மெட்ரோ கட்டண உயர்வு... "நாடகத்தை நிறுத்துங்கள்!" காங்கிரஸை சீண்டிய பாஜக

கர்நாடகாவில் காங்கிரஸ் அரசுக்கும் மத்திய அரசுக்கும் இடையே ஏற்கனவே பதற்றமான சூழல் நிலவி வரும் நிலையில், மெட்ரோ ரயில் கட்டண உயர்வுக்கான பழியை இரு தரப்பும் மாற்றி மாற்றி சுமத்தி வருகின்றன.

தேஜஸ்வி சூர்யா

Source : social media

பெங்களூரு மெட்ரோ கட்டண உயர்வுக்கு கர்நாடக மாநில அரசே பொறுப்பு என்று குற்றம் சாட்டி, பாஜக எம்.பி. தேஜஸ்வி சூர்யா கர்நாடக முதலமைச்சர் சித்தராமையாவை விமர்சித்துள்ளார்.

கர்நாடகாவில் உள்ள காங்கிரஸ் அரசுக்கும் மத்திய அரசுக்கும் இடையே ஏற்கனவே பதற்றமான சூழல் நிலவி வரும் நிலையில், மெட்ரோ ரயில் கட்டண உயர்வுக்கான பழியை இரு தரப்பும் மாற்றி மாற்றி சுமத்தி வருகின்றன.

தேஜஸ்வி சூர்யாவின் கேள்வி

ஓராண்டிற்கு முன்பு முதலமைச்சர் சித்தராமையா அவர்கள் மெட்ரோ கட்டணத்தைக் குறைக்க உத்தரவிட்ட சமூக வலைதளப் பதிவைப் பகிர்ந்துள்ள பாஜக எம்பி தேஜஸ்வி சூர்யா, தற்போது சித்தராமையா தனது அதிகாரம் குறித்துக் கூறும் வாதங்களைக் கேள்வி எழுப்பியுள்ளார்.

"கடந்த முறை கட்டணத்தைக் குறைக்கவோ அல்லது மாற்றியமைக்கவோ உத்தரவிட முதலமைச்சருக்கு அதிகாரம் எங்கிருந்து வந்தது? கட்டணத்தை நிர்ணயிக்கவோ அல்லது உயர்த்தவோ தனக்கு அதிகாரம் இல்லை என்று இப்போது அவர் கூறுவது உண்மையானால், அன்று மட்டும் எப்படிக் குறைத்தார்? உங்கள் கேள்விக்கான பதில் அதிலேயே இருக்கிறது. இந்த நாடகத்தை நிறுத்துங்கள்," என்று ஞாயிற்றுக்கிழமை தனது X தளத்தில் பதிவிட்டுள்ளார்.

காங்கிரஸ் கட்சியின் பதிலடி

இதற்குப் பதிலளித்துள்ள கர்நாடக காங்கிரஸ், கட்டண உயர்வு விவகாரத்தில் மத்திய அரசும் பாஜகவும் இரட்டை வேடம் போடுவதாகக் குற்றம் சாட்டியுள்ளது. இது குறித்து காங்கிரஸ் பதிவிட்டுள்ளதாவது:

"நம்ம மெட்ரோ கட்டண உயர்வு விவகாரத்தில் பாஜக எம்பிக்களின் 'எமர்ஜென்சி எக்சிட்' (தப்பிக்கும் முயற்சி) உத்தி என்பது அப்பட்டமான பாசாங்குத்தனம். கட்டண உயர்வில் மத்திய அரசுக்கு எந்தப் பங்கும் இல்லை என்று அவர்கள் கூறினார்கள், ஆனால் இப்போது டெல்லியிடம் கட்டண உயர்வைத் 'தற்காலிகமாக நிறுத்தி வைக்குமாறு' கெஞ்சுகிறார்கள். கட்டணத்தை நிர்ணயிக்க அவர்களுக்கு அதிகாரம் இல்லை என்றால், திடீரென்று அதை நிறுத்தி வைக்க மட்டும் அதிகாரம் எங்கிருந்து வந்தது? இது வெட்கக்கேடான பாசாங்குத்தனம்."

அரசு தரப்பு வாதங்கள்

இது குறித்து பேசிய தேஜஸ்வி சூர்யா, கர்நாடக அரசு மெட்ரோ கட்டணத்தை உயர்த்த வேண்டும் என்று 'கட்டண நிர்ணயக் குழுவிடம்' பலமுறை கோரிக்கை விடுத்துள்ளதாகத் தெரிவித்தார். பெங்களூரு மெட்ரோ கட்டணத்தை 5 சதவீதம் உயர்த்த மாநில அரசு பரிந்துரைத்துள்ளதாகவும், இது பயணிகளுக்கு கூடுதல் சுமையை ஏற்படுத்தும் என்றும் அவர் கூறினார். மேலும், சட்டப்படி குறிப்பிட்ட கால இடைவெளியில் கட்டணங்களை மாற்றியமைக்க வேண்டும் என்றும் அவர் மாநில அரசை வலியுறுத்தினார்.

அதேசமயம், கர்நாடக துணை முதலமைச்சர் டி.கே. சிவக்குமார் கூறுகையில், மெட்ரோ கட்டண உயர்வு குறித்து தன்னிடம் யாரும் ஆலோசிக்கவில்லை என்றும், மத்திய அரசின் செயலாளரே மெட்ரோ கட்டண நிர்ணயக் குழுவிற்குத் தலைமை தாங்குவதாகவும் குறிப்பிட்டார்.