலப்பர் கோவில் வளாகத்தில் அடக்கம் செய்யப்பட்டது. விரைவில் புதிய பட்டத்து காளையை ஊர்மக்கள் ஒன்றுகூடி தேர்வு செய்ய உள்ளதாக அந்த கிராம மக்கள் தெரிவித்தனர்.

 

ABP நாடு செய்திகளை சமூக வலைத்தள பக்கங்களிலும் பின் தொடரலாம்

 

பேஸ்புக் பக்கத்தில் தொடர

ட்விட்டர் பக்கத்தில் தொடர

யூடியூப்பில் வீடியோக்களை காண