LGBT: 'இந்தியாவில் தன்பாலின ஈர்ப்பு திருமணங்கள்' ஓய்வுபெற்ற நீதிபதிகள் குழு கடிதத்தால் பரபரப்பு

"திருமணத்தின் நாகரீக முக்கியத்துவம் குறித்து எந்த அறிவும் இல்லாத சில ஆர்வமுள்ள ஆர்வலர்கள் ஒரே பாலின திருமணங்களை சட்டப்பூர்வமாக்க நீதிமன்றத்தை அணுகினர்", என்று குறிப்பிட்டுள்ளனர்.

தன் பாலின ஈர்ப்பு குறித்து ஓய்வுபெற்ற நீதிபதிகள்

இந்தியாவில் தன்பாலின ஈர்ப்பு திருமணத்தை சட்டப்பூர்வமாக்குவது சமூகத்திற்கு அழிவுகரமான தாக்கத்தை ஏற்படுத்தும் என்று உயர் நீதிமன்றங்களின் முன்னாள் நீதிபதிகள் குழு புதன்கிழமை ஒரு திறந்த கடிதத்துடன் தெரிவித்துள்ளது.

கோபமும் வேதனையும் அடைந்துள்ளோம்

அந்தக் கடிதத்தில், "இந்திய திருமண மரபுகள் மற்றும் குடும்ப அமைப்புகளின் அடிப்படைக் கொள்கைகளுக்கு எதிராக நடத்தப்படும் தொடர்ச்சியான தாக்குதலால், நாங்கள் முன்னாள் நீதிபதிகள், மனசாட்சியும் அக்கறையும் கொண்ட இந்திய குடிமக்கள், கோபமும் வேதனையும் அடைந்துள்ளோம். தன் பாலின ஈர்ப்பு திருமணத்தை சட்டப்பூர்வமாக்குவது போன்ற ஒரு பிரச்சினையில் உங்கள் கவனத்தை ஈர்க்கவும் கடமைப்பட்டுள்ளோம்," என்று குறிப்பிடப்பட்டுள்ளது.

அந்த கடிதத்தில், இந்த விவகாரம் உச்ச நீதிமன்றத்தால் பரிசீலிக்கப்பட்டு வருவதாகவும், இந்த விவகாரம் அரசியல் சாசன அமர்வுக்கு சென்றதையடுத்து சமீபகாலமாக அதிக கவனம் பெற்றுள்ளதாகவும் குறிப்பிடப்பட்டுள்ளது. "பிராந்திய மற்றும் மத அடிப்படையில் சமூகத்தின் பல்வேறு அடுக்குகளைச் சேர்ந்த தேசத்தின் மக்கள், குடும்ப அமைப்பை பலவீனப்படுத்துவதற்காக இந்திய சமூகம் மற்றும் கலாச்சாரத்தின் மீது மிகைப்படுத்தப்பட்ட மேற்கத்திய சாயலான கண்ணோட்டத்தால் ஆழ்ந்த அதிர்ச்சியடைந்துள்ளனர்" என்று அந்தக் கடிதத்தில் கூறப்பட்டுள்ளது.

திருமணம் குறித்த அறிவில்லாதவர்கள்

இந்தியாவில் திருமணம் மற்றும் குடும்ப அமைப்பு மிகவும் இன்றியமையாதது என்று முன்னாள் நீதிபதிகள் கூறியதுடன், ஒரே பாலின திருமணம் குடும்ப அமைப்பின் வேரைத் தாக்கும் என்றும் சமூகத்தில் பேரழிவு தரும் தாக்கத்தை ஏற்படுத்தும் என்றும் குறிப்பிட்டனர். "இருப்பினும், திருமணத்தின் நாகரீக முக்கியத்துவம் குறித்து எந்த அறிவும் இல்லாத சில ஆர்வமுள்ள ஆர்வலர்கள் ஒரே பாலின திருமணங்களை சட்டப்பூர்வமாக்க நீதிமன்றத்தை அணுகினர்", என்று குறிப்பிட்டுள்ளனர். காலத்தால் சோதிக்கப்பட்ட விஷயத்தை பலவீனப்படுத்தும் எந்தவொரு முயற்சியும் சமூகத்தால் எதிர்க்கப்பட வேண்டும் என்று கடிதத்தில் குறிப்பிடப்பட்டுள்ளது. மேலும் இந்திய நாகரிகம் பலமுறை தாக்கப்பட்டாலும் உயிர் பிழைத்திருக்கிறது என்றும், ஓய்வுபெற்ற நீதிபதிகள் குழு, கடிதத்தில் கூறினர்.

எச்ஐவி பாதிப்பு அதிகரிக்கும்

அந்த கடிதத்தில், "தன் பாலின ஈர்ப்பு திருமணம் குறித்து, உலகெங்கிலும் உள்ள நாடுகளில் இருந்து பாடங்களைப் படிப்பது பொருத்தமானது, குறிப்பாக, 2019 மற்றும் 2020 ஆம் ஆண்டிற்கான எச்ஐவி கண்காணிப்பு அறிக்கையில், நோய் கட்டுப்பாடு மற்றும் தடுப்பு மையங்களால் வெளியிடப்பட்ட அதன் அதிகாரப்பூர்வ புள்ளிவிவரங்களின்படி, அமெரிக்க நாட்டில் புதிய எச்.ஐ.வி-எய்ட்ஸ் நிகழ்வுகளில் 70 சதவிகிதம் தன் பாலின ஈர்ப்பு மற்றும் இருபாலின ஆண்களுக்கு இடையே இருப்பதாக தெரிவிக்கப்பட்டது", என்று எழுதப்பட்டு, தன் பாலின ஈர்ப்பு திருமணம் கடுமையான விளைவுகளை ஏற்படுத்தக்கூடும் என்றும், எச்ஐவி பாதிப்பு எண்ணிக்கையை அதிகரிக்க வழிவகுக்கும் எனவும் கடிதத்தில் கூறப்பட்டுள்ளது.

சட்டம் சமூகத்தை பிரதிபலிக்க வேண்டும்

அதில், “மேற்கண்ட விஷயங்களைக் கருத்தில் கொண்டு, சமூகம் தொடர்பான இத்தகைய உணர்வுப்பூர்வமான பிரச்னை நாடாளுமன்றத்திலும், மாநிலங்களவையிலும் விவாதிக்கப்பட வேண்டும் என்பது எங்களின் ஒருங்கிணைந்த கருத்து. இதுபோன்ற சட்டத்தை கொண்டு வருவதற்கு முன்பு, சமூகத்தின் கருத்து அவசியம். சட்டம் சமூகத்தின் விருப்பத்தை பிரதிநிதித்துவப்படுத்த வேண்டும் மற்றும் சமூகத்தின் சில உயரடுக்கு பிரிவினரின் விருப்பத்தை நோக்கி இல்லை என்பதை உறுதிப்படுத்த வேண்டும். இந்திய சமூகம் மற்றும் கலாச்சாரத்தின் சிறந்த நலனுக்காக உச்ச நீதிமன்றத்தில் தன் பாலின ஈர்ப்புத் திருமணப் பிரச்சினையைத் தொடர்பவர்கள் உட்பட சமூகத்தின் உணர்வுள்ள உறுப்பினர்கள் அவ்வாறு செய்வதைத் தவிர்க்குமாறு நாங்கள் மரியாதையுடன் கேட்டுக்கொள்கிறோம்” என்று நீதிபதிகள் எழுதிய கடிதத்தில் மேலும் தெரிவிக்கப்பட்டுள்ளது.

குழு உறுப்பினர்கள்

இந்த குழுவில், ராஜஸ்தான் உயர் நீதிமன்றத்தின் முன்னாள் தலைமை நீதிபதி எஸ்.என்.ஜா (ஓய்வு), நீதிபதி எம்.எம். குமார் (ஓய்வு), ஜம்மு காஷ்மீர் உயர் நீதிமன்றத்தின் முன்னாள் தலைமை நீதிபதி, குஜராத் லோக்ஆயுக்தா நீதிபதி எஸ்.எம்.சோனி (ஓய்வு), நீதிபதி எஸ்என் திங்ரா (ஓய்வு) ஆகியோர் ஒரு பகுதியாக இருந்தனர்.