Raghav Chadha: ஆம் ஆத்மிக்கு ஆபத்து; பாஜகவில் இணையும் ராகவ் சத்தா உள்ளிட்ட மாநிலங்களவை எம்.பி-க்கள்; டெல்லியில் பரபரப்பு
Raghav Chadha Joins BJP: ஆம் ஆத்மி கட்சியில் பெரும் பிளவு ஏற்பட்டுள்ளது. மூன்றில் இரண்டு பங்கு எம்.பி-க்கள் பாஜகவில் இணைவார்கள் என்று மாநிலங்களவை எம்.பி. ராகவ் சதா கூறியுள்ளார். இதனால் டெல்லி அரசியலில் பரபரப்பு ஏற்பட்டுள்ளது.
ஆம் ஆத்மி கட்சியின் நிறுவன உறுப்பினரும், மாநிலங்களவை உறுப்பினருமான ராகவ் சத்தா, இன்று ஒரு செய்தியாளர் சந்திப்பை நடத்தி, ஆம் ஆத்மி கட்சியிலிருந்து தனது ராஜினாமாவை அறிவித்தார். சத்தாவுடன், சந்தீப் பதக் மற்றும் அசோக் மிட்டல் ஆகியோரும் மாநிலங்களவையிலிருந்து ராஜினாமா செய்தனர். மேலும், மூன்றில் இரண்டு பங்கு எம்.பி-க்கள் பாஜகவில் இணைவார்கள் என்றும் அவர் தெரிவித்துள்ளார்.
“பாஜகவுடன் இணைகிறோம்“
இது குறித்து பேசிய ஆம் ஆத்மி கட்சித் தலைவர் ராகவ் சத்தா, "நாங்கள் பாஜகவுடன் இணைகிறோம். கடந்த 12 ஆண்டுகளில், பிரதமர் நரேந்திர மோடி தலைமையிலான மத்திய பாஜக அரசு, முன்பு பல தலைவர்கள் எடுக்க அஞ்சிய பல முடிவுகளை எடுத்துள்ளது. இந்த தலைமைக்கு மக்கள் ஒருமுறை அல்ல, மும்முறை ஒப்புதல் அளித்துள்ளனர். பிரதமர் மோடியின் தலைமையில் நாங்கள் நாட்டிற்காக பணியாற்றுவோம்," என்று கூறியுள்ளார்.
மேலும், "15 ஆண்டுகளாக என் ரத்தத்தால் நான் வளர்த்தெடுத்த ஆம் ஆத்மி கட்சி, தன் பாதையை இழந்துவிட்டது. இப்போது அது தேசிய நலனுக்காகச் செயல்படாமல், தனிப்பட்ட ஆதாயத்திற்காகச் செயல்படுகிறது. நான் ஆம் ஆத்மி கட்சியிலிருந்து விலகி, மீண்டும் மக்களிடம் திரும்புகிறேன். இந்தக் கட்சியை டெல்லி, பஞ்சாப் மற்றும் நாடு முழுவதும் உள்ள பிற மாநிலங்களுக்கு விரிவுபடுத்த நாம் அனைவரும் ஒன்றிணைந்து உழைத்தோம்," என்றும் அவர் கூறினார்.
பின்னர் பேசிய ஆம் ஆத்மி கட்சித் தலைவர் சந்தீப் பதக், 'என் வாழ்வில் இப்படி ஒரு நிலைமை ஏற்படும் என்று நான் ஒருபோதும் நினைத்ததில்லை. ஆனால், அது ஏற்பட்டுவிட்டது. நான் 10 ஆண்டுகளாக இந்தக் கட்சியுடன் இணைந்திருந்தேன். இன்று ஆம் ஆத்மி கட்சியிலிருந்து பிரிகிறேன்' என்று கூறினார்.
ஆம் ஆத்மியில் இப்போது எத்தனை எம்.பி-க்கள் இருப்பார்கள்.?
தன்னுடன் 8 எம்.பி.க்கள் இருப்பதாக மாநிலங்களவை எம்.பி. ராகவ் சத்தா கூறியுள்ளார். அவர்கள் அனைவரும் பாரதிய ஜனதா கட்சியுடன் இணைவார்கள். மாநிலங்களவையில் 10 ஆம் ஆத்மி எம்.பி-க்கள் உள்ளனர், அவர்களில் மூன்றில் இரண்டு பங்கிற்கும் அதிகமானோர் எங்களுடன் உள்ளனர் என்று ராகவ் சத்தா கூறியுள்ளார்.
“அவர்கள் கையெழுத்திட்டுள்ளனர். இன்று காலை நாங்கள் கையெழுத்திட்ட கடிதம் மற்றும் ஆவணங்களை மாநிலங்களவை தலைவரிடம் ஒப்படைத்துள்ளோம். அவர்களில் 3 பேர் உங்கள் முன்னால் இங்கே இருக்கிறார்கள். எங்களைத் தவிர, ஹர்பஜன் சிங், ராஜேந்தர் குப்தா, விக்ரம் சாஹ்னி மற்றும் சுவாதி மாலிவால் ஆகியோரும் உள்ளனர்." என்று செய்தியாளர்கள் சந்திப்பில் சத்தா தெரிவித்தார்.
இதையடுத்து, ஆம் ஆத்மி கட்சிக்கு, மாநிலங்களவையில் நாராயண் தாஸ், சஞ்சய் சிங் மற்றும் சந்த் பல்பிர் சிங் ஆகியோர் மட்டுமே எஞ்சியுள்ளனர் என்பது குறிப்பிடத்தக்கது.
தலைப்பு செய்திகள்
ட்ரெண்டிங் செய்திகள்
